SIRAKHA 13

₁Muthu a no kwama done

u swifhadza tshanḓa tshawe;

a no konana na muthu wa u ḓihudza u ḓo nga ene.

₂U songo hwala muhwalo u no u kunda,

u songo konana na muthu

a no u fhira nga maanḓa kana lupfumo.

Khali ya vumba i nga konana hani na mudzio wa tsimbi?

Zwa kuḓana khali i a pwashea.

₃Mupfumi a khakha u ḓikhoḓa ngazwo;

mushai u a khakhelwa, a humbela khangwelo.

₄Arali mupfumi

a tshi nga kona u u shumisa, u ḓo u ita phuli,

hone musi u si tshee na tshithu, u ḓo u ṱutshela.

₅Arali u na thundu u ḓo konana na iwe,

a vho ḓo u ṱangula zwavhuḓi.

₆Musi a tshi ṱoḓa tshithu tshiṅwe kha iwe u ḓo u fhura,

a sea na iwe uri u mu takalele.

U ḓo amba na iwe nga vhuhwavho a ri,

“Hu na tshine wa lila naa?”

₇U ḓo u nyadzisa zwiḽiwani zwawe,

a u ṱangula a dovha, a ḓi dovha, a fhedza a u sea.

Ngavhuya a tshi u vhona u ḓo sokou fhira,

a u dzungudzela ṱhoho.

₈U vhone u si fhurwe,

vhutsilu hau ha ita uri u nyadziswe.

₉Musi wo vhidzelwa u ṅwata na muḓivhalea,

u nge u a tata;

u ḓo ḓi dovha a u vhidza.

₁₀U songo fhiruludza u sa ḓo sukumedzelwa thungo,

hone u songo ima nga kule u sa ḓo hangwiwa.

₁₁U songo ambesa nae na nga ni dzikhonani,

u songo fulufhedza maipfi awe manzhi;

a tshi ambesa na iwe ndi u u linga fhedzi,

a tshi mwemwela u khou u ṱolola.

₁₂Muthu a no isa phungo u na tshiṱuhu,

u ḓo ḓi u vhaisa a sa u humeli,

a ita na u u hoṋela dzhele.

₁₃U ḓilinde, u vhone:

Khombo yau ndi ludede,

u enda wo kungela.

₁₅Mbiḓi i tshimbila na mbiḓi,

ndau i zwima na ndau,

muthu u pfana na muthu.

₁₆Tshiṋoni tshi fhufha na zwiṋoni,

muthu u konana na a no fana nae.

₁₇ṱalerwa ḽi a konana na ngwana naa?

Muvhi a nga anḓana na a no ofha Mudzimu naa?

₁₈Phele na mmbwa zwi nga tshila nga mulalo naa?

Mupfumi na mushai vha nga tshilisana nga mulalo naa?

₁₉Vhashai vha ḽiwa nga vhapfumi

u ḓi nga ndau i tshi zwima mbiḓi phangani.

₂₀Wa u ḓihudza u nengwa zwa u ḓiṱukufhadza,

zwi ḓi nga mupfumi a tshi nengwa mushai.

₂₁Mupfumi a tshi khukhulwa u tikwa nga khonani;

mushai a tshi wa khonani dzi mu sukumedzela kule.

₂₂Musi mupfumi a tshi khakha nga lulimi

u vha na vhatikedzi vhanzhi,

naho a amba zwo bvaho nḓilani, u a pembelelwa.

Musi lulimi lwa mushai lu tshi suvha vha a mu sola,

naho a amba zwi pfalaho, ha thetsheleswi.

₂₃Mupfumi a tshi amba vhoṱhe vha a fhumula,

vha lidza mifhululu ya swika makoleni.

Mushai a tshi amba vha ri,

“Ndi nnyi onoyo?”

Arali a redzemuwa vha a mu tsimbeledza.

₂₄Lupfumo ndi lwavhuḓi

arali hu si na vhuvhi nga ngomu,

hone vha u nyadza Mudzimu

vha vhona vhushai vhu vhuvhi.

₂₅Tshifhaṱuwo tsha muthu

ndi tshivhoni tsha mbilu yawe;

tshi sumbedza dakalo kana u ṱungufhala.

₂₆Mbilu ya takala,

na tshifhaṱuwo tshi a takala,

hone u sika mirero zwi a u netisa.