Tobiase o Bona Gape
1Ke fa ba atamela Kaserine, go lebagana le Ninefe, 2fa Rafaele a re, “O itse mathata a re tlogetseng rrago a le mo go one; 3a re tsamaele pele, re sie mosadi wa gago, re ye go baakanya ntlo ka borona, le ene a ntse a setse morago le ba bangwe.” 4Ba tsamaela pele mmogo (Rafaele a tlhagisitse Tobiase go tla le santlhoko) mme ntša ya ba sala morago.
5Anna o ne a ntse fa fatshe, a lebeletse tsela e ngwana wa gagwe o neng a tlaa tla ka yone. 6O ne a tlhomamisa ka bonakonako fela gore e tšhwanetse e be e le ene mme a raya rraagwe a re, “Ngwana wa gago ke yo o etla yo, o na le mopati wa gagwe.”
7Ya re Rafaele a ise a fitlhe kwa go rraagwe Tobiase, a raya Tobiase a re, “Ke go tlhomamisetsa gore matlho a ga rrago a tla buduloga. 8O tšhwanetse go tshasa rrago mo matlhong ka santlhoko wa tlhapi; molemo o o tlaa mo utlwisa botlhoko mme o tlaa kgomarolola letlalonyana le lesesanyane le lešweu mo matlhong a gagwe. Mme rrago o tlaa kgona go bona le go leba lesedi.”
9Mmaagwe a tabogela kwa go morwawe mme a feta a mo tlamparela. A re, “Jaanong nka nna ka swa, ke go bonye gape.” Mme a lela.
10Tobite a ema ka dinao, a kgokgowetsaga, a kgabaganya lelapa, a tšwa ka kgoro. Tobiase a tla a lebaganye nae, 11(a tshotse santlhoko wa tlhapi ka letsogo.) A budulela moya mo matlhong a gagwe, a mo nametsa a re, “Nametsega, rra.” A bo a tshasa molemo, a o tlogela foo nakonyana, 12ke fa e re ka diatla tsa gagwe tsoopedi a obola letlalonyana le lesesanyane mo dithakeng tsa matlho a gagwe. 13Rraagwe ke fa a mo tlamparela 14a lela. A goa a re, “Nka bona ngwanake, lesedi la matlho a me!” A bo a re,
“A go bakwe Modimo!
A go bakwe leina le legolo la one!
A go bakwe baengele botlhe ba one ba ba boitshepo!
A go bakwe leina le legolo la one ka bosafeleng!
15Gonne o ne wa nkgwathisa
fela jaanong o nkutlwetse botlhoko
mme ke bona ngwanake Tobiase.”
Tobiase a tsena mo tlung, mme ka lentswe le le utlwalang a baka Modimo ka boitumelo. Ke fa a bolelela rraagwe sengwe le sengwe: jaaka loeto lwa bone lo tšweletse-pele ka mokgwa o o itumedisang le gore o tsile le selefera; jaaka a nyetse Sara, morwadia Raguele; jaaka a ne tla a mo setse morago ka yone nako eo, a le gautšhwane, mme a sa tlhole a ka bo a le kgakala le dikgoro tsa Ninefe.
16Tobite a ya kwa dikgorong tsa Ninefe go ya go kgatlhantsha ngwetsi ya gagwe, a tsamaya a ntse a baka Modimo ka boitumelo. E rile batho ba Ninefe ba mmona a tsamaya go se na ope yo o mo gogang mme a tsamaya ka mosepele jaaka pele, ba gakgamala thata. 17Tobite a ba tlhalosetsa ka mo Modimo o neng wa mo utlwela botlhoko ka teng mme wa mmudulola matlho. Ke fa Tobite a kgatlhana le Sara mosadi wa ga morwawe, Tobiase, a bo a mo tshegofatsa ka mafoko a, “Re go amogela ka pula, morwadiaka! A go bakwe Modimo wa gago o o go re romeletseng, morwadiaka. A ditshegofatso di wele fa godimo ga ga rrago, a ditshegofatso di wele fa godimo ga morwaake Tobiase, a ditshegofatso di wele fa godimo ga gago, morwadiaka. Re go amogelela mo tlung e e leng ya gago ka pula, ka boitumelo le tshegofalo. Tsena, morwadiaka.” A tshegetsa moletlo tsatsing leo, o o neng wa jewa ke Bajuta botlhe ba Ninefe, 18mme bontsalae Bo-Ahikare le Nadabe ba tla go itumela le Tobite.
