SIRAKHA 49

₁Dzina ḽa Josiasi

ḽi nga muvango wa tshioro

wo vangiwaho nga mutsila

wa u ita zwiḓolo zwi nukhelelaho.

U mu humbula zwi ḓifha sa mutoli wa ṋotshi,

zwi nga nyimbo dza vhuṱamboni hu tshi nwiwa waini.

₂O kanda nḓilani yone-yone

a rembulusa vhathu,

a thutha midzimu ya zwifanyiso i nengisaho.

₃O fulufhela Muṋe washu nga mbilu yawe yoṱhe,

nangwe yo vha i misi mivhi,

o ḓi fungelela u luvha Muṋe washu.

₄Mahosi oṱhe o tshinya a tou kalula,

vhe vha ita zwivhuya ndi Dafita

na Hiskia na Josiasi fhedzi.

Avho vhaṅwe vho ṱutshela Mulayo wa Waṱaḓuluṱaḓulu,

vha vhuya vha ngalangala,

₅vha luvha mahosi a vhatsinda,

vha hulisa lushaka lwa vhasili, vhone vha nyadziwa;

₆muḓi mukhethwa wo nangwaho wa fhiswa nga mulilo,

mikoto yawo ya sala i si na muthu,

₇ha khunyelela maipfi a Jeremia,

vha lifhedzwa zwe vha mu pfisa vhuṱungu,

ene we a itwa muporofita a tshee muvhilini wa mme awe

uri a tupule, a pwashekanye, a lozwe, a dovhe a fhaṱe, a ṱavhe.

₈Esekiele o vhona bono ḽa vhugala ḽe Mudzimu a mu sumbedza

ḽi nga nṱha ha gariki ya vhakherube.

₉O amba na maswina a Jobo

uri vha tshimbilaho nḓilani yone-yone vha gude ngazwo.

₁₀Zwino na vhaporofita vha fumi na vhavhili,

ngavhe marambo avho a tshi vuwa he vha swiṱwa hone, a tshila!

Vho fhumudza vhathu vha Jakopo,

vha vha khwaṱhisela lutendo uri vha vhe na zwe vha fulufhela.

₁₁Zerubabele ri nga mu hulisa hani?

O vha a tshi nga rinngi ya luswayo

i re tshanḓani tshauḽa tsha Mudzimu.

₁₂Joshua murwa wa Jotsadaka na ene o vha o ralo.

Misi yavho vho fhaṱa nnḓu ya Mudzimu,

vha imisa thembele khethwa ya Muṋe washu,

ye ya livhanywa na vhugala ha lini na lini.

₁₃Nehemia na ene u ḓo gagamiswa lini na lini!

O vusa mitsheṱo yashu ye ya vha yo wa,

a kwea dzigethe na matsimbi a u vala khoro,

a dovha a fhaṱa nnḓu dzashu dze dza vha dzo phusukanywa.

₁₄O vhumbwaho a nga Enokho ḽifhasini haho;

o takulelwa ṱaḓulu e na muvhili wawe.

₁₅O vhumbwaho a nga Josefa na ene haho:

Muvhusi wa vhakomana vhawe, mutiki wa vhathu vha hawe.

Marambo awe na one o londolwa.

₁₆Semu na Sethe vhone vho huliswa u fhira vhathu vhoṱhe,

hone vhugala ha Adamu vhu fhira ha vhoṱhe vha tshilaho.