1 JOHANISI 5

₁Ane a tenda uri Yesu ndi Mesia, onoyo o bebwa nga Mudzimu; huno ane a funa Mudzimu o mu bebaho, tshawe ndi u funa na vhaṅwe vho bebwaho nga Khotsi onoyo muthihi. ₂Zwenezwo arali ri tshi funa Mudzimu ra tevhedza ndaela dzawe, na vhana vhawe ri a vha funa. ₃U funa Mudzimu zwi amba u tevhedza ndaela dzawe; nahone ndaela dzawe a dzi konḓi, ₄hufha o bebwaho nga Mudzimu a tshi kunda zwa shango. Tshine ra kunda ngatsho ndi lutendo lwashu. ₅Ndi nnyi-ha ane a kona u kunda shango? A si onoyo fhedzi ane a tenda uri Yesu ndi Murwa wa Mudzimu naa?

₆We a tshi ḓa a fhira nga maḓini na malofhani ndi Yesu Khristo. Ho ngo fhira nga maḓini fhedzi, o dovha a fhira na nga malofhani. Ane a zwi ṱanziela ndi Muya, ngauri Muya ndi Ene ngoho. ₇Zwenezwo hu na ṱhanzi tharu: ₈ndi Muya Mukhethwa na maḓi na malofha, huno dzoṱhe vhuraru hadzo dzi ṱanzilela zwithihi. ₉Arali ri tshi ṱanganedza vhuṱanzi ha vhathu, ha Mudzimu a vhu pfali u fhira ha vhathu naa? Ndi tshi ralo ndi uri ane a ṱanziela ndi Mudzimu Ene muṋe, a tshi ṱanziela Murwa wawe. ₁₀Ane a fulufhela Murwa wa Mudzimu u pfa vhuṱanzi honoho mbiluni yawe. A sa tendi Mudzimu izwo u ri Mudzimu u a zwifha; hufha a songo tenda vhuṱanzi he Mudzimu a ṱanziela nga Murwa wawe Ene muṋe. ₁₁Huno vhuṱanzi uho ndi ha uri Mudzimu o ri ṋea vhutshilo vhu sa gumi, ri vhu wana nga Murwa wawe. ₁₂A na Murwa u na vhutshilo; a si na Murwa wa Mudzimu ha na vhutshilo.

₁₃Luṅwalo ulu ndi khou ni ṅwalela uri ni kone u ḓivha uri ni na vhutshilo vhu sa gumi – ndi amba inwi ni fulufhelaho Murwa wa Mudzimu.

₁₄Ndi hone ri tshi vho kona u rabela ro fulufhela tshoṱhe uri na tshifhio tshine ra mu humbela tshine tsha anḓana na zwine a funa, u a ri ṋea. ₁₅Huno arali ri tshi ḓivha uri u pfa zwoṱhe zwine ra humbela, ri ḓivha na uri zwe ra mu humbela ro no zwi ṋewa.

₁₆Arali wa vhona mutendi nga iwe a tshi tshinya, hone vhu si vhutshinyi ha u tou mu isa lufuni, mu rabelele, Mudzimu u ḓo mu ṋea vhutshilo. Afha ndi khou amba a songo tshinyaho lwa u isa lufuni. Hafhu hu na u tshinya ha u isa lufuni. Henefho a thi khou ri u mu rabelele. ₁₇Vhuvhi hoṱhe ndi u tshinya, hone hu ḓi vha na u tshinya ha u sa tou isa lufuni.

₁₈Ri a ḓivha uri o bebwaho nga Mudzimu ha endeli u tshinya; Murwa wa Mudzimu u ḓi mu tsireledza uri Muvhi a si mu kone. ₁₉Riṋe ri ḓivha uri ri vha Mudzimu na uri shango ḽoṱhe ḽo thubiwa nga Muvhi. ₂₀Hone ri dovha ra ḓivha uri Murwa wa Mudzimu o ḓa shangoni, huno Ene o ri ṋea ṱhalukanyo ya u ṱalukanya Mudzimu wa ngoho. Zwenezwo ro no vha vhathihi na Mudzimu wa ngoho na Murwa wawe Yesu Khristo. Ene ndi Ene Mudzimu wa ngoho, ndi Ene a no ri fha vhutshilo vhu sa gumi.

₂₁Vhananga, ilani zwa midzimu nandi!