2 JOHANISI 1

₁Ndi nṋe mulisa wa tshivhidzo.

Ndi ṅwalela mufumakadzi a huliseaho, o nangwaho nga Mudzimu, khathihi na vhana vhawe. Ndi ni funela ngoho, hone hu si nṋe fhedzi, na vhaṅwe vhoṱhe vhe vha kona u ḓivha ngoho vha a ni funa, ₂ngauri ri na ngoho ya Mudzimu mbiluni dzashu, nahone i ḓo ḓi dzula mbiluni dzashu lini na lini.

₃Mudzimu Khotsi, na Yesu Khristo Murwa wa Khotsi, vha ḓo ri itela vhuthu na tshilidzi ra vha na mulalo, hezwi ri tshi tshila ri ngohoni ri na lufuno.

₄Ndo takala hani ndi tshi ṱangana na vhaṅwe vhana vhavho nda wana vha tshee vho ima ngohoni, vha sa hangwi ndaela ye ra fhiwa nga Khotsi. ₅Zwino mukegulu, ndo vha ndi na khumbelo ndi ri: Riṋe vhatendi ri fanela u dzula ri tshi funana. Ndi tshi ṅwala nga u ralo a si uri ndi khou vha ṋea ndaela ntswa, ndi ye ra vha ri nayo u bva mathomoni. ₆Lufuno zwino ndi mini? Lufuno ndi u tshila nga u tevhedza ndaela dza Mudzimu. Ndaela yawe ndi uri ri tshile nga u funana. Ndi zwone zwe na vhudzwa u bva henengei mathomoni.

₇Ndi tshi ralo ndi uri ho bvelela vhadzia-u-xedza-vhathu fhano shangoni, nahone ndi vhanzhi. Vhenevho ndi vhane vha ṱanziela uri Yesu Khristo ho ngo vha muthu. Ndi vhenevho vhane nda vha amba ndi tshi ri, “ndi vhadzia-u-xedza-vhathu” na “vhavhangisakhristo”. ₈Ni vhone ni sa ḓo xedza zwe ra zwi shumela, ndi hone ni tshi ḓo wana pfufho yaṋu yoṱhe. ₉Ane a fhufhela phanḓa, a engedzedza, a si dzule kha zwe a funzwa nga zwa Khristo, onoyo ha na Mudzimu, hone ane a dzula kha zwe a funzwa u na Khotsi khathihi na Murwa.

₁₀Arali ha swika muṅwe mufunzi ha inwi a sa funzi zwenezwo, ni songo mu swielela nḓuni dzaṋu, na u mu resha ni songo mu resha, ₁₁ngauri ane a vhuya a mu resha o no vha na mukovhe kha vhuvhi ha onoyo muthu.

₁₂Naho ndi tshi kha ḓi vha na manzhi ane nda ṱoḓa u ni vhudza ndi vhona uri ndi khwiṋe ndi sa tou a ṅwala. Ndi fulufhela uri ndi ḓo tou ḓa ra amba ro livhana. Ndi hone dakalo ḽashu ḽi tshi ḓo tou fhufhuma.

₁₃Vhana vha murathu wavho uyu o nangiwaho-vho nga Mudzimu vha ri vha vhe hone.