SIRAKHA 16

₁U songo tama

u sokou beba vhana vha sa ḓivhalekani

wa ri, “Tenda vhe vhanzhi!”

U songo takalela vhana vhavhi.

₂Na u anda hávho,

u songo vha takalela arali vha sa ofhi Muṋe washu.

₃U songo ri,

“Tenda vha tshi ḓo lalama”;

u songo ri, “Tenda vhe vhanzhi”.

ṅwana muthihi a nga fhira vha tshigidi;

ndi khwiṋe u fa u si na ṅwana

u fhira u beba vhana vha no nyadza Mudzimu.

₄Muḓi u nga ḓala vhathu nga vhuṱali ha muthu muthihi,

hone wa sala u si na muthu arali lushaka lu sa ofhi Mulayo.

₅Ndo no ḓi vhona zwinzhi zwo raloho,

nda pfa na zwi no fhira izwo.

₆Muḓini wa vhatshinyi hu vhaswa mulilo;

mavhanga a ḓo lifhedzwa nga mulilo.

₇Miswonḓa iḽa ya kale-kale

ye ya pika maanḓa ayo ya vutshela Mudzimu,

ho ngo i hangwela.

₈Vhadzulelani vha Loto ho ngo vha litsha vha tshila,

tshavho o tou vha nengwa nge vha ḓihudza.

₉Vhathu vhe vha livhanywa na u lovha nge vha zuwa vhuvhi havho,

ho ngo vha pfela vhuṱungu.

₁₀Zwi ḓi nga vhanna vhaḽa vhe vha bva Egipita

vhe zwigidi zwa maḓana maṱanu na ḽithihi,

vha vhulahelwa vhukwila havho ha tshipimbi.

₁₁Nangwe ho vha hu na munna muthihi fhedzi wa tshipimbi,

zwo vha zwi tshi nga mangadza arali a songo laṱiswa,

ngauri khathutshelo na mbiti Muṋe washu u nazwo zwoṱhe,

u a hangwela nga maanḓa awe mahulu,

hone vhavhi u shululela mbiti dzawe khavho.

₁₂ṱhamu yawe yo hula u fana na khathutshelo yawe;

u haṱula vhathu a tshi tevhedza zwe muṅwe na muṅwe a ita.

₁₃Mutshinyi a nga si ponyoke na zwe a ṱangula vhaṅwe,

a no ofha Mudzimu a sa fheli mbilu ha sokou konḓelela.

₁₄Muthu a tshi tonda muṅwe Mudzimu ha kundwi u zwi vhona;

u pfufha muṅwe na muṅwe a tshi tevhedza zwe a ita.

₁₇U songo ri,

“Ndi ḓo dzumbama Mudzimu,

makoleni ndi humbulwa nga nnyi?

Ho ḓalesa vhathu, nṋe thi vhonwi,

tsiko a i gumi, huno ndi nṋe nnyi?

₁₈Vhona, lutombo na maṱaḓulu a re nṱha halwo,

ḽifhasi na dindi zwi a tetemela a tshi haṱula.

₁₉Midzi ya dzithavha,

miteo ya ḽifhasi,

a tshi tou hali,

zwi a tetemela zwa dzinginyea.

₂₀Hu ro sa vha na muthu ane a zwi humbula.

Ndi nnyi ane a elekanya zwe Mudzimu a ita?

₂₁Mishumo minzhi ya muthu a i ḓihwi,

u ḓi nga ḓumbu ḽi no tita ḽi sa vhonali.

₂₂Ndi nnyi a no ḓo amba arali o laṱisa vhathu?

Zwi vhonwa nga nnyi?

Hufha mulanga u kule!”

₂₃Ndi yone mihumbulo ya vhathu vha si na ṱhalukanyo.

Ndi matsilu, vho xela, vha dovha vha takalela vhutsilu havho.

₂₄ṅwananga, nthetshelese u ṱalifhe,

thetshelesa zwavhuḓi ndi tshi amba.

₂₅Ndayo yanga

ndi ḓo tou i vhekanya zwavhuḓi,

ndi tshi funza nḓivho i re ngonani.

₂₆Musi Mudzimu a tshi sika zwisikwa zwawe u rangani,

o ri u zwi sika a mbo ḓi zwi vhea fhethu hazwo,

₂₇a dzula o dzudzanya mishumo yawe

ya si tsha shandukiswa lini na lini,

u bva he ya davhuka u ya ho ya.

Zwivhumbwa a zwi pfi nḓala,

a zwi neti,

a zwi ṱutsheli mishumo yazwo.

₂₈A hu na tshe tsha tsitsikana na tshiṅwe,

a zwi vhuyi zwa nyadza ipfi ḽawe.

₂₉Zwo no ralo Muṋe washu a sedza ḽifhasi,

a ḽi ḓadza nga zwivhuya zwawe.

₃₀A ḽi tibedza nga zwi tshilaho zwa tshakha-tshakha;

zwone zwi ḓo dovha zwa vha mavu.