Siraka 46

₁Yoxuwa n'wana Nuni a a ri nhenha enyimpini,

a dya ndzhaka ya Muxe entirhweni wa ku profeta.

Hi ku endla leswi vito ra yena ri swi vulaka,

ú vile mukutsuri lonkulu wa vanhu va HOSI Xikwembu.

Ú hlurile valala va vona lava a va hlasela,

leswaku a nga nyika Vaisraele tiko ra vona.

₂A a sasekile ngopfu loko a tlakusile voko,

kutani a rhangela Vaisraele ku ya hlasela miti!

₃A ku vanga ni loyi a lweke na yena,

hikuva a a lwa nyimpi yo hlawuleka ya HOSI Xikwembu.

₄Xana mi tsundzuka hilaha a yimiseke dyambu hakona, ri nga fambi,

kutani siku ri nga hatli ri pela, kambe ri fana ni masiku mambirhi?

₅Loko valala va yena va n'wi hlasela ematlhelo hinkwawo,

ú khongerile Xikwembu xa matimba hinkwawo ni xa le henhla-henhla,

kutani xi n'wi hlamurile

hi ku pfuxa bubutsa ro chavisa ni xihangu.

₆HOSI Xikwembu xi nisile xihangu hi matimba ehenhla ka valala va xona,

ni ku va dlayetela exiphandzeni xa Beta-Horoni.

Hikokwalaho vamatiko va tiva matimba ya Yoxuwa

ni leswaku a a lweriwa hi HOSI Xikwembu xa matimba hinkwawo,

hikuva a a xi landza hi mbilu ya yena hinkwayo.

₇Yoxuwa na Kalebe n'wana Yefune

a va ri lava tshembekeke ku kondza loko Muxe a fa.

Hi vumbirhi bya vona va yimile va tiya emahlweni ka nhlengeletano hinkwayo ya Vaisraele,

va va yimisa ku vilela ni ku dzumadzuma,

va va sivela ni ku dyoha.

₈Exikarhi ka vanhu va 600 000 lava tsemakanyeke emananga,

hi vona ntsena lava ponisiweke

ni ku pfumeleriwa ku dya ndzhaka ya vona

ni ku nghena etikweni leri khulukaka ntswamba ni vulombe.

₉HOSI Xikwembu xi tiyisile Kalebe,

kutani loko a dyuharile

a a ri ni matimba ya ku tlhandlukela egangeni ra swintshabyana

ni ku ri teka ri va ndzhaka ya yena ni vatukulu va yena.

₁₀Hi ndlela leyi Vaisraele hinkwavo va ta swi vona

leswaku swi sasekile ku landza HOSI Xikwembu.

₁₁A ku ri ni vaavanyisi lava un'wana ni un'wana wa vona a twakaleke.

A va gandzelanga swikwembu swa hava,

a va tshikanga HOSI Xikwembu ni siku ni rin'we.

A va nkhensiwe!

₁₂Vaavanyisi lava hi va fundzhaka

a va pfuxiwe emasirheni,

va tlhela va hanya eka vatukulu va vona.

₁₃Samiele ú vile murhandziwa wa HOSI Xikwembu.

Tanihi muprofeta wa xona, ú sungurile mfumo wa Israele

ni ku veka tihosi leti fumaka vanhu va xona.

₁₄Ú avanyisile Vaisraele hi ku landza nawu wa HOSI Xikwembu,

kutani xi va sirhelela.

₁₅Leswi a a ri munhu wo tshembeka, ú amukeriwile tanihi muprofeta wa xiviri.

Vanhu va n'wi tshembile tanihi mavonakule hikwalaho ka marito ya yena.

₁₆Loko valala va yena va n'wi songela ematlhelweni hinkwavo,

ú khongerile Xikwembu xa matimba hinkwawo

ni ku xi humesela gandzelo ra xinyimpfana lexa ha mamaka.

₁₇Kutani HOSI Xikwembu xi balekisa tilo xi ri dumisa swinene,

ku vulavula ka xona ku twakala eka mpfumawulo lowukulu.

₁₈Kutani xi dlayetela varhangeri hinkwavo va muti wa Tiri,

ni ku herisa vafumi hinkwavo va Vafilista.

₁₉Loko Samiele a ri kusuhi ni ku fa,

ú humesile vumbhoni emahlweni ka HOSI Xikwembu na Sawulo loyi a totiweke ku va hosi ya tiko, a ku:

“A ndzi tekanga nchumu xa munhu,

hambi ti ri tintangu ta yena.”

Kutani a ku vanga ni loyi a n'wi kanetaka.

₂₀Hambiloko a file, ú vhumbile,

a paluxela hosi Sawulo hilaha a nga ta fa hakona.

A vulavula ni ku vhumba a ri esirheni

ku herisa ku homboloka ka vanhu va yena.