Pesalema 46

₁Modimo ke botshabelo jwa rona

le thata,

thuso e e gaufi thata mo tlalelong.

₂Ke gone ka mo re se ketlang re boifa

le fa lefatshe le ka fetoga,

le fa dithaba di tshikinyega

mo bogareng ga mawatle;

₃le fa metsi a one a suma a

kgaphasela,

le fa dithaba di kutuma

ka go ikgogomosa ga one.

Sela.

₄Noka e gone e dikelelo tsa yone

di itumedisang motse wa Modimo,

e bong felo ga boitshepo

jwa metlaagana ya Mogodimodimo.

₅Modimo o mo gare ga one;

ga o ketla o tshikinngwa;

Modimo o tlaa o thusa

bo sa ntse bo anoga.

₆Merafe e ne ya šakgala,

magosi a tsebeetsega;

wa ntsha lentswe la one,

lefatshe la tlhapologa.

₇Jehofa wa masomosomo

o na le rona;

Modimo wa ga Jakobe

ke botshabelo jwa rona. Sela.

₈Tlang, lo bone ditiro tsa ga Jehofa,

e bong ditšhwafatso

tse o di dirileng

mo lefatsheng.

₉O khutlisa ditlhabano

le kwa bokhutlong jwa lefatshe;

o roba bora,

o putlaganya lerumo ka bogare;

o fisa dikara tsa tlhabano

mo molelong.

₁₀“Nang fela,

mme lo itse fa ke le Modimo;

ke tlaa godisiwa mo merafeng;

ke tlaa godisiwa mo lefatsheng.”

₁₁Jehofa wa masomosomo

o na le rona;

Modimo wa ga Jakobe

ke botshabelo jwa rona. Sela.