Simoni murwa wa Oniasi
1Muphrista muhulwane,
Simoni, murwa wa Oniasi
ndi ene we a vusa nnḓu ya Mudzimu misi yawe,
a fhaṱa mutsheṱo wa u tsireledza thembele.
2O ita na u tea miteo ya mitsheṱo ya u tingeledza miṱa ya thembele,
a i tea a tshi tsisa luvhili.
3Misi yawe ho bwiwa tshisima tsha maḓi,
tsha tou vha isha ḽo hulaho sa lwanzhe.
4O tsireledza vhathu vha hawe uri vha si phusukanywe,
a tingeledza muḓi nga mitsheṱo
uri vha kone u imedzana na maswina vhó govhelwa.
5O vha e na vhugala vhungafhani ó kuvhanganelwa nga vhathu,
a tshi bva ngomu ha lupila lwa Hukhethwakhethwa!
6O vha a tshi nga masase i vhukati ha makole,
a tshi nga ṅwedzi u tshi ya nga fhasi,
7a tshi nga ḓuvha ḽi tshi ṱavhela thembele ya Waṱaḓuluṱaḓulu,
a tshi nga musengavhadzimu
u tshi vhonala makoleni a mivhalavhala kha lutombo,
8a nga maluvha a murosi nga ṱhumalurere,
a nga maluvha a phendephende tsini na tshisima,
a nga davhi ḽa muri wa zwioro tshilimo,
9a nga mulilo wa zwioro mudzioni wa zwioro,
a nga mudzio muhulu wa musuku,
wo nakiswaho nga matombo
a tshakha-tshakha a mutengo muhulu,
10a nga muri wa muolivi
u tshi aṋwa mitshelo yawo wa tou ṱakaṱela,
a nga muṱaululo wo ima u tshi ṋanzwa makole.
11Musi Simoni o ambara khanzu yawe ya vhugala,
ó fuka zwifuko zwa maṱeleṱele,
a tshi gonya aḽiṱari khethwa,
a ḓisa vhugala muṱani wa hukhethwa.
12Musi vhaphrista vha tshi mu ṋekedza miraḓo ya zwiṱhavhelo,
ó ima phanḓa ha tshivhaso tsha aḽiṱari,
vha hawe vhó mu kuvhanganela vhó ita danga,
ó ima unga mukedara wa Libanoni,
vhone vha mu tanga unga matsinde a mitshevho.
13Musi vhana vhoṱhe vha Aroni
vho ima phanḓa ha tshivhidzo tshoṱhe tsha Israele,
vhó ambara maṱeleṱele avho,
vhó fara nduvho dzi ṋekedzwaho Muṋe washu,
14Simoni a tshi khou khunyeledza mishumo yawe aḽiṱarini,
a tshi khou ṋekedza zwiṱhavhelo
zwa Ramaanḓaoṱhe, Waṱaḓuluṱaḓulu!
15O vha a tshi dzhia tshinwelo a shela nduvho
ya tuvhu ḽa thwavhaḓi ya nḓirivhe,
a shululela tsindeni ḽa aḽiṱari, zwa nukhelela u ḓifha,
zwa takadza Waṱaḓuluṱaḓulu, Khosi ya zwoṱhe.
16Zwenezwo vhana vha Aroni vha ṱavha mukosi,
vha lidza phalaphala dza musina,
dza lila dza pfala kule, ha vha u humbudza vhathu
Waṱaḓuluṱaḓulu.
17Ndi hone vhathu vhoṱhe vha tshi mbo ḓi wela fhasi mazha
vha shuvhama,
vha luvha Muṋe wavho Ramaanḓaoṱhe Mudzimu wa ṱaḓuluṱaḓulu.
18Zwino ha bvuma nyimbo vhaimbi vha mu renda,
nyimbo dza thendo dza ḓifhesa.
19Lushaka lwoṱhe lwa luvhelela Muṋe washu,
Waṱaḓuluṱaḓulu, vha tshi khou rabela Ene Mukhathutsheli,
vha vhuya wa khunyeledza mushumo wa u luvha,
vha fhedza tshumelo ya Muṋe washu.
20Zwenezwo Simoni o ḓo tsela fhasi
a imisa zwanḓa
a shudufhadza tshivhidzo tshoṱhe,
a bula maipfi a no bva ha Muṋe washu,
a vha na mashudu a u bula dzina ḽawe.
21Ndi hone vhathu vha tshi dovha vha shuvhama fhasi vha luvha,
vha ṱanganedza mashudu a bvaho kha Waṱaḓuluṱaḓulu.
Ṱhuṱhuwedzo
22Zwino rendani Mudzimu Muṋe wa zwoṱhe;
o ita zwimangadzo hoṱhe-hoṱhe;
o ita uri ri huliswe tshee ra bebwa, a ḓi ri itela vhuthu.
23Ngavhe a tshi ri ṋea mbilu dzo takalaho,
a ri ladzela shango u ya ho ya.
24Ngavhe a tshi ḓi ri itela vhuthu nga u fulufhedzea hawe,
a ri tshidza misi yoṱhe ya vhutshilo hashu!
U vhina bugu
25Ndi nengwa tshakha mbili nga mbilu yanga yoṱhe,
lwa vhuraru a lu vhuyi lwa vha lushaka:
26Ndi vhathu vha no dzula thavhani ya Seiri,
na Vhafilista,
na vhathu vha matsilu vha no dzula Shikheme.
27Buguni iyi,
nṋe Joshua murwa wa Eliazara, murwa wa Sirakha wa Jerusalema,
ndo ṅwala ndayo dza vhuṱali na mirero i ṋeaho muthu nḓivho
zwi tshi khou gubunyea zwi tshi bva kha vhuṱali ha mbilu yanga.
28Mashudu muthu a no elekanya zwithu izwi,
a tumbula vhuṱali nga u vha na nzhele nazwo.
29Á zwi tevhedza ha nga kundwi nga tshithu,
ngauri tshedza tsha Muṋe washu tshi vhonetshela nḓila yawe.
