DUTERONOME 32

₁“Lona magodimo, sekegang

tsebe, mme ke tlaa bua;

a lefatshe le utlwe

mafoko a molomo wa me.

₂Thuto ya me

e tlaa rotha jaaka pula,

puo ya me

e tlaa wa jaaka monyo;

jaaka pula ya medupe mo loremeng,

le jaaka pula ya maebana

mo morogong;

₃gonne ke tlaa opela

leina la ga Jehofa mokgosi;

kayang Modimo wa rona bogolo.

₄Lefika, tiro ya gagwe e itekanetse;

gonne ditsela tsa gagwe tsotlhe

ke tshiamiso;

Modimo o o boikanngo,

o o se nang tshiamololo,

one o tekatekanyo, o tshiamo.

₅Ba o ipodiseditse,

ga se bana ba gagwe,

ke setshubaba mo go bone;

ke losika lo lo logwadi, lo lo kgopo.

₆A lo a bo lo duel Jehofa jalo,

batho ke lona ba dieleele?

A ga se ene rraago

yo o go rekileng?

O go dirile a ba a go tlhomamisa.

₇Ikgakolole malatsi a bogologolo,

gopola dinyaga tsa dikokomana

di le dintsi;

botsa rraago, o tlaa go tlhotlhela;

bagolwane ba gago,

ba tlaa go bolelela.

₈E rile Mgodimodimo

a abela merafe boswa jwa yone,

ka a kgaoganya bana ba batho,

a tlhomela ditšhaba melelwane

ka fa palong ya bana ba Iseraele.

₉Gonne kabelo ya ga Jehofa

ke batho ba gagwe;

Jakobe ke kabo e e lekantsweng

ya boswa jwa gagwe.

₁₀O mo fitlhetse

mo lefatsheng le le sekaka,

mo nageng e e bobidibidi fela,

e e dumadumang; a mo dikanyetsa,

a mo disa, a mo direla

jaaka nyetse ya leitlho la gagwe.

₁₁Jaaka ntswi yo motona

yo o tleng a fudue setlhaga sa gagwe

a bokabokele mo godimo

ga mamphorwana a gagwe,

ene a ba tsharololele

diphuka tsa gagwe,

a ba tsaya, a ba rwala

mo diphukeng tsa gagwe;

₁₂Jehofa a le esi a ba goga,

go se na modimo ope wa seeng nae.

₁₃A mo palamisa mafelong

a a godimo a lefatshe,

a ja totafalo ya naga;

a mo ntshetsa dinotshe mo lefikeng,

le lookwane mo lefikeng la legakwa.

₁₄Madila a dikgomo le maši a dinku

a na le mafura a dikwanyana,

le diphelefu tsa losika lwa Bašane

le dipodi di na le mafura

a diphilo tsa mabele;

ka madi a loungo lwa mofine

wa nwa bojalwa.

₁₅Mme Ješurune a nona, a raga;

o nonne, o enne, o borethe;

foo a latlha Modimo

o o mo dirileng,

a kobela tlase lefika la poloko

ya gagwe.

₁₆Ba ne ba tlhotlheletsa lefufa la one

ka medimo ya seeng,

ba o gakatsa ka tse di makgapha.

₁₇Ba ne ba isetsa badimo ditlhabelo,

ba e neng e se Modimo ope,

e le medimo e ba neng ba sa e itse,

medimo e e sa tswang go tlhaga,

e borra ba lona ba ne ba sa e tshabe.

₁₈Lefika le le go tsetseng

o le tlhokomologile,

o lebetse Modimo o o go belegeng.

₁₉Jehofa a go bona,

a ba ferogela sebete

ka ntlha ya kgakatso

ya bomorwawe le bomorwadie.

₂₀A re:

‘Ke tlaa ba subela sefatlhogo sa me,

ke tlaa bona gore

bokhutlo jwa bone e tlaa nna eng;

gonne ke losika lo lo lesoko,

bana ba ba se nang boikanngo.

₂₁Ba nkhufantse ka se e seng

Modimo;

ba nkgakaditse ka maithamako

a bone;

le nna ke tlaa ba tlhotlheletsa lefufa

ka ba e seng tšhaba;

ke tlaa ba gakatsa

ka morafe o o seeleele.

₂₂Gonne molelo o tshubilwe

mo bogaleng jwa me,

o fisetsa kwa moleteng

o o kwa tengteng,

o laila lefatshe le totafalo ya lone,

o tshuba metheo ya dithaba.

₂₃Ke tlaa koelela masula

mo go bone;

ke tlaa feletsa metswi ya me

mo go bone.

₂₄Ba tlaa fediwa ke tlala,

ba tlaa rungwa ke mogote

o o tutumang,

le tshenyego e e galakang;

ke tlaa ba tsosetsa meno a dibatana,

le botlhoko jwa dilelemedi

tsa lorole.

₂₅Kwa ntle tšhaka e tlaa thopa,

mme mo matlwaneng a a kwa teng

therego;

go tlaa senya wa lekau

le wa kgarebane,

seanyi le monna yo mmududu.

₂₆Ke rile:

Ke tlaa ba gasamisetsa kwa kgakala,

ke khutlisa kgakologelo ya bone

mo bathong.

₂₇Fa nkabo ke ne ke sa boife

kgakatso ya mmaba,

e tle e re kgotsa baganetsi ba bone

ba gopola ka go sele,

e se re kgotsa ba re:

Go tsholetsegile letsogo la rona,

mme selo se sotlhe fela

Jehofa ga a a se dira.’

₂₈Gonne ke morafe

o o se nang kgakololo,

ga go na tlhaloganyo mo go bone.

₂₉A bo ba ka bo ba ne ba le botlhale,

mme ba tlhalogantse se,

ba ka bo ne ne ba akanya

bokhutlo jwa bone!

₃₀Ana a le mongwe fela

o ne a tlaa leleka jang

ba ba makgolo a some,

le ba le babedi

ba tshabisa ba ba makgolo a lekgolo

fa Lefika wa bone

a ka bo a se ka a ba rekisa,

le fa Jehofa a se ka a ba neelela?

₃₁Gonne lefika la bone

ga le a nna jaaka Lefika wa rona,

le e leng bone baba ba rona

ka bosi e le baatlhodi.

₃₂Gonne mofine wa bone

ke wa mofine wa Sotoma,

wa matlhagare a Gomora;

loungo lwa bone lwa mofine

ke loungo lo lo mogau,

le masitlha a bone ke a a galakang.

₃₃Bojalwa jwa bone jwa mofine

ke botlhoko jwa dikgogela,

ke botlhoko jo bo bolalome

jwa dišaušawane.

₃₄Selo se, a ga se a bewa

mo polokelong fa go nna,

se kaneletswe mo mahumong a me?

₃₅Pusoloso ke ya me, le tefetso,

mo lobakeng lo lonao lwa bone

lo tlaa relelang ka lone;

gonne letsatsi la thekisego ya bone

le gaufi,

le dilo tse di nang le go ba wela

di tlaa akofa.

₃₆Gonne Jehofa o tlaa atlhola

batho ba gagwe,

o tlaa ikwatlhaya

ka ga batlhanka ba gagwe

mogang o bonang

fa thata ya bone e ile,

mme go se na ope yo o setseng,

le fa e le yo o tswaletsweng

kgotsa yo o lesiwang

a itsamaela fela.

₃₇O tlaa re:

‘Medimo ya bone e fa kae,

e bong lefika le ba ne ba le ikantse;

₃₈e e jeleng mafura a ditlhabelo

tsa bone,

ya nwa bojalwa jwa mofine jwa

bone jwa tshupelo e e nowang.

A e nanoge e lo thuse,

e nne phemelo ya lona.

₃₉Bonang jaana, fa e le Nna one,

e bong Nna,

mme go se na Modimo ope le nna;

ke a bolaya, ke bile ke a tshedisa;

ke ntshitse ntho,

ke bile ke a fodisa;

ga go na ope yo o ka gololang

mo seatleng sa me.

₄₀Gonne ke tsholeletsa letsogo la me

legodimong, ke re,

jaaka ke tshela ka bosakhutleng,

₄₁fa ke lootsa tšhaka ya me

e e šadiang,

fa letsogo la me le tshwara katlholo;

ke tlaa ipusolosetsa

mo babeng ba me,

ke itefetsa mo go bone

ba ba nkilang.

₄₂Metswi ya me

ke tlaa e tagisa ka madi,

tšhaka ya me e tlaa ja nama;

ka madi a ba ba bolailweng,

le a batshwarwa,

a a tswang tlhogong

ya magosana a mmaba.’

₄₃Lona merafe,

itumeleng le batho ba gagwe;

gonne o tlaa lefetsa madi

a batlhanka ba gagwe,

o tlaa iposolosetsa

mo babeng ba gagwe,

mme o tlaa direla lefatshe la gagwe,

le batho ba gagwe, tefololo.”