SIRAKHA 15

₁Muthu ane a ofha Muṋe washu

u ḓo ita zwenezwo,

ane a nambatela mulayo u ḓo wana vhuṱali.

₂Vhuṱali vhu ḓo mu ṱanganedza sa mme,

ha mu kuvhatedza unga muselwa.

₃Zwiḽiwa zwine ha ḓo mu ṋea ndi ṱhalukanyo,

maḓi ndi u ṱalifha.

₄U ḓo ḓitika ngaho a si we,

u ḓo vhu fulufhela a si shone.

₅Vhu ḓo mu hulisa a fhira vha hawe,

ha mu funza u amba tshivhidzoni.

₆U ḓo pembela,

khare yawe ya vha dakalo,

ifa ḽawe ndi bvumo ḽa lini na lini.

₇Matsilu one ha nga wani vhuṱali,

vhatshinyi a vha nga vhu vhoni.

₈Vhu kule na vhaḓihudzi,

vhadzia-u-zwifha a vha nga vhu humbuli.

₉Luimbo lwa thendo a lu ṱoḓei

mulomoni wa mutshinyi,

hufha a songo ṋewa nga Muṋe washu.

₁₀Luimbo lwa thendo nga lu imbwe u na vhuṱali,

muṋei walwo ndi Muṋe washu nga dzawe.

₁₁U songo ri,

“Ndo wedzwa vhuvhini nga Muṋe washu”;

zwine Mudzimu a zwi sanda ha zwi iti.

₁₂U songo ri, “Ndi Ene we a nkhedza”;

Muṋe washu ha ṱanganedzi mutshinyi.

₁₃Muṋe washu u sanda zwiito zwoṱhe zwi nengisaho,

zwi ḓi nga vhane vha mu funa:

A hu na a sa zwi sandi.

₁₄Musi Mudzimu a tshi vhumba muthu u rangani,

o mu ṋea tshifhiwa tsha u kona

u nanga zwi re zwone kana zwi si zwone.

₁₅Arali iwe u tshi funa

u ḓo nanga u vhulunga milayo,

wa fulufhedzea wa ita zwine a funa.

₁₆O vhea mulilo na maḓi phanḓa hau;

onyolosa tshanḓa tshau u nange tshine wa funa.

₁₇Phanḓa ha muthu

ho vhewa vhutshilo na lufu,

tshine a nanga tshone u ḓo ṋewa tshenetsho.

₁₈Vhuṱali ha Muṋe washu ndi vhuhulu,

ndi Ramaanḓaoṱhe, ndi Muvhonazwoṱhe.

₁₉Vhane vha mu ofha u a vha vhona,

u ḓivha zwoṱhe zwine muthu a ita.

₂₀Mudzimu ha rumeledzi muthu u nyadza Mudzimu;

ha athu tendela muthu u tshinya.