Esethere O Kopa Modimo Ka Boitlhokofatso Le Thapelo
1E rile Esethere a bona diphatsa tse di mašwe tse di neng di ba okamisitse loso a tshabela kwa Moreneng mo poifong ya gagwe e kgolo.
2A apola diaparo tsa gagwe tsa mokgabo, a apara tsa kutlobotlhoko le khutsafalo. Mme mo boemong jwa ditlolo tse di nkgang monate tsa tlhwatlhwa e e kwa godimo o ne a itshela melora le lorole mo tlhogong. A ikokobetsa mmele thata. Mme gongwe le gongwe mo a neng a atle a ikgabise teng o ne a go bipa ka maudi a moriri wa gagwe o o neng o tlhatlhamolotswe.
3A rapela Morena Modimo wa Iseraele a re:
“Morena wa me, ke wena fela O leng Kgosi ya rona, a O ko O tle
go nthusa, gonne ke nosi mme ga ke na mothusi ope fa e se wena
4gonne kotsi ya me e mo diatleng tsa me.
5Ke sale ke bolelelwa ke sa ntse ke le monnyennyane, mo lwapeng lwa ga etsho, Morena,
gore O ne wa itlhophela Iseraele mo ditšhabeng tsotlhe
le borraarona-mogolwagolwana mo bathong botlhe ba bogologolo
gore e nne bošwa jwa gago ka bosafeleng;
le gore O ne wa ba direla fela jaaka O ne O ba solofeditse.
6Fela jaanong re go leofetse
mme wa re neela baba ba rona
7ka re ne ra tlotla medimo ya bone.
Morena, O siame!
8Fela le jaanong jaana ga ba ise ba bo ba bone go lekanye jaaka re le mo bogolegweng jo bo botlhoko jaana;
ba sa ntse ba dirile kgolagano
le medimo ya bone ya diseto
9gore ba nyeletse taolo e e neng ya buiwa ke molomo wa gago, le gore
ba tlose bošwa jwa gago, ba mome
melomo ya ba ba go bakang, ba senye aletara ya gago le tlotlo ya
Ntlo ya gago,
10mme ba mpe ba atlhamolose melomo ya baheitane gore ba bake
medimo e e sa thuseng sepe
ba bo ba dire kgosi e e leng motho fela modimo.
11Oh Morena, O se ka wa tlogelela dilo tse di se yong thobane ya gago ya segosi.
O se ka wa dumelela gore batho ba re tshege fa re senyega. O dire
gore maanonyana a bone a ba menogele,
mme O dire sekao ka motho yo o simolotseng tlhaselo e ya rona.
12O ko O gakologelwe, Oh Morena,
O itshenole mo nakong e ya pitlagano ya rona.
Fa e le nna, Oh Kgosi ya medimo le mong wa nonofo yotlhe, O mphe bopelokgale.
13O ntsenye mafoko a a tlhotlheletsang mo molomong fa ke lebaganye le tau;
O dire gore a utlwe a tlhoile mmaba wa rona.
gore ene mmaba yo le botlhe ba ba tšhwanang nae ba fedisiwe.
14Fa e le rona, O ko O re boloke ka seatla sa gago,
O bo O tle go nthusa, gonne ke nosi
mme ga ke na ope fa e se wena fela, Morena.
15O itse dilo tsotlhe,
mme O itse gore ke tlhoile ditlotla tsa baikepi
le gore ke ila bolao
jwa motho yo o sa rupang tota
le jwa moeng mongwe le mongwe.
16O itse fa ke le mo pateletsong,
fa ke tlhoile sesupo sa maemo a a kwa godimo a me se ke se rwalang
mo tlhogong fa ke tlhaga mo kgotleng;
ke se ila jaaka ekete ke
khainyana e e leswe,
mme ga ke nke ke be ke se rwala mo malatsing a me a boiketlo.
17Lelata la gago ga le ise le ke le je mo tafoleng ya ga Hamane,
kgotsa le itumelele mediro ya segosi,
le fa e le go nwa bojalwa jwa mofine jo bo tshololelwang badimo.
18Le gone lelata la gago ga le ise le ke le itumele fa e sale a bewa
mo maemong a a kwa godimo go fitlhelela gompieno;
le itumela mo go wena fela, Morena, Modimo wa ga Abrahama.
19Oh Modimo, wena yo thata ya gago e fanyang dilo tsotlhe,
A O ko O reetse lentšwe la motho yo o setseng a itlhoboga,
O nnamole mo seatleng sa moikepi,
O ko O nkgolole mo poifong ya me.”
