BARUKHU 1

₁Ngea maipfi a bugu yo ṅwalwaho Babilonia nga Barukhu murwa wa Neria, murwa wa Maaseya, murwa wa Tsedekia, murwa wa Hasadia, murwa wa Hilikia, ₂nga ṅwaha wa vhuṱanu, nga ḓuvha ḽa vhuṱanu na vhuvhili ḽa ṅwedzi, musi Vhakhaladia vho thuba Jerusalema vha u fhisa nga mulilo. ₃Huno Barukhu a vhala maipfi a bugu iyo zwi tshi pfiwa nga Jekhonia, murwa wa Joakimi, khosi ya Juda, zwi tshi pfiwa na nga vhathu vhoṱhe vho ḓaho u pfa bugu iyo i tshi vhaliwa: ₄ndi vhaḓivhalea na vharwa vha khosi na vhahulwane na vhathu vhoṱhe, vhahulwane na vhaṱuku vhoṱhe vhe vha vha vha tshi dzula tsini ha mulambo wa Suda. ₅Vha tshi i pfa vha tsengisa miṱodzi, vha ḓidzima zwiḽiwa, vha rabela phanḓa ha Muṋe washu, ₆vha kuvhanganya mali, muṅwe na muṅwe a tshi bvisa nga hune a kona. ₇Mali iyo ya rumelwa Jerusalema kha Joakimi, murwa wa Hilikia, murwa wa muphrista Shalumu, na kha vhaphrista na vhathu vhoṱhe vhe vha vha vhe nae muḓini wa Jerusalema. ₈Izwo ho vha hu musi Barukhu a tshi fhiwa midzio ya nnḓu ya Muṋe washu ye ya vha yo hwalwa thembeleni, a pfi a i vhuedzedze shangoni ḽa Juda, nga ḓuvha ḽa vhufumi ḽa ṅwedzi wa Sivani. Midzio iyo ya siliva yo vha yo fuliswa nga Tsedekia, murwa wa Josiasi khosi ya Juda, ₉musi Nebukhadinetsara khosi ya Babilonia o no hwala Jekhonia a tshi bva Jerusalema na vharwa vha khosi na vhafuli vha tsimbi na musuku na siliva na vhaḓivhalea, na vhathu zwavho, a vha isa Babilonia vhe mathubwa.

₁₀Luṅwalo lwavho lwo vha lu tshi ri, “Ri khou ni rumela mali ya u renga zwiṱhavhelo zwi fhiswaho na nduvho dza u pfumelelwa na zwioro, na u lugisela thevhula, uri zwi ṋekedzwe aḽiṱarini ya Mudzimu Muṋe washu, ₁₁na u rabelela vhutshilo ha Nebukhadinetsara khosi ya Babilonia, na ha murwa wawe Beleshatsara, uri vha lalame unga lutombo lu re nṱha ha ḽifhasi. ₁₂Ngavhe Muṋe washu a tshi ri ṋea nungo, a vhonetshela maṱo ashu, ra tshila ro tsireledzwa nga Nebukhadinetsara khosi ya Babele, na murwa wawe Beleshatsara, vha ri takalela, ra vha shumela maḓuvha manzhi.”

₁₃“Ni ri rabelele-vho ha Mudzimu Muṋe washu ngauri ro mu khakhela, vhuhali na mbiti dzawe a zwi athu ri humela na ṋamusi. ₁₄Nahone bugu iyi ine ra khou ni rumela ni i vhale vhathuni nḓuni ya Muṋe washu, nga maḓuvha a vhuṱambo na nga maḓuvha o vhewaho.

₁₅“Ni ambe ni ri, ‘Muṋe washu u ḓi ita zwi re zwone, hone riṋe ṋamusi ro shona, riṋe vhathu vha Juda na vhadzulapo vha Jerusalema, ₁₆ngauri mahosi ashu na vhavhusi na vhaphrista na vhaporofita na vhokhotsi ashu, na riṋe vhaṋe, ₁₇ro tshinya maṱoni a Muṋe washu, ₁₈ra mu nyadza; a ro ngo thetshelesa Mudzimu Muṋe washu a tshi ri laya, a ro ngo tevhedza ndayo dze Muṋe washu a ri vhetshela dzone. ₁₉Tshi tsheetsho tshee Muṋe washu a endedza vhokotsi washu vha tshi bva shangoni ḽa Egipita na ṋamusi, ro ḓi vha vha nyadzaho Mudzimu Muṋe washu, a tshi amba na riṋe ra si zwi londe. ₂₀Zwino na ṋamusi ri ḓi welwa nga khombo na deketelo zwe Muṋe washu a zwi ḓivhadza nga Mushe muḓinḓa wawe zwiḽa a tshi pfulusa vhokotsi ashu shangoni ḽa Egipita u yo ri ṋea shango ḽi elelaho mukhaha na ṋotshi. ₂₁A ro ngo thetshelesa ipfi ḽa Mudzimu Muṋe washu a tshi amba na riṋe nga maipfi oṱhe a vhaporofita vhe a vha ruma kha riṋe, ₂₂tshashu roṱhe ro tevhela zwi no funwa nga mbilu dzashu mmbi, nga u shumela midzimu miṅwe na u ita zwi sa takadzi Mudzimu Muṋe washu.’”