Siraka 45

₁HOSI Xikwembu xi humesile ntukulu un'wana va Yakobo

la nga kombiwa tintswalo hi vanhu hinkwavo, la rhandziweke hi Xikwembu ni vanhu.

Munhu loyi a a ri Muxe.

Vito ra yena ri katekile!

₂Xi n'wi tlakusile a fana ni tintsumi hi ku dzuneka,

xi n'wi nyike matimba ku chavisa valala va yena.

₃Hi rito ra yena ú vangile makhombo.

HOSI Xikwembu xi n'wi tlakusile emahlweni ka tihosi.

Xi n'wi vekile ku va murhangeri wa vanhu va xona,

xi n'wi kombisile vukona bya xona.

₄Xi n'wi hlawurile exikarhi ka vanhu hinkwavo,

kutani xi n'wi hlawulekisile hikuva a a ri munhu wo tshembeka ni ku titsongahata.

₅Xi vulavurile na yena

ni ku n'wi nghenisa epapeni ra munyama.

Kutani xi n'wi nyikile milawu leyi nyikaka vutomi ni vutivi, xi ri karhi xi n'wi languta,

leswaku a ta dyondzisa Vaisraele swileriso swa ntwanano wa xona.

₆HOSI Xikwembu xi tlakusile Aroni, wa nyimba ya ka Levi,

loyi a ringanaka ni makwavo Muxe hi ku hlawuleka.

₇Xi endlile ntwanano lowu nga heriki na yena,

xi n'wi vekile ku va muprista wa vanhu va xona.

Xi n'wi fundzhile hi ku n'wi nyika

swiambalo leswi kombaka ndzhuti.

₈Xi n'wi ambexe swiambalo swo saseka swinene,

xi n'wi tiyisa hi swiambalo leswi kombisaka xiyimo xa le henhla xa yena,

leswi nga swiburukwana swa ntsembyani,

ni nguvu yo leha, ni efodi.

₉Emakumu ka nguvu yo leha xi rhungelela swifaniso swa swihenge,

exikarhi ka swona xi vekela swingelengele swa nsuku,

leswaku loko Aroni a famba, ku ba ka swona ku twiwa eTempeleni,

kutani HOSI Xikwembu xi tsundzuka vanhu va xona.

₁₀HOSI Xikwembu xi nyikile Aroni xiambalo xo leha

lexi rhungiweke hi voya bya muhlovo wa nsuku, ni wa rihlaza ra tilo, ni wa xivunguvungu,

ni xincekana xa le xifuveni lexi nga na vuhlolotwana bya “Urimi” na “Thumimi”

₁₁Xi n'wi nyikile ni voya bya muhlovo lowo tshwuka lebyi lukiweke hi mutivi wa ntirho lowu,

ni maribye ya nkoka lama kevetliwaka ku fana ni mfungho,

lama vekeriweke eka xiangarhelo xa nsuku hi mutivi wa ntirho lowu,

lama vekeriweke eka xincekana xa le xifuveni,

leswaku xi tsundzuka tinyimba ta 12 ta Vaisraele.

₁₂Xi tlhela xi n'wi nyika duku ra nhloko leri nga na xidlodlo xa nsuku

lexi kevetliweke marito lama nge: “La hlawuleriweke HOSI.”

Xidlodlo xa kona xi furiwa hi vutivi, xi va ntirho wo xonga wa mavoko,

xi fundzhisa swinene ni lava va xi ambalaka.

₁₃Loko Aroni a nga si velekiwa, swilo leswi hinkwaswo a swi vanga kona ni siku ni rin'we.

Ku hava la swi ambaleke kumbe la nga ta swi ambala handle ka Aroni ni vatukulu va yena.

₁₄Mapa ya magandzelo ya swa le masin'wini

ya fanele ya hisiwa kambirhi hi siku.

₁₅Muxe ú hlawulekisile Aroni hi ku n'wi chela enhlokweni mafurha yo hlawuleka.

Ntwanano lowu nga heriki wu endliwile na Aroni ni vana va yena,

leswaku va ta va vaprista lava tirhelaka HOSI Xikwembu,

kutani va ta katekisa vanhu hi vito ra xona.

₁₆HOSI Xikwembu xi hlawurile Aroni

exikarhi ka vanhu hinkwavo ku xi humesela magandzelo,

ni ku hisa mirhi ya risuna yo nun'hwela leswaku xi tsundzuka vanhu va xona,

ni ku susa swidyoho swa vona.

₁₇Xi n'wi nyikile swileriso swa xona ku swi hlayisa,

ni matimba ya ku avanyisa vanhu va xona ni ku va dyondzisa nawu wa xona.

₁₈Loko vanhu va Xikwembu va ri emananga,

nkarhi wun'wana vanhu vambe lava nga Datani na Abirama na Kora ni vaseketeri va vona

va venga ni ku hlundzukela Muxe,

kutani va boha makungu yo n'wi pfuka.

₁₉HOSI Xikwembu xi vona leswi va swi endleke, kutani xi nga tsaki.

Kambe xi hlundzuka swinene,

kutani xi endla singita,

xi va herisa hi ndzilo.

₂₀Xi katekisile nakambe Aroni

hi ku n'wi fundzha hi ndlela leyi landzelaka.

Xi lerisile leswaku mihandzu leyi rhangaka ku vupfa ya leswi byariweke emasin'wini, yi ta va ya yena,

leswaku vaprista va nga twi ndlala ni siku ni rin'we.

₂₁Swakudya swa vaprista i magandzelo lama humeseleriwaka HOSI Xikwembu,

lama xi ma nyikeke Aroni ni vatukulu va yena.

₂₂Kambe Aroni a nga vanga ni ndzhaka etikweni ra Israele,

hambi yi ri nsimu a nga vanga na yona,

hikuva Xikwembu hi xona nsimu ya yena

ni ndzhaka ya yena.

₂₃Ku hava lava tlulaka Finiyasi n'wana Eliyazara

hi ku hisekela Xikwembu handle ka Muxe na Aroni.

Loko Vaisraele hinkwavo va tshikile Xikwembu,

Finiyasi a tiya ni ku xi tirhela hi vunhenha,

kutani a endla leswaku swidyoho swa vona swi susiwa.

₂₄Hikokwalaho HOSI Xikwembu xi endlile na yena ntwanano lowu tisaka ku rhula,

lowu vulaka leswaku yena ni vatukulu va yena

va ta va varhangeri va xivandla lexo hlawuleka ni vanhu va xona,

ni vaprista lavakulu hilaha ku nga heriki.

₂₅Ntwanano wun'wana wu endliwile

na Davhida n'wana Yese, wa ka Yuda,

eka wona vuhosi bya tatana byi va ndzhaka ya n'wana wa yena ntsena.

Kambe vuprista bya Aroni byi ta va ndzhaka ya vatukulu va yena hinkwavo.

₂₆[Sweswi dzunisani HOSI Xikwembu, lexi nga lexinene,

lexi xi mi ambexeke hi ku dzuneka!]

Xi mi nyike vutlhari

ku avanyisa vanhu va xona hi ku lulama,

leswaku minkateko ya vona yi nga nyamalali,

ni ku dzuneka ka vona ku va ndzhaka ya vatukulu va vona.