SIRAKHA 51

₁Muṋe washu,

Khosi yanga,

ndi a u livhuha,

ndi a u renda,

Mudzimu Mutshidzi wanga!

Ndi livhuha dzina ḽau;

₂wo ḓi vha Mulisa na Mutiki wanga.

Wo ntshidza lufuni,

na tshikwekweni tsha lulimi lwa mazwifhi.

Musi vha tshi lwa na nṋe Iwe wo ḓi ima na nṋe

wa ntikedza wa nndamulela.

₃Wo nndamukisa mulomoni wa i ḽaho nga vhuthu hau vhuhulu, na nga vhuhulu ha dzina ḽau.

Wo ntshidza zwanḓani zwa dziphondi

na kha madambudzo manzhi e a nngwela,

₄na musi ndo tangwa nga khavhu dza mulilo,

ndí ngomu muliloni we nda si u funge,

₅ngomu-ngomu vhudzulavhafu,

₆he vha nkhwelela zwine nda si zwi ḓivhe.

Ndo vha ndo livhana na lufu,

ndi tshi vho ingamela vhudzulavhafu.

₇Vho vha vho ntinga masia oṱhe ha si vhe na ane a mphalala.

₈Ndi hone ndi tshi elelwa vhuthu hau, Muṋe washu,

nda humbula mishumo yau ya u bva tsha kale,

uri u lamulela vha no u lindela vha sa fheli mbilu,

wa vha tshidza zwanḓani zwa maswina avho.

₉Zwenezwo nda vhidzelela ndí henefhano fhasi,

nda rabela uri ndi tshidzwe lufuni.

₁₀Ndo vhidzelela Muṋe washu, Khotsi a Muṋe wanga

nda ri, “U songo nṱutshela musi wa khombo,

ndo tangwa nga vha u ḓihudza, thi koni tshithu.

A thi nga litshi u renda dzina ḽau, ndi ḓo ḓi ḽi imbela ndi tshi u livhuha.”

₁₁Zwenezwo Muṋe washu a pfa ipfi ḽanga,

a ntshidza nda si tsha lovha,

a nndamulela musi uyo muvhi.

₁₂Ndi zwine nda ḓo ḓi u livhuha, nda u renda,

nda ri dzina ḽa Muṋe washu ḽi na mashudu.

₁₃Musi ndi tshee nga hanga,

ndi sa athu fara nyendo dzanga,

ndo rabela nda humbela vhuṱali.

₁₄Ndo gwadama nnḓa ha thembele nda humbela u ṋewa hone,

nazwino ndi ḓo ḓi vhu ṱoḓa nda vhuya nda fa.

₁₅Mbilu yanga yo ḓi vhu takalela u bva tshee ha fhufhumisa,

nḓirivhe dzaho dza vhuya dza vhibva;

ṋayo dzanga dzo tshimbila nḓilani yone-yone,

nge u bva hanani hanga nda kanda ṋayoni dzaho.

₁₆Ndo sendedza nḓevhe zwiṱuku nda vhu wana,

nda ḓiwanela ndayo nnzhi.

₁₇Ndi ngaho ndó kandela phanḓa nga u ralo;

nga hu rendwe Mudzimu,

Ene we a nṋea vhuṱali.

₁₈Ndo ḓikumedza vhuṱali tshoṱhe,

ndo vha tshifhungu kha u ita zwivhuya.

A thi nga shoni na kathihi.

₁₉Mbilu yanga yo tou swa nga u tama vhuṱali,

nda si vhuye nda humela murahu.

Ndo imisela zwanḓa zwanga ṱaḓulu nda lila nga u vhona nḓivho yanga i tshee ṱhukhu.

₂₀Ndo livhisa mbilu yanga khaho,

nda vhu wana nge nda ḓikumulula.

A vhu nga nṱutsheli lini na lini,

ngauri ndo ḓi vhu swela mbilu u bva hanani.

₂₁Ndo vhu ṱoḓa nga zwoṱhe zwine nda vha zwone.

Zwenezwo ndo wana pfufho yavhuḓi.

₂₂Muṋe washu o nṋea lulimi lwa u mu renda,

ndi lwone pfufho yanga.

₂₃Sendelani tsini hanga inwi ni songo funzwaho,

ni dzhene tshikolo tshanga.

₂₄Ni lilelani nga u vhona ni si naho?

Hufha mimuya yaṋu yo tou vhu ṱulutshela.

₂₅Ndo amba nda vhu ḓivhadza nda ri,

“Ḓiwaneleni vhuṱali ní songo bvisa tshithu.

₂₆Hwalani dzhogo yaho nga mutsinga,

uri mimuya yaṋu i laiwe;

vhu tsini na vha no vhu ṱoḓa,

vhu hovheni!”

₂₇Edzonu vhona!

Nṋe ndo tou ḓidina zwiṱuku,

nda wana mulalo muhulu.

₂₈Rengani ndayo nga siliva i si na vhukono;

ni ḓo wana musuku munzhi ngayo.

₂₉Ngavhe mimuya yaṋu

i tshi pembelela vhuthu ha Mudzimu,

na si vhuye na shona u mu renda.

₃₀Shumani mishumo yaṋu tshifhinga tshi sa athu u swika,

Mudzimu u ḓo ni pfufha nga tshifhinga tshawe.