Pesalema 47

₁A ko lo openg diatla

lona ditšhaba tsotlhe;

lo tshelele Modimo lošalaba

lwa go ja koma.

₂Gonne Jehofa Mogodimodimo

o a boitshega;

ke Kgosi e kgolo ya lefatshe lotlhe.

₃O tlaa fenya ditšhaba

a di baya tlase ga rona,

le merafe tlase ga dinao tsa rona.

₄O tlaa re lebalebela boswa,

e bong tlotlomalo ya ga Jakobe

yo o neng a mo rata. Sela.

₅Modimo o tlhatlogile ka lošalaba,

Jehofa ka tumo ya lonaka.

₆Opelelang Modimo dipako,

opelang dipako;

opelelang Kgosi ya rona dipako,

opelang dipako.

₇Gonne Modimo ke Kgosi

ya lefatshe lotlhe;

lo opele dipako ka tlhaloganyo.

₈Modimo o busa mo merafeng;

Modimo o dutse mo setulong sa one

se se boitshepo sa bogosi.

₉Dikgosana tsa ditšhaba

di phuthegile mmogo,

go tla di nna batho ba Modimo

wa ga Aberahame;

gonne dithebe tsa lefatshe ke tsa

Modimo; o goletsegile thata.