Jošua ke mogogi mo boemong jwa ga Moše
1Moše a ya a bua mafoko a otlhe le Baiseraele botlhe fela. 2A ba raya a re: “Gompieno nna ke botsofe jwa dinyaga di le lekgolo le masome a mabedi; ga ke tlhole ke nonofile go tswa le go tsena; Jehofa o ntheile a re: ‘Ga nketla ke tshela Joretane ono.’ 3Jehofa Modimo wa gago ke ene yo o tlaa kgabaganyang fa pele ga gago; o tlaa senya merafe e fa pele ga gago, mme o tlaa e rua; Jošua ene, o tlaa kgabaganya fa pele ga gago, jaaka Jehofa a buile. 4Jehofa o tlaa ba direla jaaka a ne a direla Sihone le Oge, dikgosi tsa Baamore le lefatshe la bone; ba o ba sentseng. 5Jehofa o tlaa ba lo neela fa pele ga gago, lo tlaa ba direla ka fa taolong yotlhe e ke e lo laoletseng. 6Lo nne thata le pelokgale, lo se boife, lo se ka lwa ba tshoga; gonne Jehofa Modimo wa gago ke ene yo o tsamayang nao; ga a ketla a go tlhaela le fa e le go go latlha.”
7Moše a bitsa Jošua, a mo raya mo ponong ya Baiseraele botlhe, a re: “O nne thata le pelokgale, gonne o tlaa ya le tšhaba e mo lefatsheng le Jehofa o le ikanetseng borraabo, a re o tlaa le ba naya, o tlaa le ba ruisa. 8Jehofa ke ene yo o yang fa pele ga gago; o tlaa nna nao, ga a ketla a go tlhaela le fa e le go go latlha; o se ka wa boifa, o se ka wa rerega.”
Molao o tshwanetse go balwa ka dingwaga tsotlhe tse supa
9Moše a kwala molao o, a o neela baperesiti bomorwa Lefi ba ba rwalang letlole la kgolagano ya ga Jehofa, le bagolwane botlhe ba Iseraele. 10Moše a ba laola, a re: “E tlaa re mo bokhutlong jwa bosupa bongwe le bongwe jwa dinyaga, mo lobakeng lo lo laotsweng lwa ngwaga wa kgololo, mo modirong wa metlaagana, 11mogang Baiseraele botlhe ba tsileng go bonala fa pele ga Jehofa Modimo wa gago, mo felong fa o tlaa go itshenkelang, o bale molao o fa pele ga Baiseraele botlhe mo kutlong ya bone. 12Phutha batho, banna le basadi, banyana, le moeng wa gago yo o mo teng ga dikgoro tsa gago, gore ba utlwe, le gore ba ithute, ba boife Jehofa Modimo wa lona, ba tlhokomele go dira mafoko otlhe a molao o; 13le gore bana ba bone, ba ba iseng ba itse, ba utlwe, ba ithute go boifa Jehofa Modimo wa lona ka lobaka lotlhe lo lo tshelang ka lone mo lefatsheng le lo kgabaganyang Joretane lo ya kwa go lone go le rua.”
Ditaelo tsa bofelo tsa ga Jehofa mo go Moše
14Jehofa a raya Moše a re: “Bona, malatsi a a atamela a o tlaa swang ka one; bitsa Jošua, lo iponatse mo mogopeng wa bophuthegelo, gore ke tle ke mo laye.” Mme Moše le Jošua ba ya ba iponatsa mo mogopeng wa bophuthegelo. 15Jehofa a bonala mo Mogopeng a le mo mosipuring wa leru; mosipuri wa ema kgoro ya Mogope godimo.
16Jehofa a raya Moše a re: “Bona o tlaa robala le borraago; mme tšhaba e, e tlaa tloga e akafalela medimo ya seeng ya lefatshe, ya kwa ba yang go nna gone mo go yone, ba tlaa ntatlha, ba senya kgolagano ya me e ke e dirileng nabo. 17Ke gone bogale jwa me bo tlaa ba tukelang mo letsatsing leo, ke tlaa ba latlha, ke tlaa ba subela sefatlhogo sa me, mme ba tlaa jelwa ruri, le masula a le mantsi le mahutsana a tlaa ba wela; ba tlaa bua mo tsatsing leo ba re: ‘Masula a, a ga a a re wela ka gobo Modimo o seyo mo go rona?’ 18Ruri ke tlaa suba sefatlhogo sa me mo tsatsing leo, ka ntlha ya bosula jotlhe jo ba tlaa bong ba bo dirile, ka ba tlaa bo ba menogetse kwa medimong e sele.
19“Ke gone jaana, ikwaleleng sefela se, o se rute bana ba Iseraele, o se tsenye mo melomong ya bone, gore sefela se, e nne seganeledi sa me mo baneng ba Iseraele. 20Gonne ke tlaa re ke sena go ba fitlhisa mo lefatsheng le ke le ikanetseng borraabo, le le elang maši le dinotshe, mme ba jele, ba kgotshe, ba nonne, foo ba tlaa menogela kwa medimong e sele, ba e direla, ba nnyatse, ba senye kgolagano ya me. 21Mme go tlaa dirala go re mogang masula a le mantsi le mahutsana a ba wela, sefela se, se tlaa bo se supa fa pele ga bone jaaka mosupi; gonne ga se ketla se lebalwa mo melomong ya losika lwa bone; e tswa ke itse ditlhatlhanyo tsa bone tse ba di tlhatlhanyang, le jaana, ke ise ke ba fitlhise mo lefatsheng le ke ikanneng ka ga lone.”
22Jalo Moše a kwala sefela se ka tsatsi leo, a ba a se ruta bana ba Iseraele.
23A laya Jošua morwa Nune, a re: “O nne thata le pelokgale; gonne o tlaa fitlhisa bana ba Iseraele mo lefatsheng le ke le ba ikanetseng; mme ke tlaa nna nao.”
24Ga dirala ya re Moše a sena go fetsa go kwala mafoko a molao o mo lokwalong, a ba a a wetsa, 25a laola Balefi ba ba rwalang letlole la kgolagano ya ga Jehofa, a re: 26“Tsayang lokwalo lo lwa molao, lo lo beye lo bape le letlole la kgolagano ya ga Jehofa Modimo wa lona, gore lo nne gone e le mosupi go go ganetsa. 27Gonne ke a e itse tsuololo ya gago, le thamo e thata ya gago; lo tsuololela Jehofa le ke sa ntse ke tshedile ke na le lona gompieno, mme go tlaa nna jalo bogolo jang ke sena go swa? 28Mphutlhelang bagolwane botlhe ba ditso tsa lona, le maotlana a lona, gore ke bue mafoko a mo ditsebeng tsa bone, ke ba biletse legodimo le lefatshe go supa go ba ganetsa. 29Gonne ke a itse fa e tlaa re ke sena go swa lo tlaa ipodisetsa ruri, lo fapoga tsela e ke e lo laoletseng; mme bosula bo tlaa lo wela mo metlheng ya morago; gonne lo ganelela go dira se se bosula mo ponong ya ga Jehofa, go mo tlhotlheleletsa bogaleng ka tiro ya diatla tsa lona.”
Sefela sa ga Moše
30Moše a bua mafoko a sefela se mo ditsebeng tsa phuthego yotlhe ya Iseraele, a ba a a wetsa:
