ESETHERE (SEGERIKA) 10

Mme Moredekai o ne a re, “Dilo tse tsotlhe di dirilwe ke Modimo.

₅“Gonne ke gakologelwa toro e ke neng ka e lora kaga dilo tse, mme ga go na epe ya tsone e e iseng e ke e diragale. ₆Motšwedinyana o o neng wa fetoga molapo, lesedi le le neng la phatsima, letsatsi, morwalela wa metsi: molapo ke Esethere, yo kgosi e neng ya mo nyala mme ya mo dira mohumagadi.

₇“Dikgogela tse pedi ke nna le Hamane.

₈“Ditšhaba ke tse di neng tsa ipopaganyetsa go nyeletsa leina la Bajuda. ₉Mme setšhaba sa me se, ke Iseraele yo o neng a tlhaeletsa Modimo, mme a bolokega. Morena o bolokile batho ba gagwe, Morena o re namotse mo bosuleng jotlhe, Modimo o dirile ditshupo tse dintsi le dikgakgamatso, tse di iseng di ke di direge mo ditšhabeng.

₁₀“O dirile ditengwa tse pedi, e nngwe o e diretse batho ba one, nngwe wa e direla batho botlhe.

₁₁“Mme ditengwa tse pedi tse, di ne tsa dirwa ka ura le nako le letsatsi tse di neng di tlhophilwe ke Modimo, mme tsa ama ditšhaba tsotlhe.

₁₂“Mme Modimo o ne wa gakologelwa batho ba one, wa emela bošwa jwa one. Ke gone ka moo ba tlaa tshegetsang malatsi a mo kgweding ya Adara, fa kgwedi eo e tlhola malatsi a le 14 le fa e tlhola malatsi a le 15, ka kgobokano le boitumelo le boipelo fa pele ga Modimo, mo kokomaneng nngwe le nngwe, ka gale mo gare ga batho ba one Iseraele.”