ESETHERE (SEGERIKA) 15

₁Jalo he, Moredekai o ne a mo laetsa go ya go kopa go bua le Kgosi gore a tle a buelele batho ba ga gabo le lefatshe la ga gabo.

₂A re, “Gakologelwa malatsi a bobotlana jwa gago, jaaka ke ne ke go tlhokomela. Gonne, Hamane, yo o rulaganang le kgosi, o buile dilo kgatlhanong le rona tse di tlaa re bolayang. ₃Ke gone he, kopa thuso ya Morena mme O re buelele le kgosi, O re namole mo losong.”

₄Mo letsatsing la boraro, fa a sena go rapela, Esethere o ne a apola diaparo tsa khutsafalo tse a neng a ntse a obamela ka tsone, a apara tsa mokgabo.

₅Ya re a le montle jalo, a bitsa Modimo o o lebelelang batho botlhe o bo o ba boloka. A tsamaya le malata a le mabedi a gagwe. ₆Ka mokgwa o o bonolo a ikaega ka yo mongwe, ₇fa yo mongwe ene a ne a mo setse morago a tsholeditse maburabura a diaparo tsa gagwe ka kwa morago. ₈O ne a galalela ka bontle jo bo feleletseng, a lebega a itumetse, ekete motho yo o rategang, fela pelo ya gagwe e gatsetse ke poifo.

₉Ya re a sena go feta dikgoro tsotlhe, a ema fa pele ga kgosi. E ne e ntse setilo sa yone sa bogosi, e feleletse ka diaparo tsa segosi tsa mokgabo, di gomilwe ka gouta le majana a mantlentle a tlhwa-tlhwa e e kwa godimo. E boitshega thata fela.

₁₀Ya re fa e tlhatlosa matlho, sefatlhogo sa yone se phatsima bontle, ya mo leba ka kgalefo e e mašwe thata. Mohumagadi a thetheekela, a fetoga mmala a nna mosetlha, a robega ditokololo, mme a idibala a ikaegile tlhogo ka lelata le o neng a tsamaya le lone.

₁₁Ke fa Modimo o fetola pelo ya kgosi, o e dira bonolo, mme ya re mo letshogong la yone ya tlola mo setilong sa yone sa bogosi, ya atlarela mohumagadi, ya mo tshola jalo go fitlhelela a thathamologelwa. Ya mo gomotsa ka mafoko a a monate, mme ya mo raya ya re, ₁₂“Ke eng, Esethere? Ke kgaitsadio. Se boife. ₁₃Ga O kitla O šwa, gonne molao wa rona o diretšwe batho ba bangwe fela. Tlaa kwano!”

₁₄Ke fa e tsholetsa thobane ya yone ya segosi ya gouta e ama molala wa gagwe ka yone.

₁₅Ya mo tlamparela, ya re, “Mpuisa!”

₁₆Ene a bo a mo raya a re, “Morena wa me, ke go bonye O tšhwana le moengele wa Modimo, mme pelo ya me ya garoga ke poifo fa ke bona kgalalelo ya gago. ₁₇Gonne O a gakgamatsa, morena wa me, mme sefatlhogo sa gago se sentle tota.”

₁₈Fela, ya re a ntse a bua jaana, a nyerologa.

₁₉Kgosi ya bo e tshoga e tetesela, mme batlhanka botlhe ba yone ba leka go e gomotsa.