DANIELE 11

₁“Ka ga me, e rile ka ngwaga wa ntlha wa ga Dario wa Momete, ka ema, ka mo nitamisa, ka mo thatafatsa.”

₂“Jaana ke tlaa go supetsa boammaaruri. Bona, go tlaa nama go ema dikgosi di le tharo mo Peresia; ya bone e tlaa di gaisa tsotlhe kgakala ka go huma; mme e tlaa re e thatafetse ka dikhumo tsa yone e tlaa tlhotlheletsa botlhe go gana bogosi jwa Gerika.

₃“Kgosi nngwe e e nonofileng e tlaa ema, e e tlaa laolang ka puso e kgolo, e ba e dira ka fa e ratang ka gone. ₄E tlaa re e eme ka dinao bogosi jwa yone bo tlaa thujwa, bo tlaa kgaoganyediwa kwa diphefong tsoo nne tsa legodimo, mme e seng kwa go ba losika lwa ga yone, le e seng ka fa pusong e e ne e busa ka yone; gonne bogosi jwa yone bo tlaa khumolwa, bo khumolelwa ba sele kwa ntle ga bao.

₅“Kgosi ya borwa e tlaa nna thata, le kgosana nngwe ya yone; mme e tlaa nna thata bogolo go yone, mme e tlaa nna le puso; puso ya yone e tlaa nna puso e kgolo. ₆E tlaa re go sena go feta dinyaga, di tlaa ikopanya; morwadia kgosi ya borwa o tlaa tla kgosing ya botsheka go dira tumalano nayo; mme ga a ketla a salelwa ke thata ya letsogo la gagwe; le yone kgosi ya botsheka ga e ketla e ema le fa e le letsogo la yone; ene mosadi o tlaa ntshiwa le ba ba mo isitseng, le ene yo o mo tsetseng, le ene yo o mo thatafaditseng mo metlheng eo. ₇Mo letlhogeleng lengwe la metswe ya mosadi, mongwe o tlaa tswa a ema mo bonnong jwa gagwe, yo o tlaa tlang mo ntweng, mme a tsena mo kagong ya tlhabanelo ya kgosi ya botsheka, mme o tlaa tlhabana nabo, a ba fenya. ₈Le yone medimo ya bone, le ditshwantsho tsa bone tse di thetsweng, le ka dilwana tsa bone tse dintle tsa selefera le tsa gouta, o tlaa di isa botshwarong kwa Egepeto; mme e tlaa re ka dinyaga dingwe e khutlele kgosi ya botsheka. ₉O tlaa tla mo lefatsheng la kgosi ya borwa, mme o tlaa boela kwa lefatsheng la ga gabo.

₁₀“Bomorwawe ba tlaa epa dira, ba phutha bontsi jwa dintwa tse dikgolo, tse di tlaa tlang, di farafara di ralala; mme ba tlaa boa ba dira ntwa go ya fela kwa kagong ya gagwe ya tlhabanelo. ₁₁Kgosi ya borwa e tlaa tlala bogale, e tlaa bolola e ya go tlhabana nae, e bong le kgosi ya botsheka; mme yone e tlaa bolotsa bontsi jo bogolo, mme bontsi joo bo tlaa tsenngwa mo seatleng sa gagwe. ₁₂Bontsi joo bo tlaa tlosiwa, mme pelo ya gagwe e tlaa godisiwa; o tlaa diga batho ba le makgolokgolo, mme ga a ketla a fenya.

₁₃“Mme kgosi ya botsheka e tlaa boa, e tlaa bolotsa bontsi jo bo fetang jwa pele; e tlaa tla mo bokhutlong jwa metlha, e bong jwa dinyaga, e na le ntwa e le kgolo le thoto e le tona.

₁₄“E tlaa re mo metlheng eo batho ba le bantsi ba tlaa tsogologela kgosi ya borwa; le bana ba bathubakanyi mo bathong ba gaeno ba tlaa ikgodisa ba re ba tlhomamisa ponatshegelo; mme ba tlaa wa. ₁₅Jalo kgosi ya botsheka e tlaa tla, e tlaa diga lomota, e tlaa gapa motse o o thekeleditsweng thata; le dibolao tsa wa borwa ga di ketla di ema, le fa e le batho ba gagwe ba ba tlhophegileng, le gone ga go ketla go dira le nonofo epe ya go ema. ₁₆Ene yo o tlaa mmololelang o tlaa dira ka fa go rateng ga gagwe, mme ga go na ope yo o tlaa emang fa pele ga gagwe; o tlaa ema mo lefatsheng le le galalelang, mo seatleng sa gagwe go tlaa bo go le tshenyo.

₁₇“O tlaa itlhomamisa go tla ka thata ya bogosi jotlhe jwa gagwe, a bile a na le ba ba thokgameng; o tlaa dira go rata ga gagwe; mme o tlaa mo naya morwadia basadi, go senya mosadi yo; mme mosadi ga a ketla a ema, le fa e le go nna ntlheng ya gagwe. ₁₈Morago ga mo, o tlaa leba kwa ditlhakeng, o tlaa di gapa di le dintsi; mme kgosana nngwe e tlaa khutlisa kgobo e o ne a kgoba ka yone. Ee, e tlaa ba e busetsa kgobo ya gagwe mo go ene ka esi. ₁₉Foo o tlaa menoga a leba kwa dikagong tsa tlhabanelo tsa kwa lefatsheng la ga gabo; o tlaa kgopiwa a wa, mme ga a ketla a bonwa.

₂₀“Foo go tlaa ema mo bonnong jwa gagwe mongwe yo o tlaa dirang gore mokgethisi a ralale kgalalelo ya bogosi; mme e tlaa re go ise go fete malatsinyana mangwe o tlaa senngwa, e seng mo bogaleng, le fa e le mo tlhabanong.

₂₁“Mo bonnong jwa gagwe go tlaa ema motho yo o nyatsegang, yo ba se kang ba mo naya tlotlo ya bogosi; ene o tlaa tla mo motlheng wa boiketlo, mme o tlaa bona bogosi ka mafoko a a borethe. ₂₂Ba tlaa kgokgoediwa fa pele ga gagwe ka mabogo a morwalela, mme ba tlaa thujwa; ee, le yone kgosana ya kgolagano. ₂₃Morago ga tumalano e e dirilweng nae o tlaa dira ka tsietso; gonne o tlaa tla, mme o tlaa thatafala ka batho ba bannye. ₂₄E tlaa re mo motlheng wa boiketlo o tlaa tla fela mo mafelong a a monono o mogolo a kgaolo eo ya lefatshe. O tlaa dira se borraagwe ba se kang ba se dira, le fa e le borra ba borraagwe; o tlaa gasetsa mo go bone kgapo, le thopo, le thoto. Ee, o tlaa logela dikago tse di thata tsa phemelo maano a gagwe, e le ka lobaka.

₂₅“O tlaa tsosetsa kgosi ya borwa thata ya gagwe, le bopelokgale jwa gagwe ka ntwa e kgolo; mme kgosi ya borwa e tlaa dira ntwa mo tlhabanong ka ntwa e kgolo thata, e e nonofileng mo gogolo; mme ga e ketla e ema, gonne ba tlaa e logela maano. ₂₆Ee, bone ba ba jang dijo tsa gagwe ba tlaa mo senya; mephato ya gagwe e tlaa penologa, mme bantsi ba tlaa wa ba bolailwe. ₂₇Ka ga dikgosi tse tsoo pedi, pelo tsa tsone di tlaa bo di laotse go senya, di tlaa bua maaka fa lomating lo le longwe fela lwa bojelo; mme ga go ketla go tlhogonolofala; gonne bokhutlo bo tlaa nama bo nna ka lobaka lo lo laotsweng. ₂₈Foo o tlaa boela lefatsheng la ga gabo ka thoto e le tona; mme pelo ya gagwe e tlaa tlhabana le kgolagano e e itshepileng; mme o tlaa dira go rata ga gagwe, a itse go boela lefatsheng la ga gabo.

₂₉“E tlaa re mo lobakeng lo lo laotsweng o tlaa boa, a ya kwa borwa; mme mo motlheng wa morago ga go ketla go nna jaaka mo motlheng wa pele. ₃₀Gonne dikepe tsa Kitime di tlaa tla go tlhabana nae; ke gone ka moo o tlaa hutsafalang, mme o tlaa boa, o tlaa galefela kgolagano e e itshepileng, mme o tlaa dira se o se ratang; mme o tlaa boa fela, mme o tlhokomela bone ba ba latlhileng kgolagano e e itshepileng. ₃₁Dibolao di tlaa nna ntlheng ya gagwe, mme ba tlaa tlhapatsa felo ga boitshepo, e bong kago ya tlhabanelo, mme ba tlaa tlosa tshupelo e e fisiwang ya metlha yotlhe, mme ba tlaa tlhoma makgapha a a swafatsang. ₃₂Ba ba ikepang ka ga kgolagano, o tlaa ba timetsa ka mafoko a a borethe; mme batho ba ba itseng Modimo wa bone ba tlaa nna thata, ba tlaa dira ditiro tse dikgolo.

₃₃“Ba ba botlhale mo bathong ba tlaa ruta batho ba le bantsi; le fa go ntse jalo ba tlaa wa ka tšhaka le ka kgabo ya molelo, ka botshwaro, le ka go thopiwa ka malatsi a le mantsi. ₃₄Jaana e tlaa re ba wa, ba tlaa thusiwa ka thusonyana; le batho ba le bantsi ba tlaa ikopanya nabo ka mafoko a a borethe. ₃₅Bangwe ba bone ba ba botlhale ba tlaa wa, gore ba itshekisiwe, le gore ba nne bantle, le go ba sweufatsa, go ya go fitlha mo lobakeng lwa bokhutlo; gonne go sa ntse go le ga lobaka lo lo laotsweng.

₃₆“Kgosi e tlaa dira ka fa go rateng ga yone; e tlaa itsholetsa e itira mogolo bogolo go medimo yotlhe, e tlaa bua dilo tse di gakgamatsang ka ga Modimo wa medimo; e tlaa tlhogonolofala go tsamaya tšhakgalo e dirafale; gonne se se laotsweng se tlaa dirwa. ₃₇Le gone ga e ketla e tlhokomela medimo ya borraa yone, le fa e le keletso ya basadi, le fa e le go tlhokomela modimo ope; gonne e tlaa ikgodisa godimo ga botlhe. ₃₈Kwa ga yone e tlaa tlotla modimo wa dikago tsa tlhabanelo; mme modimo mongwe o borraa yone ba ne ba sa o itse e tlaa o tlotla ka gouta le ka selefera, le ka majana a a tlhokegang le ka dilo tse di eletsegang. ₃₉E tlaa direla dikago tsa tlhabanelo tse di thata bogolo ka thuso ya modimo mongwe wa seeng; le fa e le mang yo o ipolelang yone, e tlaa mo godisa ka kgalalelo; e tlaa ba laodisa batho ba le bantsi, mme e tlaa aba lefatshe ka tuelo.

₄₀“E tlaa re mo motlheng wa bokhutlo kgosi ya borwa e tlaa ganela nayo; mme kgosi ya botsheka e tlaa tla go tlhabana le yone jaaka setsuatsue ka dikara, le ka bapalami ba dipitse, le ka dikepe di le dintsi; e tlaa tsena mo mafatsheng, e tlaa farafara e ralala. ₄₁E bile e tlaa tsena le mo lefatsheng le le galalelang, mme mafatshe a le mantsi a tlaa ribegediwa; mme mafatshe a, a tlaa gololwa mo seatleng sa yone, e bong Edome, le Moabe, le ditlhogo tsa bana ba Amone. ₄₂Gape e tlaa otlololela mafatshe letsogo la yone; le lefatshe la Egepeto ga le ketla le falola. ₄₃E tlaa nna le taolo mo dikhumong tsa gouta le selefera, le mo dilong tsotlhe tse di tlhokegang tsa Egepeto; le Balebia le Baethiopia ba tlaa nna fa dikgatong tsa yone. ₄₄Ditumedi tse di tswang ntlheng ya botlhabatsatsi le ntlheng ya botsheka di tlaa e hudua; e tlaa bolola ka tšararego e kgolo, e ya go senya le go tlosetsa ruri batho ba le bantsi. ₄₅E tlaa tlhoma megope ya ntlo ya yone ya bogosi fa gare ga lewatle le thaba e e boitshepo e e galalelang; le fa go ntse jalo e tlaa fitlha mo bokhutlong jwa yone, mme go se ope yo o tlaa e thusang.