Sione ke motse wa Kgosi e kgolo
Pesalema ya bomorwa Kora. Sefela.
1O mogolo Jehofa,
o na le go bakwa segolo
mo motseng wa Modimo wa rona,
mo thabeng ya one e e boitshepo.
2E ntle thaba ya Sione,
ka go golela godimo,
e itumelelwa ke lefatshe lotlhe,
ka fa ntlheng ya botsheka,
motse wa Kgosi e kgolo.
3Modimo o ikitsisitse
mo matlong a gone a dikgosi
fa o le botshabelo.
4Gonne, bonang,
dikgosi tsa phuthega,
mme tsa feta mmogo.
5Di ne tsa go bona,
foo tsa gakgamala thata;
tsa tsielwa,
tsa itlhaganela tsa ya koo.
6Thoromo ya di tshwara teng;
le botlhoko jaaka jwa mosadi
yo o mo pelegong.
7Wa thuba dikepe tsa Tarešiše
ka phefo ya botlhabatsatsi.
8Jaaka re utlwile,
re bonye fela jalo
mo motseng wa ga Jehofa
wa masomosomo,
mo motseng wa Modimo wa rona;
Modimo o tlaa o tlhomamisa
ka bosenabokhutlo. Sela.
9Re akantse bopelonomi jwa gago
jwa lorato, Modimo,
mo gare ga tempele ya gago.
10Fela jaaka leina la gago le ntse,
Modimo, pako ya gago le yone
e ntse jalo
kwa dikhutlong tsa lefatshe;
seatla sa gago se se siameng
se tletse tshiamo.
11A thaba ya Sione e itumele,
le bomorwadia Juta ba ipele,
ka ntlha ya dikatlholo tsa gago.
12Tlalatlalang le Sione,
lo bo lo o potonoge;
balang dikago tsa one
tse di godileng tsa phemelo.
13Lo tlhokomele sentle
dithako tsa phemelo tsa one,
lo akanye matlo a one a dikgosi;
gore lo tle lo bolelele
losika lo lo tlang.
14Gonne Modimo one,
ke Modimo wa rona
ka bosakhutleng le ka bosaengkae;
one o tlaa nna mosupatsela wa rona
le go ya fela mo losong.
