Siraka 47

₁Endzhaku ka Samiele, ku humelele Natani,

loyi a a ri muprofeta enkarhini wa Davhida.

₂Tanihi laha mafurha ma hlawuriwaka hakona enyameni ya xifuwo xa mhamba ya xinakulobye,

na yena Davhida ú hlawuriwile exikarhi ka Vaisraele.

₃A a tlanga ni tinghala ni swinkankanka

tanihi loko swi ri swinyimpfana.

₄Loko a ha ri mufana, ú dlayile xihontlovila ku kutsula varikwavo.

Ú tekile ribye, a ri hoxa hi xipelupelu,

kutani a herisa ku tikukumuxa ka Goliyadi.

₅Ú khongerile Xikwembu xa matimba hinkwawo,

kutani xi n'wi nyikile ntamu

wa ku dlaya nhenha yo chavisa enyimpini,

leswaku vanhu va xona va kota ku tlhela va tiyile.

₆Vaisraele va n'wi fundzhile hikuva ú hlurile valala va magidi-gidi,

kutani loko a vekiwile ku va hosi ya vona,

va n'wi dzunisile hikuva a a katekisiwile hi HOSI Xikwembu.

₇Ú herisile valala va yena matlhelo hinkwawo,

a herisela makumu matimba ya Vafilista ku fika ninamuntlha.

₈Davhida ú nkhensile ni ku dzunisa Muhlawuleki, HOSI Xikwembu xa matimba hinkwawo

eka hinkwaswo leswi a swi endleke.

Ú rhandzile mutumbuluxi wa yena

a n'wi dzunisa hi tinsimu hi mbilu ya yena hinkwayo.

₉Ú vekile vayimbeleri emahlweni ka alitari,

leswaku va ta yimbelela tinsimu to saseka.

₁₀Ú hlawurile masiku man'wana ya lembe

leswaku ma va ya minkhuvo yo xonga.

Xivandla lexo hlawuleka xi pfume hi tinsimu siku hinkwaro,

vito ra Xikwembu ri karhi ri dzunisiwa.

₁₁HOSI Xikwembu xi rivalerile swidyoho swa Davhida,

kutani xi n'wi nyike matimba lama nga heriki.

Xi endlile ntwanano na yena ni ku n'wi tshembisa

leswaku yena ni vatukulu va yena va ta fuma Vaisraele hi ndlela yo nkhenseka.

₁₂Solomoni n'wana Davhida ni munhu wa vutlhari a sala a fuma,

a hanya hi ntsako hikwalaho ka tata wa yena.

₁₃A ku vanga na nyimpi enkarhini wa ku fuma ka Solomoni.

HOSI Xikwembu xi n'wi nyikile ku rhula hinkwako,

leswaku a xi xixima hi ku xi akela yindlu,

xi nga Xivandla lexo hlawuleka lexi nga ta va kona hilaha ku nga heriki.

₁₄We Solomoni, u tlharihile swinene evuntshweni bya wena!

Vutivi bya wena a byi fana ni nambu [wa Nilo] hi ku enta ka byona.

₁₅Miehleketo ya wena a yi funengeta misava hinkwayo,

kutani swivuriso ni mitshayito ya wena a swi tiviwa hinkwako.

₁₆Vito ra wena na rona a ri tiviwa eswihlaleni swa le kule,

kutani vanhu va ku rhandzile hikwalaho ka ku rhula ka wena.

₁₇Tinsimu ta wena, ni swivuriso swa wena, ni swifaniso swa wena,

ni tinhlamulo ta wena swi hlamarisile matiko hinkwawo.

₁₈Hi vito ra HOSI Xikwembu,

xi nga xona Xikwembu xa Vaisraele,

we Solomoni, u tihlengeleterile nsuku ku fana ni thini,

ni silivhere tanihi ntsopfu.

₁₉Kambe u wisile vuhosi bya wena

hi ku etlela ni vavasati.

₂₀U onhile vito ra wena lerinene

ni ra vatukulu va wena.

Va xanisekile hikwalaho ka xihoxo lexi xa wena,

xi va vangela maxangu layo tala.

₂₁Tiko ri avanyisiwile,

kutani en'walungwini wa tiko ra Israele ku sungurile mfumo wun'wana.

₂₂Kambe HOSI Xikwembu xi ta komba tintswalo ta xona minkarhi hinkwayo,

xi nga ka xi nga hlweli ni ku hlayisa switshembiso swa xona.

Xi nga ka xi nga herisi vatukulu va Davhida,

loyi xi n'wi hlawuleke hi ku n'wi rhandza.

Xi pfumerile leswaku Vaisraele van'wana va sala va hanya,

ni xihluke xa Davhida xi ponisiwa.

₂₃Solomoni a hundza emisaveni kutani a lahliwa ni vatata wa yena.

Kavaloko un'wana wa vana va yena a sala a fuma.

N'wana loyi a a ri Rhobuwamu, a nga munhu wo kala mano ni xiphukuphuku lexikulu.

Swiendlo swa yena swi endle leswaku vanhu va tiko va n'wi pfukela.

Naswona ku ve na Yerobuwamu n'wana Nebati loyi a rhangeleke Vaisraele eku dyoheni

na Efrayimi endleleni leyo homboloka.

₂₄Vaisraele va dyohile ku tlula mpimo,

kutani va hlongoriwile etikweni ra vona.

₂₅Va ya emahlweni ku endla swiendlo hinkwaswo leswo homboloka

ku kondza loko Xikwembu xi va rihisela.