II Vamakabiya 4

₁Simoni loyi a vuriweke eku sunguleni, loyi a boxeke ta mali ya xuma xa Tempele ni ku karhata tiko ra yena, a hehla Oniya, a ku i Oniya a hlaseleke Heliyodoro ni leswaku i Oniya a vangeke ku nonon'hwa loku nga kona. ₂A engeta a ku Oniya ú lwisa mfumo wa Seluko, hambiloko a a ri yena muhlayisi wa muti, ni musirheleli wa varikwavo, ni muhisekeri wa milawu hinkwayo. _3-4Apoloniya, n'wana Menestewu ni murhangeri wa Siriyankulu na Fenikiya, a tiyisa Simoni eswiendlweni leswo homboloka swa yena. Kutani Simoni a ya emahlweni ku venga Vayuda, ku kondza a lerisa un'wana wa vayimeri va yena ku ya dlayetela vanhu. Oniya a ehleketa leswaku mhaka leyi yi ta va vangela khombo lerikulu, ₅kutani a kongoma eka hosi Seluko, a nga yi ku ya lumbeta varikwavo, kambe a ya hi xikongomelo xa ku endlela vanhu hinkwavo ni tiko hinkwaro leswinene. ₆A a lemuka leswaku loko hosi Seluko a nga kombisiwi timhaka ta tiko, a ti nga ka ti nga tsemiwi hi ku rhula, ni leswaku Simoni a nga ka a nga tshiki vuphukuphuku bya yena.

₇Loko Seluko a fa, ni loko Antiyoko la vuriwaka Epifani a sala a fuma, Yasoni makwavo wa Oniya a vekiwa Muprista lonkulu hi vukanganyisi. ₈Yasoni a ya nyika hosi silivhere ya 14 760 kg ni ku yi tshembisa silivhere ya 3 210 kg leyi nga ta huma eka swibalo swa nkarhi lowu taka. ₉Ehenhla ka leswi, a tshembisa ku tlhandlekela silivhere ya 6 150 kg, loko a pfumeleriwa ku aka yindlu ya mitlangu yo dyondzisela majaha eka yona ni ku tsarisa vanhu va Yerusalema va va vanhu va Antiyoka.

₁₀Hosi yi pfumela, kutani Yasoni a vekiwa Muprista lonkulu. Xikan'we Yasoni a endla leswaku varikwavo va hanya Xigriki. ₁₁A susa mimpfumelelo hinkwayo leyi tihosi ti yi nyikeke Vayuda, leyi a yi kumiwile hi Yohane tata wa Yupolemo, loyi a rhumeriweke ku endla ntwanano na xinakulobye ni Varhoma. Hiloko Yasoni a herisa mikhuva leyi fambelanaka ni nawu wa Xikwembu, kutani a nghenisa mikhuva leyintshwa leyi kanetanaka na wona. ₁₂Hi ku chivirika a aka yindlu ya mintlangu kusuhi ni khokholo ra Yerusalema, a sindzisa majaha ya tinganakana ta tiko ku ambala swihuku swa Vagriki. ₁₃Hikwalaho ka ku homboloka loku tlulaka mpimo ka Yasoni, Muprista lonkulu wa tihanyi ni la vekiweke handle ka nawu, ku navela ku hanya Xigriki ku ya emahlweni, ₁₄ku fikela loko vaprista va tshika mintirho ya vona emahlweni ka alitari. Va sandza Xivandla lexo hlawuleka ni ku lolohela magandzelo, kutani loko va twa nsimbhi leyi vitaka vanhu emintlangweni, va tsutsumela laha mintlangu yo homboloka ya ku pfinyana a yi phikisaniwela kona. ₁₅Va sola leswi swi fundzhiweke hi vatata wa vona, kutani va xixima ngopfu leswi a swi fundzhiwa hi Vagriki. ₁₆Hikokwalaho ke, va weriwa hi makhombo lamakulu, hikuva Vagriki va sungula ku lwisa ni ku xanisa Vayuda lava a va fundzha ni ku encisa swinene mikhuva ya Xigriki. ₁₇Hakunene, ku sola milawu ya Xikwembu, a hi mhaka leyitsongo; ntiyiso lowu wu ta paluxiwa erivaleni hi timhaka leti landzelaka.

₁₈Loko hosi yi ri kona emitlangwini leyi tlangiwaka endzhaku ka malembe man'wana ni man'wana ya 4 emutini wa Tiri, ₁₉lowa muhomboloki Yasoni a lerisa vavanuna van'wana lava tsariweke ku va vanhu va Antiyoka, leswaku va huma eYerusalema, va rhwale silivhere ya 60 kg, va ya humesela Herkuli gandzelo ha yona. Lava a va rhwala mali leyi, va vona swi nga faneli leswaku va yi tirhisa ku humesela gandzelo, kutani va yi tirhisa ku endla swin'wana. ₂₀Hikokwalaho, mali leyi Yasoni a a lava leswaku Herkuli a humeseriwe gandzelo ha yona, yi tirhisiwa hi vaheleketi va yona ku aka tingalava ta nyimpi.

₂₁Siku rin'wana, loko Apoloniya n'wana Menestewu a rhumiwa etikweni ra Egipta eku vekiweni ka Filometori a va hosi, ni loko Antiyoko Epifani a twa hi Apoloniya leswaku Filometori ú hundzukile nala wa mfumo wa yena, Antiyoko Epifani a kungela ku tisirhelela. Hikokwalaho, loko a fika emutini wa Yopa, a kongoma eYerusalema. ₂₂Yasoni ni vanhu hinkwavo va Yerusalema va n'wi amukela hi ndlela yo saseka ngopfu, va n'wi nghenisa emutini hi mavoni ni minkulungwana. Endzhaku ka sweswo, Antiyoko Epifani a kongoma eFenikiya.

₂₃Endzhaku ka malembe manharhu, Yasoni a lerisa Menela makwavo wa Simoni loyi a vuriweke eku sunguleni, leswaku a rhwala mali yin'wana a yi yisa eka Antiyoko Epifani ni ku hetisisa timhaka tin'wana leti a ti fanele ku tsemiwa. ₂₄Kambe loko Menela a fika emahlweni ka hosi, a yi ndhundhuzela hi moya wa matimba, kutani a tixavela vupristankulu, a yi nyika mali leyi tlulaka leyi Yasoni a a yi nyikile hosi hi silivhere ya 12 100 kg mali. ₂₅Loko Menela a kumile swileriso swa hosi, a tlhelela eYerusalema, a nga ri na xiyimo xa ku va Muprista lonkulu, kambe a ri ni lunya ni xifafa xa muxanisi lonkulu ni vukari bya xiharhi lexo leva. ₂₆Kutani ke, Yasoni loyi a tekeleke makwavo vupristankulu, a hlongoriwa etikweni ra Amoni. ₂₇Menela a ya emahlweni ku va Muprista lonkulu, kambe a nga ha hakelangi hi fanelo mali leyi a a yi tshembisile hosi, ₂₈hambiloko Sositrata ndhunankulu ya khokholo ra Yerusalema, loyi a a ri muhlengeleti wa ndzuvo, a tshamela ku kombela hakelo leyi. Hikokwalaho, Sosistrata na Menela va vitaniwa ku ya hlamusela hosi mhaka leyi. ₂₉Loko va suka va famba, Menela a hlawula makwavo Lisimako ku n'wi khomela vupristankulu, kutani Sosistrata a veka Krate, ndhunankulu ya masocha yo thoriwa lama humaka eKipra, ku lawula khokholo.

₃₀Loko timhaka ta ha famba hi ndlela leyi, vanhu va Tarso na Malo va hundzukela mfumo wa hosi, hikuva miti ya vona a yi nyikiwile eka wansati loyi a va ku i Antiyokisi, xigangu xa hosi. ₃₁Kavaloko hosi yi hatlisa ku ya timela mpfilumpfilu lowu, kutani yi veka Androniko un'wana wa tinganakana ta mfumo ku va muyimeri wa vuhosi bya yena. ₃₂Kambe Menela, hi ku ehleketa leswaku ú kume nkarhi wa kahle, a yiva swibya swin'wana swa nsuku swa Tempele a swi nyika Androniko; swibya swin'wana a swi xavisa eTiri ni le ka miti leyi vandzakaneke na wona. ₃₃Loko Oniya a twa mhaka leyi, a baleka a ya tumbela etempeleni yin'wana eDafni kusuhi na Antiyoka, kutani a paluxa swiendlo swa Menela erivaleni. ₃₄Hikokwalaho ke, Menela a kucetela Androniko exihundleni ku ya dlaya Oniya. Kavaloko Androniko a ya eka Oniya, a n'wi kanganyisa hi ku n'wi xeweta hi xinakulobye ni ku n'wi tshembisa leswaku a nga ka a nga n'wi dlayi. Hambiloko Oniya a nga n'wi tshembanga, Androniko a n'wi khongotela ku kondza a huma etempeleni lomu a tumbelaka kona. Xikan'we, hi ku sola milawu hinkwayo, Androniko a dlaya Oniya.

₃₅Vayuda ni vanhu vo tala va matiko man'wana, va kariha ngopfu hikwalaho ka ku dlayiwa ka Oniya. ₃₆Loko hosi yi vuya exifundzheni xa Kilikiya, Vayuda va Antiyoka va ya vilela eka yona hi ta nsele wa ku dlayiwa ka Oniya, Vagriki na vona va sola vugevenga lebyi. ₃₇Kavaloko Antiyoko Epifani a khomiwa hi gome lerikulu ni nhlomulo lowukulu, kutani a rila loko a tsundzuka ku tikhoma ni mahanyelo lamanene ya mufi. ₃₈A hlundzuka ku tlula mpimo, kutani a ya yima emahlweni ka Androniko, a n'wi hluvula xiambalo xa xivunguvungu, a handzula swiambalo swin'wana swa yena, a n'wi siya a lo dlúú, a n'wi rhendzelekisa ni muti hinkwawo, ku kondza a ya fika laha a dlayeke Oniya kona. Endzhaku ka swona, Antiyoko Epifani a lerisa leswaku wanuna loyi wo tsakela ku halata ngati a dlayiwa. Hi ndlela leyi HOSI Xikwembu xi ba Androniko hi nkhavi lowu wu n'wi fanelaka.

₃₉Ekarhini wolowo Lisimako, hi ku seketeriwa hi makwavo Menela, a a yiva swibya swo tala swa nsuku swa le Tempeleni. Loko mhaka leyi yi humesiwile erivaleni, vanhu va sungula ku hlangana ku pfukela Lisimako. ₄₀Loko ntshungu wu sungula ku hlundzuka ngopfu, Lisimako a hlomisa vavanuna va kwalomu ka 3 000, kutani vona va ya hlasela vanhu, va rhangeriwa hi Awurani, loyi a a ri wanuna wa vuphukuphuku lebyikulu lebyi a byi fambelana ni ku dyuhala ka yena. ₄₁Loko Vayuda lava hlengeletaneke exivaveni xa Tempele va vona leswi, van'wana va vona va rholela maribye, van'wana tihunyi, van'wana va olela nkuma lowu a wu ri alitarini, kutani hi mphesa-mphesa va swi hoxetela Lisimako ni vavanuna va yena. ₄₂Hi ndlela leyi va vavisa lavo tala va vona, van'wana va va dlaya, lava saleke va va cacarhisa hinkwavo, kutani muyivi wa swa le Tempeleni va n'wi dlaya kusuhi ni vuhlayiselo bya xuma xa Tempele.

₄₃Hikwalaho ka swona, Menela a vekiwa nandzu. ₄₄Loko hosi yi fika eTiri, vavanuna vanharhu lava rhumeriweke hi vakulukumba va Yerusalema va ta eka yona ku ta tenga nandzu wa Menela. ₄₅Kambe Menela loko a vona leswaku ú ta kumiwa a ri ni nandzu, a tshembisa Pitolemi n'wana Dorimene mali yo tala, leswaku a ta khorwisa hosi ku yima na yena. ₄₆Hikokwalaho, Pitolemi a kombela hosi ku suka ehubyeni, va huma handle wonge hiloko va lava ku ya titimula. Loko va ri ehandle, Pitolemi a khorwisa hosi ku hundzuluxa mianakanyo ya yona, ₄₇kutani yi rivalela Menela milandzu ya yena hinkwayo. Hikokwalaho, Menela a ntshunxiwa, hambiloko a ri yena la vangeke mikitsikitsi hinkwayo. Kambe vavanuna lavaya vanharhu, lava hambi va ri vanhu va tihanyi vo kota Vasikiti a va ta va ntshunxa hikuva a va nga ri na nandzu, hosi yi va avanyisela rifu. ₄₈Hi ndlela leyi, vavanuna lava a va yimerile Yerusalema ni vanhu va wona ni swibya swa Tempele hi mavulavulele ya vona, va avanyisiwa hi ku homboloka, kutani va dlayiwa. ₄₉Vanhu van'wana va Tiri va lava ku komba rivengo ra vona ra vugevenga lebyi, kutani va ya, va ya va lahla hi ndlela yo saseka ngopfu. ₅₀Kambe Menela a ya emahlweni ku va Muprista lonkulu hikwalaho ka makolo ya lava fumaka tiko. A kula eku hombolokeni ka yena minkarhi hinkwayo, kutani a hundzuka nala lonkulu wa varikwavo.