1 JOHANISI 4

₁Vhafunwa, ni songo sokou tenda muṅwe na muṅwe ane a ri u na Muya wa Mudzimu; thomani u sedza ni vhone arali mimuya iyo i tshi bva ha Mudzimu. Ḓivhani uri vhaporofita vha khole-khole ndi vhanzhi, vho no ṱanganya shango. ₂Zwine na ḓo ṱalukanya ngazwo Muya wa Mudzimu ngezwi: muṅwe na muṅwe ane a tenda uri Yesu Khristo o vha muthu wa ṋama, u na Muya wa Mudzimu. ₃Ane a si tende Yesu nga u ralo ha na Muya wa Mudzimu; muya une a vha nawo ndi wa Muvhangisakhristo. A thi ri no pfa hu tshi pfi Muvhangisakhristo u ḓo ḓa? Nazwino o no ḓi vha hone fhano shangoni.

₄Hone inwi vhananga ni vha Mudzimu. No no ḓi kunda vhaporofita vha khole-khole ngauri Mudzimu u na inwi; u na maanḓa a no fhira a Muvhi a re kha vha shango ḽino. ₅Vhone ndi vha shango, na zwine vha amba ndi zwa shango; ndi zwine shango ḽa vha pfa ngazwo. ₆Riṋe ri vha Mudzimu; ane a ḓivha Mudzimu u a ri thetshelesa. A si wa Mudzimu ha ri thetshelesi. Ndi zwone zwine ra kona u ṱalukanya ngazwo Muya wa ngoho na wa vhufhura.

₇Vhafunwa, kha ri funane, ngauri lufuno lu bva ha Mudzimu; a re na lufuno o bebwa nga Mudzimu, u ḓivha Mudzimu. ₈A si na lufuno ha ḓivhi Mudzimu, ngauri Mudzimu ndi lufuno. ₉Zwe Mudzimu a ri dzumbululela lufuno lwawe ngazwo asizwi: o ruma Murwa wawe muthihi fhedzi fhano shangoni uri riṋe ri wane vhutshilo ngae. ₁₀Lufunofuno a si lwashu lwa u funa Mudzimu, ndi lwa Mudzimu lwa u funa riṋe, a vhuya a tou ruma Murwa wawe u ri pfumelela vhutshinyi hashu.

₁₁Vhafunwa, arali Mudzimu o ri funa zwingafhongafho, riṋe a si pfanelo ri tshi funana-vho naa? ₁₂A hu na we a vhuya a vhona Mudzimu, hone arali ri tshi funana, ndi hone Mudzimu a tshi dzula na riṋe, lufuno lwawe lwa vhonala nga vhuḓalo kha riṋe.

₁₃Asizwi zwine ra ḓivha ngazwo uri ri dzula ri vhathihi nae na uri Ene u na riṋe: o ri kovhela Muya wawe. ₁₄Khotsi o ruma Murwa wawe u tshidza shango; ri ṱhanzi dzazwo, ro zwi vhona nga ashu maṱo. ₁₅Ane a ṱanziela uri Yesu ndi Murwa wa Mudzimu, onoyo, Mudzimu u dzula nae, na ene u dzula e muthihi na Mudzimu. ₁₆Riṋe vhaṋe ri ḓivha uri Mudzimu u a ri funa, ra zwi tenda.

Mudzimu ndi lufuno; ane a dzula e na lufuno u dzula e na vhukonani na Mudzimu, na Mudzimu e na vhukonani nae. ₁₇A ri tsha ḓo ofha tshithu nga ḓuvha ḽa khaṱhulo, ngauri ri vho tshila nga lufuno fhano shangoni unga na Yesu a tshi tshila nga lufuno. Ndi lwone lufuno lwo khunyelelaho. ₁₈A na lufuno ha tshee na nyofho; lufuno lwo khunyelelaho lu thatha nyofho; ndi zwine nda ri arali muthu a tshi kha ḓi ofha, lufuno lwawe a lu athu khunyelela ngauri u kha ḓi humbula ṱhamu. ₁₉Hafhu ri tshi funa vhaṅwe ndi nge Mudzimu a vha Ene we a thoma u ri funa. ₂₀Ane a ri, “Ndi funa Mudzimu,” ngeno a tshi vhenga mutendi ngae, onoyo ndi mudzia-u-zwifha. Arali a sa funi mutendi ngae ane a kona u mu vhona nga maṱo, u ḓo funa hani Mudzimu a sa mu vhoni nga maṱo? ₂₁Ndaela ye Khristo a ri siela i ri: ane a funa Mudzimu nga a fune na mutendi ngae.