SIRAKHA 48

₁Zwino ha bvelela

muporofita Elia,

a duga sa mulilo;

maipfi awe a fhisa unga ṋanḓo i dugaho.

₂Ene o vha wisela nḓala, a vha fhungudza

vha sala vha si gathi nga vhufhungu hawe.

₃O vala makole nga ipfi ḽa Muṋe washu,

a wisela mulilo fhasi luraru.

₄Iwe Elia muitamaḓembe,

u na vhugala vhungafhani!

Vhugala vhu no eḓana na hau ndi ha nnyi?

Ane a nga zuwa mishumo i no nga yau ndi nnyi?

₅Wo vusa mufu tshaloni a dovha a tshila

nge Muṋe washu a zwi amba.

₆Wo lozwa mahosi,

vhaḓivhalea vha fa vhe vhulaloni havho.

₇Wo pfa Mudzimu a tshi kaidza vhathu thavhani ya Sinai,

wa pfa khaṱhulo dza ndifhedzo thavhani ya Horebe.

₈Wo vhumba mahosi a no ḓo lifhedza maswina,

na vhaporofita vha no ḓo sala iwe wó ṱuwa.

₉Wo takulelwa makoleni

nga tshiḓumbumukwe tsha mulilo,

wó ṋamela gariki ya bere dza mulilo.

₁₀Zwo dzula zwo ṅwalwa buguni dza vhaporofita

dza u haṱula vhathu,

uri zwi dzikise mbiti dza Mudzimu

ḓuvha ḽawe ḽa ndifhedzo ḽi sa athu swika,

zwi rembuluse mbilu dza vhokhotsi

vha pfumedzane na vhana vhavho,

na u vusa matsinde a vhana vha Jakopo.

₁₁Mashudu a no ḓo u vhona, muthu o faho e na lufuno,

vhukuma na riṋe ri ḓo tshila na iwe.

₁₂Elia o vha o ralo;

o putelwa nga tshiḓumbumukwe a hwalwa a si tsha vhonala,

ha sala Elisha ó ḓadzwa muya wawe.

Misi yawe o vha a sa tetemeli muvhusi na muthihi,

o vha a sa shushedzwi nga muthu.

₁₃O vha a sa kundwi nga tshithu;

na musi o fa tshitumbu tshawe tsho porofita.

₁₄A tshi kha ḓi tshila o ita zwimangadzo,

a ita maḓembe na musi o no fa.

₁₅Nangwe vho vhona zwoṱhe izwo,

vhathu a vho ngo laṱa vhuvhi havho,

a vho ngo ṱutshela vhutshinyi havho,

vha vhuya vha thathwa shangoni ḽavho vha balanganywa na ḽifhasi.

Ho sala vha si gathi,

vhavhusi vhavho vhe vha nnḓu ya Dafita.

₁₆Vhaṅwe vhavho vho ita zwi takadzaho Mudzimu,

vhaṅwe vha ḓi tshinya lwa u tou kalula.

₁₇Hiskia o tsireledza mitsheṱo ya muḓi,

a bwa mugero wa u ḓisa maḓi ngomu muḓini.

O phula thanele kha tombo nga mbaḓo dza tsimbi,

a fhaṱa madamu a maḓi.

₁₈Ha ḓa Sanakheribi,

a ruma mulangammbi wawe a dia shango;

onoyo a govhela Tsioni,

a nyefula Mudzimu a tshi khou ḓihudza.

₁₉Mbilu dza vhathu dza tou ṋoka, zwanḓa zwavho zwa tetemela,

vha pfa vhuṱungu vhu no nga ha musadzi a tshi vhofholowa.

₂₀Hone vha vhidzelela Mudzimu

Muṋe wa khathutshelo, Waṱaḓuluṱaḓulu,

vha imisa zwanḓa zwavho vha zwi livhisa khae.

Ene Mukhethwa

a mbo ḓi pfa thabelo yavho e makoleni,

a vha lamulela nga tshanḓa tsha Yesaya.

₂₁Muṋe washu a dia mishasha ya Vhaashuru,

muruṅwa wawe a vha lozwa tshoṱhe.

₂₂Ndi uri Hiskia o ita zwi takadzaho Muṋe washu,

a kanda ṋayoni dza Dafita khotsi awe a sa pambuwi,

nga he muporofita Yesaya a vha laya.

Yesaya o vha na bvumo a vhona mabono a ngoho.

₂₃Misi yawe Mudzimu o humisela ḓuvha murahu;

o engedza maḓuvha a khosi Hiskia.

₂₄O vhona zwa maḓuvha a u fhedzisela nga maanḓa a muya,

a fhumudza vha lilaho Tsioni.

₂₅O dzula o dzumbulula zwe zwa vha zwi tshi ḓo itea

zwa vhuya zwa guma,

a dzumbulula zwo dzumbiwaho zwi sa athu itea.