BARUKHU 2

₁“Zwino Muṋe washu o ita zwe a amba a tshi ri kaidza: o laṱisa vharangaphanḓa vhashu vhe vha vhusa Israele na mahosi ashu na vhavhusi vhashu na vhathu vha Israele na Juda. ₂Fhasi ha lutombo lwoṱhe a hu athu vhuya ha itwa zwi no nga zwe a ita muḓini wa Jerusalema, ho itea zwe zwa ṅwalwa mulayoni wa Mushe: ₃Vhaṅwe vhashu vho ita na u ḽa ṋama ya vharwa vhavho kana ya vhananyana vhavho. ₄O ita na uri ri kundwe nga mivhuso yoṱhe yo ri tangaho, ri nyadziwe, ri vhe samba kha tshakha dzoṱhe dzo ri tangaho he Muṋe washu a ri balanganyela khadzo. ₅A ro ngo tsha luvhisa vhaṅwe, ho vho luvhiswa riṋe ra itwa dziphuli, nge ra khakhela Mudzimu Muṋe washu nga u sa pfa a tshi amba na riṋe.

₆“Mudzimu Muṋe washu u ita zwi re zwone, hone riṋe ro shona na ṋamusi u ḓi nga vhokotsi ashu. ₇Khombo dzoṱhe dze Muṋe washu a ri kaidzela dzone dzo ri wela. ₈Nangwe zwo ralo, a ro ngo ḓisola phanḓa ha Muṋe washu, roṱhe a ro ngo laṱa mihumbulo ya mbilu dzashu mmbi, ₉ndi zwe Muṋe washu a elelwa vhutshinyi hashu a ri livhanya na khombo, ngauri a hu na he Muṋe washu a khakha kha zwoṱhe zwe a ri ri zwi ite. ₁₀Hone riṋe a ro ngo thetshelesa a tshi ri laya, a ro ngo tevhedza ndayo dze Muṋe washu a ri vhetshela dzone.”

₁₁“Zwino, Muṋe washu, Mudzimu wa Israele, wo endedza vhathu vhau vha tshi pfuluwa shangoni ḽa Egipita nga tshanḓa tshau tsha maanḓa na zwiga na zwimangadzo na maanḓa mahulu, wo imisa tshanḓa tshau, dzina ḽau ḽa ḓivhiwa na ṋamusi. ₁₂Hone riṋe ro tshinya, ro nyadza zwikhethwa, ro pfuka ndayo dzau dzoṱhe, Iwe Mudzimu Muṋe washu. ₁₃Mbiti dzau nga dzi ri humele; ro sala ri si gathi kha tshakha dze wa ri balanganyela khadzo. ₁₄Yawee Muṋe washu, thetshelesa thabelo na tshililo tshashu, u ri lamulele u tshi itela Iwe muṋe. Ita uri vho ri thubaho vha dovhe vha ri takalele, ₁₅uri ḽifhasi ḽoṱhe ḽi ḓivhe uri Iwe u Mudzimu Muṋe washu, vhunga Israele na vha lutsinga lwawe vha tshi vhidzwa nga dzina ḽau.

₁₆“Yawee Muṋe washu, sedza fhasi u vhudzuloni hau vhukhethwa, u ri humbule. Sendedza nḓevhe yau u ri pfe. ₁₇Yawee Muṋe washu, ri sedze u vhone. Hufha vhafu vha re dindini vha si tsha femaho vha sa koni u renda Iwe Muṋe washu vha ḓivhadza vhuvhuya hau; ₁₈muthu o ziamedzwaho nga vhuṱungu, a no tshimbila o kotama a tshi shaya nungo, o kovhedzaho maṱo, a na muya u no pfa nḓala, ndi ene ane a ḓo ḓivhadza vhugala na vhuvhuya hau Muṋe washu!

₁₉“Mudzimu Muṋe washu, ri tshi swikisa tshililo tshashu tsha u humbela u khathutshelwa, a ri ḓitiki nga mishumo mivhuya ya vhokhotsi ashu na mahosi ashu. ₂₀Wo ri shululela mbiti dzau na vhuhali hau, sa zwe wa ḓivhadza nga vhaporofita vhaḓinḓa vhau u tshi ri, ₂₁‘Muṋe wa zwoṱhe u ri: Kotamisani mitsinga yaṋu ni shumele khosi ya Babilonia, ndi hone ni tshi ḓo dzula shangoni ḽe nda ṋea vhokotsi aṋu. ₂₂Arali na si thetshelese ipfi ḽa Muṋe wa zwoṱhe na hana u shumela khosi ya Babilonia, ₂₃ndi ḓo ita uri miḓini ya Juda na mikotoni ya Jerusalema hu si tsha pembelwa, hu si tsha pfala maipfi a dakalo, hu si tsha pfala ipfi ḽa mukwasha na ḽa muselwa; shango ḽoṱhe ḽi ḓo vha soga ḽa si dzule vhathu.’

₂₄“Hone ro konyolela matanda nḓevheni u tshi amba na riṋe, ra hana u luvha khosi ya Babilonia, Iwe wa khunyeledza zwe wa ri kaidza nga milomo ya vhaporofita vhaḓinḓa vhau, u tshi ri marambo a mahosi ashu na marambo a vhokotsi ashu a ḓo bwelulwa a bviswa he vha swiṱwa hone. ₂₅Vhukumakuma o fukulwa a bviswa a swa nga ḓuvha, a welwa nga mahaḓa a vhusiku. Vho fa lu ṱungufhadzaho nga nḓala khulu na nga pfumo na nga dwadze. ₂₆Huno nnḓu ine ya vhidzwa nga dzina ḽau wo i fhungudza ya vha zwine ya vha zwone ṋamusi, nga mulandu wa vhuvhi ha muvhuso wa Israele na muvhuso wa Juda.”

₂₇“Nangwe zwo ralo, Iwe Mudzimu Muṋe washu, wo ri itela vhuthu vhuhulu, wa ri khathutshela zwihulu. ₂₈Izwo wo zwi amba nga mulomo wa Mushe muḓinḓa wau musi we wa mu laya uri a ṅwale mulayo wau zwi tshi vhonwa nga Vhaisraele, wa ri, ₂₉‘Arali na si thetshelese zwine nda amba, vhukumakuma gogo iḽi ḽihulu ḽi ḓo fhungudzea vhukati ha dzitshakha hune nda ḓo vha balanganyela hone, ha sala vha si gathi, ₃₀ngauri ndi a ḓivha uri ndi vhathu vha tshipimbi, a vha nga nthetshelesi. Hone vhe shangoni ḽe vha thubelwa khaḽo vha ḓo shandukisa mbilu dzavho, ₃₁vha tenda uri ndi Nṋe Muṋe wa zwoṱhe Mudzimu wavho. Ndi ḓo vha ṋea mbilu dzi thetshelesaho na nḓevhe dzi pfaho, ₃₂vha ḓo nthenda vhe shangoni ḽe vha thubelwa khaḽo, vha elelwa dzina ḽanga. ₃₃Ndi hone vha tshi ḓo laṱa tshipimbi na zwiito zwavho zwivhi, ngauri vha ḓo elelwa zwo welaho vhokotsi avho vhe vha khakhela Muṋe wa zwoṱhe. ₃₄Huno ndi ḓo vha vhuedzedza shangoni ḽe nda fulufhedzisa vhokotsi avho Abrahamu na Isaka na Jakopo nga muano, ndi ḓo ita uri vha ḽi vhuse. Ndi ḓo vha andisa, zwenezwo a vha tsha ḓo fhungudzea. ₃₅Ndi ḓo vhofha navho mulanga wa lini na lini, nda vha Mudzimu wavho, vhone vha vha vhathu vhanga; a thi tsha ḓo dovha nda sudzulusa vhathu vhanga Vhaisraele shangoni ḽe nda vha ṋea.’ ”