Pesalema 129

₁A Iseraele a bue jaana, a re:

“Ba sa le ba ntlhokofatsa

gantsintsi, le mo bokaung jwa me

go tla nakong eno;

₂ba sa le ba ntlhokofatsa gantsintsi

mo bokaung jwa me

go tla nakong eno;

le fa go ntse jalo

ga ba ise ba mphenye.

₃Balemi ba lemile mokotla wa me;

ba lelefatsa meralo ya bone.”

₄Jehofa o tshiamo,

o kgaotse dikgole tsa baikepi.

₅Botlhe ba ba ilang Sione

a ba tlhajwe ke ditlhong,

mme ba busediwe kwa morago.

₆A ba nne jaaka bojang

jo bo mo godimo ga matlo,

jo bo omelelang bo ise bo gole;

₇jo mokgetli o sa tlatseng

seatla sa gagwe ka jone,

le yo o bofang dingata

o sa tlatseng sehuba ka jone;

₈le ba ba fetang ga ba ke ba bua

ba re: “Tshegofatso ya ga Jehofa

e nne mo go lona;

re lo segofatsa mo ineng la Jehofa.”