Moše o segofatsa bana ba Iseraele
1E ke yone tshegofatso e Moše monna wa Modimo o ne a segofatsa bana ba Iseraele ka yone, pele ga loso lwa gagwe.
2A re: “Jehofa o ne a tswa kwa Sinai,
a ba tlhabela a tswa mo Seire,
a phatsima a betlama
a le mo thabeng ya Parane,
a bo a tswa mo makgolong
a makgolo mantsi a baitshepi,
ka fa ntlheng ya gagwe
ya letsogo le legolo
ga bo go le molao
o o ba tutumelang molelo.
3Ee, o a di rata ditšhaba,
Baitshepi ba gagwe botlhe
ba mo seatleng sa gago;
ba ne ba dula fa dinaong tsa gago;
mongwe le mongwe
o tlaa amogela mafoko a gago.
4Moše o ne a re laolela molao,
e le boswa jwa phuthego
ya ga Jakobe.
5Ene e ne e le kgosi mo Ješurune,
ka ditlhogo tsa batho di phuthwa,
ditsho tsotlhe tsa Iseraele
di le mmogo.
6A Rubene a tshele a se ka a swa;
le fa go ntse jalo a batho ba gagwe
ba nne babotlana.”
7E ke yone tshegofatso ya ga Juta,
a re: “Jehofa,
utlwa lentswe la ga Juta,
o mo lere mo bathong ba ga gabo;
o ne a itwela ka mabogo a gagwe,
wena o tlaa nna thuso go mo
tlhabantsha le baba ba gagwe.”
8Ka ga Lefi, a re:
“Thumime wa gago,
le Urime wa gago
ba na le ene yo o mo ratang,
ene yo o ne wa mo leka kwa Masa,
yo o ne wa ganela nae
kwa metsing a Meriba.
9Yo o ne a bua ka ga rraagwe, a re:
‘Ga ke a mmona,’
le ka ga mmaagwe;
le gone ga a ka a re
bomorwa rraagwe ke bomangmang;
le gone ga a ka a itse
ba e leng bana ba gagwe,
gonne ba tlhokometse
lefoko la gago,
ba tshegeditse kgolagano ya gago.
10Ba tlaa ruta Jakobe
dikatlholo tsa gago,
le Iseraele molao wa gago;
ba tlaa baya maswalo
fa pele ga gago,
le tshupelo e e fisiwang
e le mmogo mo sebesong sa gago.
11Jehofa, segofatsa dithoto
tsa gagwe,
o amogele tiro ya diatla tsa gagwe;
ba ba mo tsogologelang
o phololetse lotheka lwa bone,
le lwa ba ba mo ilang,
gore ba se ka ba tlhola ba ema.”
12Ka ga Benjamine, a re:
“Moratwa wa ga Jehofa o tlaa aga
mo polokegong fa go ene;
o tlhola o mmipile motshegare otlhe,
o ntse fa gare ga magetla a gagwe.”
13Ka ga Josefe, a re:
“A lefatshe la gagwe
le segofadiwe ke Jehofa,
ka dilo tse di tlhokegang
tsa legodimo, ka monyo,
le ka boteng jo bo namaletseng
kwa tlase,
14le ka dilo tse di tlhokegang
tsa loungo lwa letsatsi,
ka dilo tse di tlhokegang
tse di golang le dikgwedi,
15le ka dilo tse di tlhophegileng
tsa dithaba tsa bogologolo
jo bo feteletseng,
ka dilo tse di tlhokegang
tsa makhubu a a sa yeng kae.
16Le ka dilo tse di tlhokegang
tsa lefatshe le botlalo jwa lone,
le bopelo e monate jwa gagwe
yo o ne a agile mo setlhareng,
a tshegofatso e tle
mo tlhogong ya ga Josefe,
le mo phogong ya gagwe
yo o ne a lomologanye
le bomorwa rraagwe.
17Leitibolo la kgomo ya pholo
ya gagwe,
borena ke jwa gagwe;
dinaka tsa gagwe
ke dinaka tsa nare;
o tlaa fegolela ka tsone ditšhaba
tsotlhe fela,
e bong dikhutlo tsa lefatshe,
bone ke ba makgolo a makgolo,
a ba ga Eferaime,
le makgolo a makgolo
a ba ga Manase.”
18Ka ga Sebulone, a re:
“Itumele wena Sebulone,
iumele mo go bololeng ga gago;
le wena Isakare
mo megopeng ya gago.
19Ba tlaa biletsa ditšhaba
kwa thabeng;
ba tlaa isa ditlhabelo tsa tshiamo
gone;
gonne ba tlaa anya letlotlo
la mawatle, le mahumo
a a fitlhegileng a mošawa.”
20Ka ga Gate, a re:
“A go segofale
yo o atlhamolosang Gate;
o agile jaaka tau e namagadi,
o gagola letsogo,
ee, le yona phogo.
21Kabelo ya ntlha a e ikgethela,
gonne go ne go beilwe kabelo
ya motlhoma molao gone;
mme a tla le ditlhogo tsa batho
a diratsa tshiamiso ya ga Jehofa,
le dikatlholo tsa gagwe le Iseraele.”
22Ka ga Dane, a re:
“Dane ke ngwana wa tau,
yo o tlolang a tswa kwa Bašane.”
23Ka ga Nafetali, a re:
“Wena Nafetali,
yo o kgotsheng letlhogonolo,
le yo o tletseng tshegofatso
ya ga Jehofa,
o rue ntlha ya bophirimatsatsi
le borwa.”
24Ka ga Ašere, a re:
“A Ašere a segofale ka bana,
a lebosegele bomorwa rraagwe,
a ine lonao lwa gagwe
mo lookwaneng.
25Ditlhako tsa gago
di tlaa nna tshipi le kgotlho; mme
fela jaaka malatsi a gago a ntse,
thata ya gago e tlaa nna fela jalo.
26Ješurune!
ga go ope yo o tshwanang
le Modimo o o palamelang
magodimo go go thusa,
le ka tlotlomalo ya one mo loaping.
27Modimo wa bosakhutleng
ke boago jwa gago
mme ka fa tlase ga mabogo
a a sa yeng kae, o ne wa leleka,
wa kgarametsa mmaba,
fa pele ga gago, a ba a re: Senya.
28Iseraele o agile mo polokegong,
motswedi wa ga Jakobe o osi
mo lefatsheng la mabele
le bojalwa jwa mofine;
ee, magodimo a gagwe
a wa monyo.
29A bo o le sego wena Iseraele!
E mang yo o tshwanang nao,
e le tšhaba e e bolokwang ke Jehofa,
thebe ya thuso ya gago,
yo o bileng a le tšhaka
ya borena jwa gago!
Baba ba gago ba tlaa go ineela;
mme o tlaa gata mafelo
a a tlotlometseng a bone.”
