Rafaele
1E rile moletlo o fedile, Tobite a bitsa morwawe Tobiase a re, “O tšhwanetse gore O ko O akanye kaga go duela mopati wa gago, selekanyo se se mo tšhwanetseng, O mo duele go feta jaaka go ne go dumalanywe.”
2A fetola a re, “Rra, ke tšhwanetse gore ke mo duelele thuso ya gagwe bokaee? Le fa ke ka mo neela mhama o mongwe wa dilo tse a tsileng natso le nna, ke tla bo ke sa latlhegelwa ke sepe. 3O mpuseditse kwa go wena ke bolokesegile ke itekanetse sentle, o alafile mosadi wa me; madi le one o a tsisitse, le wena o go alafile. Jaanong ke tla mo duelela dilo tse tsotlhe bokaee?”
4Tobite a re, “O tšhwanelwa sentle fela ke mhama o mongwe wa tse a di tsisitseng.”
5Ke fa Tobiase a bitsa mopati wa gagwe a re, “A ko O tseye mhama wa tse O di tsisitseng, e nne yone tuelo e O duelelwang ka yone tsotlhe tse O di dirileng, tsamaya ka kagiso.”
6Ke fa Rafaele a ba tseela fa thoko boobabedi a re, “Bakang Modimo, o bakeng fa pele ga ditshedi tsotlhe, lo o bakeleng dithuso tsotlhe tse o di lo diretseng. Bakang lo bo lo godiseng leina ja one. Bolelang ditiro tsa Modimo phatlalatsa fa pele ga batho botlhe jaaka di tšhwanelwa, lo se ka lwa lapisiwa ke go o leboga. 7Go loba sephiri sa kgosi go siame, fela go senola le go phatlalatsa ditiro tsa Modimo go siame. Lo o lebogeng ka tšhwanelo. Dirang se se siameng, mme ga go na bosula bope jo bo ka lo diragalelang. 8Thapelo e e nang le go itima dijo le dikatso tse di nang le boitšhwaro jo bontle di botoka go na le dikhumo tse di tletseng boleo. Go botoka go ntsha dikatso go na le go kgobokanya gouda. 9Go ntsha dikatso go falodisa loso, e bile go phimola mohuta mongwe le mongwe wa sebe. Ba ba ntshang dikatso ba tlhola ba kgotshe; 10ba ba dirang sebe le bosula, ba ikutlwisa botlhoko.
11“Ke tsile go lo bolelela boammaruri jotlhe, ke sa lo lobele sepe. Ke setse ke lo boleletse gore go loba sephiri sa kgosi go siame, fela go senola ditiro tsa Modimo ka mokgwa o o tšhwanelang le gone go siame. 12Jalo he, O tšhwanetse go itse gore e rile fa wena le Sara lo ntse lo rapela, e ne e le nna yo ke neng ke ntse ke isa dikopo tsa lona fa pele ga kgalalelo ya Morena, ke di bala; le fa O ntse O fitlha bašwi. 13Fa O ne O ntse O sa belaele le go belaela tota go ema O tlogela dijo tsa gago go ya go fitlha monna yo o tlhokafetseng, ke ne ke rometšwe go tla go leka tumelo ya gago, 14mme le gone Modimo o nthometse go tla go go alafa le go alafa ngwetsi ya gago, Sara. 15Ke nna Rafaele, mongwe wa baengele ba ba supileng ba ba agang ba ipaakanyeditse go tsena mo kgalalelong ya Morena.”
16Boobabedi ba tshoga thatathata fela; mme ba wela fa fatshe ka difatlhogo, ba tshogile go feta selekanyo. 17Fela moengele a re, “Se boifeng, a kagiso e nne mo go lona. Bakang Modimo ka bosafeleng. 18Fa e le nna, fa ke ne ke ntse ke na le lona, go nna ga me le lona go ne go sa dirwa ke nna, go ne go dirilwe ke go rata ga Modimo; ke one o lo tšhwanetseng go o baka malatsi otlhe a botshelo jwa lona, ke one o lo tshwanetseng go o boka. 19Lo itheile lwa re lo mponye ke ja, fela seo e ne e le ponalo fela, e ne e se sepe go feta moo. 20Jaanong bakang Morena mo lefatsheng mme lo lebogeng Modimo. Ke tlaa tloga ke boela kwa go One o o kwa godimo o o neng o nthomile. Lo kwaleng tsotlhe tse di diragetseng.” A bo a tlhatloga a tsena mo moyeng.
21E rile fa ba ema gape, a bo a sa tlhole a bonala. Ba baka Modimo ka difela; ba mo lebogela go dira dikgakgamatso tse di ntseng jaana; a ba ne ba sa bona moengele wa Modimo?
