Pono ya ga Daniele a le fa nokeng ya Hitekele (Tigrise)
1E rile ka ngwaga wa boraro wa ga Kurose kgosi ya Peresia, selo sengwe sa senolelwa Daniele, yo leina la gagwe le ne le bidiwa Beletešasare; selo seo se ne se le boammaaruri, e bong sa dira tse dikgolo; mme a tlhaloganya selo seo, a ba a dira le tlhaloganyo ka ga ponatshegelo.
2Ya re mo metlheng eo, nna Daniele ka bo ke le mo khutsafalong ka dibeke di le tharo tse di tletseng. 3Ga ke a ka ka ja dijo dipe tse di monate, le gone nama le bojalwa jwa mofine ga di a ka tsa tsena mo ganong la me, le gone ga ke a ka ka tlola gope, ga tsamaya dibeke tse tharo tse di tletseng tsa feta.
4Ya re ka letsatsi la 24 la kgwedi ya ntlha, ke le fa nokeng e kgolo, e e leng Hitekele, 5ka tsholetsa matlho a me, ka leba, mme bonang, ga bo go le monna yo o apereng leloba, yo lotheka lwa gagwe lo tlamilweng ka gouta e e itshekileng ya Ufase. 6Mmele wa gagwe o no o ntse jaaka legakwa, le sefatlhogo sa gagwe jaaka ponalo ya logadima, le matlho a gagwe jaaka dilampa tsa molelo, le mmala wa mabogo a gagwe le dinao tsa gagwe o no o ntse jaka kgotlho e e gotlhegileng, le go buiwa ga mafoko a gagwe go ne go ntse jaaka go bua ga bontsi jwa batho.
7Nna Daniele ka bona ponatshegelo e ke le nosi; gonne banna ba ke ne ke na nabo ga ba a ka ba bona ponatshegelo; mme thoromo e kgolo ya ba wela, mme ba tshaba ba ya go iphitlha. 8Jalo ka tlogelwa ke le nosi, mme ka bona ponatshegelo e kgolo e, mme go se ka ga sala thata epe mo go nna; gonne bontle jwa me bo ne bo fetogile sebodu mo go naa, mme ga ke a ka ka sala le nonofo epe. 9Le fa go ntse jalo ka utlwa lentswe la mafoko a gagwe; ya re ke utlwa lentswe la mafoko a gagwe, foo ka bo ke wetse ka sefatlhogo sa me ke thulametse thata, sefatlhogo sa me se le fa fatshe. 10Mme bonang, seatla sa nkama, sa nkhubamisa ka mangole, le ka dikhuti tsa diatla tsa me fa fatshe.
11Mme a nthaya, a re: “Daniele, wena monna yo o ratwang thata, tlhaloganya mafoko a ke a buang nao, mme o eme o thokgame; gonne ke le fano ke romilwe mo go wena.” Ya re a sena go bua lefoko le le nna, ka ema ke roroma.
12Foo a nthaya, a re: “O se ka wa boifa, Daniele, gonne e sa le ka tsatsi la ntlha le o ineetseng ka lone go tlhaloganya, le go ikisa tlase fa pele ga Modimo wa gago, mafoko a gago a utlwilwe; mme ke tsile ka ntlha ya mafoko a gago. 13Kgosana ya bogosi jwa Peresia ya ganela le nna ka malatsi a le 21, mme bona, Mikaele, mongwe wa dikgosana tse dikgolo, a tla go nthusa; mme ka sala teng le dikgosi tsa Peresia. 14Jaana ke tsile go go tlhaloganyetsa se se tlaa dirafalelang batho ba gaeno mo metlheng ya bofelo; gonne ponatshegelo e sa na le malatsi a le mantsi.”
15Ya re a sena go bua le nna ka fa mafokong a, ka digela matlho a me fa fatshe, ka nna semumu fela. 16Mme bonang, mongwe yo o tshwanang le tshwano ya bomorwa batho a ama dipounama tsa me, foo ka tswa molomo ka bua, ka raya yo o emeng fa pele ga me ka re: “Morena wa me wee, mahutsana a me a boetse mo go nna ka ntlha ya ponatshegelo, mme ga ke a salelwa ke thata epe. 17Gonne motlhanka wa morena yo wa me, o ka bua jang le morena yo wa me? Gonne ka ga me, ka bonako fela ga bo go no go sa sale thata epe mo go nna, le gone go no go sa sale mowa ope mo go nna.”
18Foo mongwe a nkama gape, yo o ponalo e tshwanang le ya motho, mme a nthatafatsa. 19A nthaya a re: “Wena monna yo o ratwang thata, se boife; kagiso e nne nao, nna thata. Ee, o nne thata.” Ya re a bua le nna ka bo ke thatafala, mme ka re: “A Morena wa me a bue; gonne o nthatafaditse.”
20Foo a re: “A o itse ka fa ke tsileng mo go wena ka teng? Mme jaanong ke tlaa bowa ke ya go tlhabana le kgosana ya Peresia. Mme e tlaa re ke tswa, bona, kgosana ya Gerika e tlaa tla. 21Mme ke tlaa go bolelela se se kwadilweng mo lokwalong lwa boammaaruri; mme ga go na ope yo o emeng le nna ntlheng ya dilo tse, fa e se Mikaele kgosana ya lona.”
