SIRAKHA 14

₁Mashudu muthu

a sa tshinyi nga mulomo wawe,

a si na tsha u ḓisola tshe a khakha.

₂Mashudu muthu

a sa rovhedzwi nga luvalo lwawe,

a songo vhuyaho a fulufhuwa.

₃Muthu wa vhutshivha

ho ngo fanela u vha na lupfumo,

wa tseḓa a nga ita tshivhuya-ḓe nga thundu?

₄A no kuvhanganya lupfumo nga u ḓidzima

u kuvhanganyela vhaṅwe,

mutsinda a sala a tshi ḓiphiṋa nga thundu yawe.

₅Arali muthu a tshi ḓidzima ene muṋe,

a nga tonda vhaṅwe hani?

Hufha na zwi re zwawe a sa ḓiphiṋi ngazwo.

₆A hu na vhutshivha vhu fhiraho ha u ḓiitela vhutshivha iwe muṋe;

ndi u tou ḓilifhedza.

₇Nangwe a nga ita tshivhuya,

zwi sokou itea-vho a sa zwi ḓivhi;

u fhedza nga u ṱana vhuvhi hawe.

₈Mudziavivho ndi muvhi;

nangwe vhaṅwe vha tshi tambula, ene u tsinya ḽiṱo.

₉Muthu wa tseḓa

ha fushei nga zwi re zwawe;

vhutshivha hawe vhu ḓo mu fheṱa mbilu.

₁₀Wa vhutshivha a no dzima a dzima na ene muṋe,

u u dzima na vhuswa;

vha muṱa wawe na vhone a vha ḽi vha fura.

₁₁ṅwananga, ḓiphiṋe nga zwine wa vha nazwo nga hune wa kona,

hone u si litshe u ṋea Mudzimu nduvho-nduvho.

₁₂Elelwa uri lufu a lu lengi,

a u ḓivhi musi walwo.

₁₃Itela khonani vhuthu u sa athu fa,

mu thakhe nga hune wa kona.

₁₄U songo ḓidzima zwithu zwavhuḓi zwine zwa vha hone zwino;

u songo ponyokwa nga mukovhe wo u fanelaho.

₁₅A u nga ḓo siela vhaṅwe lupfumo lwau,

zwe wa zwi wana nga u shuma zwa sala zwi tshi kovhiwa nga madeṅwa naa?

₁₆ṋea, ṱanganedza, u ḓiphine;

tshaloni a hu tshee na miḓifho.

₁₇Muthu muṅwe na muṅwe u ḓo ṱahala unga nguvho,

mulayo wa kale-kale u ri,

“Tsha muthu ndi u fa.”

₁₈Mirafho ya vhathu i tevhekanaho i nga maṱari a tshiṱaka:

ḽiṅwe ḽi wela fhasi, ḽiṅwe ḽa mela;

mirafho ya vhathu vha ṋama yo tou ralo:

Muthu u a fa, ha bebwa muṅwe.

₁₉Mishumo yoṱhe ya muthu i ḓo sina ya lovha,

na we a zwi shuma u a tevhela.

₂₀Mashudu muthu ane a elekanya zwa vhuṱali,

a amba e na nḓivho,

₂₁mbilu yawe ya elekanya nḓila dza vhuṱali,

a ṱalukanya zwidzumbe zwaho.

₂₂Ndi a no vhu londa unga muzwimi,

a vhu lalela nḓilani.

₂₃U vhu ṱodzimela nga mavhona aho,

a thetshelesa mahothini aho.

₂₄U fhaṱa tsini na nnḓu yaho,

a ombela mbambo dza dennde yawe mutsheṱoni waho.

₂₅U akha dennde yawe tsini naho,

a pfa hu hone havhuḓivhuḓi.

₂₆U vhea vhana vhawe murunzini waho,

a lala fhasi ha matavhi aho.

₂₇Vhu mu pilela ḓuvha,

vhugala haho ha vha haya hawe.