3 JOHANISI 1

₁Ndi nṋe mulisa wa tshivhidzo.

Ndi ṅwalela inwi Gayosi khonani yanga ane nda ni funela ngoho.

₂Khonani yanga, ndi rabela uri ni vuwe zwavhuḓi ni takale tshoṱhe unga muya waṋu wo takala. ₃Ndi takala hani hu tshi ita hu tshi ḓa vha hashu vha tshi ṱanziela u fulufhedzea haṋu vha tshi amba uri no ima hani ngohoni. ₄Tshi nthudzaho mbilu u fhira zwoṱhe ndi u pfa uri vhana vhanga vho ima ngohoni.

₅Ndi zwone khonani, ni ita zwone ni tshi tonda vhatendi nga riṋe nga u ralo. Tshine tsha takadzesa ndi uri na u vha ḓivha no vha ni sa vha ḓivhi hezwi ni tshi vha tonda. ₆Vhone vhaṋe vho ṱanziela lufuno lwaṋu phanḓa ha tshino tshivhidzo. Zwino ro vha ri tshi humbela uri ni dovhe ni vha farise nga zwa lwendo nga nḓila yo fanelaho vhaḓinḓa vha Mudzimu, ₇ngauri tshe vha bvela tshone ndi u yo ḓivhadza Yesu Khristo fhedzi, zwenezwo a vha ṱanganedzi tshithu kha vhannḓa. ₈Zwenezwo-ha riṋe ri fanela u vhavhalela vhathu vho raloho, ndi hone ri tshi ḓo vha-vho ro longa tshanḓa kha u anḓadza ngoho.

₉Ndo no ḓi ṅwalela tshivhidzo, hone Diotrefesi ha ṱanganedzi zwine ra amba ngauri u funa u vha ene muhulwane. ₁₀Hone musi ndi tshi ḓa nga tsha vhukoma ndi ḓo mu sengisa zwine a ita a tshi sokou ri pomoka zwithu zwivhi. Zwi si hezwo fhedzi: na musi Vhakhriste vha tshi ḓa henengeo ha vha ṱanganedzi, a dovha a dzivhisa na vhaṅwe u vha ṱanganedza, vhane vha ralo a vha thatha na tshivhidzoni.

₁₁Khonani yanga, ni songo edzisa zwo vhifhaho, edzisani zwivhuya. Ane a ita zwivhuya ndi wa Mudzimu. A itaho zwo vhifhaho ha athu vhuya a vhona Mudzimu.

₁₂Dimitriosi ene vhathu vhoṱhe vha mu amba zwavhuḓi; na ngoho yone iṋe i ṱanziela nga u ralo. Na riṋe ri ḓadzisa nga vhuṱanzi hashu. Hufha ni tshi ḓivha uri zwine ra amba ndi ngoho.

₁₃Ndi kha ḓi vha na manzhi ane nda ṱoḓa u ni vhudza, hone ndi vhona uri ndi khwiṋe uri ndi sa tou a ṅwala. ₁₄Ndi fulufhela uri ndi ḓo ḓa hu si kale ra ḓo konou amba ro livhana.

₁₅Kha u vhe mulalo!

Khonani dzashu ngeno dzi ri ni vhe hone. Khonani dzoṱhe ngeo dzi vhe hone nga muthihi nga muthihi.