ESETHERE (SEGERIKA) 11

₁Mo ngwageng ya bone ya puso ya Bo-Petolemi le Kleopatera, Dositheuse yo o neng a re o moprista le Molefite, le morwawe yo le ene o neng a bidiwa Petolemi, ba ne ba tsisa lokwalo lo lo fa godimo lo, lo lo buang ka Purima. Ba ne ba bolela fa e le lwa mmatota; lo fetoletswe ke Lisimakuse morwawe Petolemi, mongwe wa ba ba neng ba nna kwa Jerusalema.

₂Mo ngwageng ya bobedi ya go busa ga Kgosi e Kgolo Ahasewerose, ka letsatsi ja ntlha la Nisa, Moredekai morwa Jaire, morwa Shimele, morwa Kishe, wa morafe wa ga Benjamine, o ne a tlelwa ke toro. ₃E ne e le Mojuda, a agile mo motseng wa Susa, e le monna yo o dirang tiro ya botlhokwa mo lolwapeng lwa kgosi. ₄Gape, e ne e le mongwe wa matšhwarwa a Nebukatenesare, kgosi ya Babilone, a neng a tsile nao, go tšwa kwa Jerusalema, le Jekonia, kgosi ya Juta.

₅Mme toro ya gagwe e ne e le e: Go ne go na le dilelo le leratla, tumo ya maru le tsikinyego ya lefatshe, le madubadube mo lefatsheng lotlhe. ₆Ke fa go tšwa dikgogela tse pedi, tsoopedi di ipaakanyeditse go lwa, mme tsa dira modumo o montsi thata. ₇Ya re fa di duma jaana, ditšhaba tsotlhe tsa ipaakanyetsa ntwa, go tlhasela setšhaba sa basiami. ₈Ke fa go nna letsatsi ja phifalo le letobo, kutlwiso-botlhoko le khutsafalo, pogisego le khuduego e kgolo mo lefatsheng.

₉Mme setšhaba sotlhe sa basiami sa huduega moya, se boifa bosula jotlhe jo bo neng bo se okame, se ipaakanyeditse go nyelela. ₁₀Ke fa se tlhaeletsa Modimo; mme mo go tlhaeletseng ga sone ga tšwa noka e kgolo, morwalela wa metsi, jaaka ekete o tšwa mo motswedinyaneng; ₁₁lesedi la tla fa letsatsi le tlhaba, boesengmang ba bewa kwa maemong a a kwa godimo, ba kometsa batlotlegi.

₁₂Moredekai a bona mo torong e se Modimo o neng o ikaeletse go se dira mme ya re a sena go thanya a nna a e gakologelwa, mme letsatsi lotlhe a leka go bona gore tota e ne e bolela eng.