Taelo Ya Bobedi Ya Kgosi
1Mafoko a lokwalo a ne a tsamaya jaana “Kgosi e Kgolo Ahasewerose o kwalela balaodi ba dikgaolo tse di 127 tse di ikadileng go tšwa India go ya Ethiopia, le botlhe ba ba ka fa tlase ga mmuso wa rona; Madume.
2“Batho ba le bantsi ba ba tlotlwang gantsi ke bopelo jo bo feteletseng jwa babadiredimolemo, bone ba a tle ba etegele mo boikgantshong jwa bone.
3“Ga ba bone go lekanye go utlwisa batho ba rona botlhoko. Mme e a re ba palelwa ke go sikara bokete jwa letlepu la bone ba bo ba simolola go rukhutlhela le bone babadiredimolemo tota.
4“Ga ba itumedisiwe fela ke go leleka tebogo mo dipelong tsa batho. Fela, e a re ba gogomositšwe ke maipoko a batho ba ba sa itseng gore bomolemo keng ba bo ba ithaya ba re ba ka falola tshiamo e e tlhoileng bosula ya Modimo o o tlholang o bona sengwe le sengwe.
5“Ka mokgwa o o ntseng jalo, go tle go diragalele ba ba busang gore e re ba dumeletse ditsala tsa bone go tsamaisa ditiragalo tsa semmuso, mme ba dumelela go laolwa maikutlo ke tsone ditsala tse, ba iphitlhele ba tlhakanela natso go bolaya batho ba ba se nang molato, mme ba itsentse mo go tlhokeng lesego mo go se nang tekanyo, 6e le gore maikaelelo a a tlhamaletseng a babusi ba, a sokamisitšwe ke mabakanyana a a sa siamang a batho ba ba megopolo e e bosula.
7“Se se ka bonwa e seng mo ditsong tsa bogologolo tse re di umakileng; lo ka nna lwa iponela fela se se gautšhwane le lona, ebong bolalome jo bontsi jo bo dirilweng leroborobo la magosana a a sa tšhwanelang.
8“Mo nakong e e tlang re tlaa tlhokomela gore batho botlhe ba tshele ka tidimalo le kagiso mo pusong ya rona, 9ka go dirisa maano a maša le go atlhola se se tsisitšweng fa pele ga rona ka tlhaloganyo e e sedi e e ritibetseng.
10“Jaanong Hamane, morwa Hammedatha, Momasedonia, yo o se nang le fa e le thothinyana ya madi a Boperesia mo go ene, yo o kgakalakgakala le bomolemo jwa rona, o ne a amogetšwe sentle mo legaeng la rona.
11“Mme re ne re mo tšhwere sentle ka bopelotšhweu jo re tšhwarang setšhaba sengwe le sengwe ka jone mo a neng a bile a bidiwa rraarona mme a obamelwa ke batho botlhe jaaka motho yo o rulaganang le setilo sa bogosi.
12“Fela e rile a palelwa ke go nna mo mannong a gagwe a a kwa godimo, a loga maano a go re amoga puso ya rona le botshelo jwa rona, 13ya bo ya re ka bolotsananyana le boferefere a kopa gore go bolawe Moredekai, mmoloki wa rona le motho yo o tlholang a re direla molemo, le Esethere molekane wa rona mo botlotleging, mmogo le setšhaba sotlhe sa bone.
14“O ne a ithaya a re e tlaa re a dira jaana a re fitlhele re sa sireletsega mme a tseye Mmuso wa Seperesia a o tsenye mo diatleng tsa Mamasedonia.
15“Fela re fitlhela Bajuta ba ba neng ba atlholetšwe go nyelediwa ke mothonyana yo o hutsegileng go menaganye gararo yo, e se batho ba ba bosula, mme e le batho ba ba busiwang ka melao e e tlhamaletseng.
16“E bile ke bana ba Mogodimodimo, Modimo o o thatayotlhe o o tshelang, o o sa bolong go nna o re tsamaisetsa puso ka thulaganyo e e siameng thatathata rona le borraarona-mogolwagolwana.
17“Jalo he, lo se ka lwa dira se dikwalo tsa ga Hammane, morwa Hammedatha di rileng lo se dire, 18gonne motho yo, yo ene o dirileng dilo tse ke ene yo o pegilweng a bolaelwa fa kgorong ya Susa, mmogo le lelapa la gagwe lotlhe. Gonne Modimo o o busang dilo tsotlhe o mo otlhaile ka bonako ka kotlhao e e mo tšhwanetseng.
19“Ke gone he, manegang mafoko a lokwalo lo gongwe le gongwe mo pontsheng mme lo dumeleleng Bajuta go tshela ka mekgwa le melao ya bone.
20“Lo bo lo ba thuseng, gore e tle e re fa Adara, kgwedi ya bolesome le bobedi e tlhola malatsi a le 13, ba iphemele kgatlhanong le ba ba tlaa bong ba ba tlhasela ka letsatsi le ba neng ba tšhwanetse go bogisiwa ka lone.
21“Gonne Modimo o o busang dilo tsotlhe o dirile gore letsatsi le e nne boitumelo go batho ba o ba itlhaoletseng, mo boemong jwa letsatsi la go nyelediwa ga bone.
22“Jaanong lona Bajuta, mo gare ga meletlo ya lona e megolo, tshegetsang letsatsi le, ka boitumelo, e le letsatsi le le tšhwanetseng go gakologelwa e le letsatsi la modiro, 23gore gompieno le mo nakong e e tlang, le tle le nne mo go lona le mo Maperesieng otlhe a a siameng, segopotso sa go namolwa ga lona, mme mo babeng ba lona le nne segakolodi sa go nyelela ga bone.
24“Motse mongwe le mongwe, kgotsa, go bua ka kakaretso, lefatshe lenngwe le lengwe le le sa lateleng ditaelo tse, le tšhwanetse go senngwa, kwa ntle ga kutlwelo-botlhoko, ka lerumo le melelo. Go dirwe gore go se ka ga bo ga nna le batho ba ba fetang mo go lone. Le gone le be le tlhoiwe le ke diphologolo tsa naga le dinonyane tota ka bosafeleng.”
