DANIELE 9

₁E rile ka ngwaga wa ntlha wa ga Dario morwa Ahasuero, wa losika lwa Bamete yo o ne a dirwa kgosi ya lefatshe la Bakalatea; ₂ka ngwaga wa ntlha wa puso ya gagwe, nna Daniele ka tlhaloganya ka dikwalo palo ya dinyaga, tse lefoko la ga Jehofa le tsileng mo go Jeremia moperofeti ka ga tsone, tsa go dirafatsa ditshwafalo tsa Jerusalema, e bong dinyaga di le 70. ₃Ka lebisa sefatlhogo sa me kwa go Morena Modimo, go batla ka morapelo le mekokotlelo, ka go ikitsa go ja, le ka letsela la kgetse, le ka melora.

₄Ka rapela Jehofa Modimo wa me, ka ipolela, ka re: “Morena, Modimo o mogolo le o o boitshegang, yo o tshegetsang kgolagano le boutlwelobotlhoko le ba ba mo ratang le ba ba bolokang ditaolo tsa gagwe. ₅Re leofile; re dirile ka bokgopo, re ikepile, re tsuolotse, re fapogile dikaelo tsa gago le dikatlholo tsa gago. ₆Le gone ga re a reetsa baperofeti batlhanka ba gago, ba ba buileng ka leina la gago le dikgosi tsa rona, le dikgosana tsa rona, le borraetsho, le batho botlhe ba lefatshe. ₇Morena, tshiamo ke ya gago, mme sa rona ke go tlhonya ga sefatlhogo jaaka gompieno; e bong sa batho ba Juta, le sa banni ba Jerusalema, le sa Baiseraele botlhe, ba ba gaufi le ba ba kgakala mo mafatsheng otlhe kwa o ba leleketseng teng, ka ntlha ya tlolo ya bone e ba go tloletseng ka yone. ₈Morena, sa rona ke go tlhonya ga difatlhogo, le sa dikgosi tsa rona, le sa dikgosana tsa rona, le sa borraetsho, ka re go leofetse. ₉Sa Morena Modimo wa rona ke mautlwelobotlhoko le maitshwarelo; gonne re mo tsuololetse; ₁₀le gone ga re a akela lentswe la ga Jehofa Modimo wa rona, go sepela mo melaong ya gagwe e o e beileng fa pele ga rona ka baperofeti batlhanka ba gagwe. ₁₁Ee, Baiseraele botlhe ba tlodile molao wa gago ka ba fapoga fela, gore ba tle ba se ka ba akela lentswe le gago; ke gone ka moo phutso e goromeleditsweng mo go rona, le ikano e e kwadilweng mo molaong wa ga Moše motlhanka wa Modimo; gonne re o leofetse. ₁₂O tlhomamisitse mafoko a one a o re nyaditseng ka one, le a o nyaditseng ka one baatlhodi ba rona, ba ba kileng ba ne ba re atlhola, ka go re leretse bosula jo bogolo; gonne fa tlase ga legodimo lotlhe ga go ise go ke go dirwe jaaka go diretswe Jerusalema. ₁₃Jaaka go kwadilwe mo molaong wa ga Moše, bosula jotlhe jo bo tsileng mo go rona; le fa go ntse jalo, ga re ise re ke re lope botsalano jwa ga Jehofa Modimo wa rona, gore re sokologe mo maikepong a rona, mme re itse go lemoga boammaaruri jwa gago. ₁₄Ke gone ka moo Jehofa o tlhagafaletseng bosula, mme o bo lerile mo go rona; gonne Jehofa Modimo wa rona o tshiamo mo ditirong tsotlhe tsa gagwe, tse o di dirang, mme rona ga re a akela lentswe la gagwe.

₁₅“Jaana, Morena Modimo wa rona, yo o ntshitseng batho ba gago mo lefatsheng la Egepeto, ka seatla se se thata, mme o itiretse leina jaaka go ntse gompieno; re leofile, re ikepile. ₁₆Ao Morena, ka fa tshiamong yotlhe ya gago, ke a go rapela, a bogale jwa gago le tšararego ya gago, di busiwe mo motseng wa Jerusalema, thaba ya gago e e boitshepo; gonne ka ntlha ya maleo a rona, le ka ntlha ya maikepo a borraetsho, Jerusalema le batho ba gago ke kgobo mo go botlhe ba ba mo tikologong ya rona. ₁₇Ke gone jaana Modimo wa rona, utlwa morapelo wa motlhanka wa gago, le mekokotlelo ya gagwe, mme o phatsimise sefatlhogo sa gago mo felong ga gago ga boitshepo mo go swafetseng ka ntlha ya Morena. ₁₈Ao Modimo wa me, sekega tsebe, mme o utlwe; buduloga matlho, mme o bone ditshwafalo tsa rona, le motse o o bidiwang ka leina la gago; gonne ga re ise mekokotlelo ya rona fa pele ga gago ka ntlha ya ditshiamo tsa rona, fa e se ka ntlha ya mautlwelobotlhoko a gago fela a magolo. ₁₉Morena, a ko o utlwe; Morena, a ko o itshwarele; Morena, reetsa o dire; o se ka wa diega; ka ntlha ya gago, Modimo wa me, ka go bo motse wa gago o, le batho ba gago ba bidiwa ka leina la gago.”

₂₀E rile ke sa ntse ke bua, ke rapela, ke ipolela boleo jwa me le boleo jwa batho ba gaetsho Baiseraele, ke isa mokokotlelo wa me fa pele ga Jehofa Modimo wa me ka ga thaba e e itshepileng ya Modimo wa me; ₂₁ee, ya re ke sa ntse ke bua mo morapelong, monna yoo Gaberiele, yo nkileng ka mmona mo ponatshegelong mo tshimologong, ka a fofisitswe ka bofefo, a nkama e ka ne e le ka lobaka lwa seromololo sa maitseboa. ₂₂Mme a ntlhaloganyetsa, a bua le nna, a re: “Daniele, ke tsile go go dira setswerere mo tlhaloganyong. ₂₃E rile mo tshimologong ya mekokotlelo ya gago taolo ya tswa, mme ke tsile go go bolelela; gonne o ratwa thata; ke gone o akanye selo se, mme o tlhaloganye ponatshegelo.

₂₄“Batho ba gaeno le motse wa gaeno o o boitshepo, go laoletswe dibeke di le 70, tsa go wetsa tlolo, le go khutlisa maleo, le go direla boikepo tetlanyo, le go tsenya tshiamo e e sa khutleng, le go kanela ponatshegelo le perofeso, le go tlotsa felo ga boitshepo mo go itshepileng. ₂₅Ke gone itse, o lemoge go re, go thaega ga go tswa ga taolo ya go šafatsa le go aga Jerusalema go ya go fitlha mo go yo o tloditsweng e bong kgosana, e tlaa nna dibeke di supa; le dibeke di le 62, mme o tlaa ba o agiwa gape, ka mmila le mosele e bong mo metlheng ya diphuduego. ₂₆E tlaa re dibeke tse di 62 di sena go feta, yo o tloditsweng o tlaa kgaolwa, mme o tlaa bo a se na sepe; mme batho ba kgosana e e tlaa tlang ba tlaa senya motse le felo ga boitshepo; mme bokhutlo jwa teng bo tlaa dirana le morwalela, mme go ya fela kwa bokhutlong go tlaa nna ntwa; ditshwafatso di laotswe. ₂₇E tlaa dira kgolagano e e tlhomameng le bantsi ka beke e le nngwe fela; mme ka bontlha nngwe jwa beke e tlaa khutlisa setlhabelo le seromololo; mme mo phukeng ya dilo tse di makgapha go tlaa tla mongwe yo o swafatsang; le go ya fela kwa bofelelong, e bile e le jo bo laotsweng, bogale bo tlaa thelwa mo moswafatsing.”