II Vamakabiya 3

₁Loko Oniya a ha ri Muprista lonkulu eYerusalema, ku rhula ni ku tsaka a swi ri kona emutini lowo hlawuleka ni milawu ya wona a yi landzeleriwa hi fanelo, hikwalaho ka vukhongeri bya Oniya ni hileswi a a venga leswo homboloka. ₂Tihosi hi toxe a ti fundzha Xivandla lexo hlawuleka ni ku dzunisa Tempele hi tinyiko to saseka ngopfu. ₃Seluko, hosi ya Asiya, a a hakelela swilo hinkwaswo leswi fambelanaka ni ntirho wa ku humesa magandzelo, hi mali ya ndzuvo ni swibalo swa yena.

₄Kambe munhu loyi va nge i Simoni, wa nyimba ya ka Benjamini ni murhangeri lonkulu wa mintirho ya Tempele, a phikisana ni Muprista lonkulu hi ta mafambisele ya rivala ro xaviselana ra muti. ₅Loko a hluleka ku khorwisa Oniya, a ya eka Apoloniya n'wana Traseyo, loyi enkarhini wolowo a a ri murhangeri wa Siriyankulu na Fenikiya. ₆A n'wi tivisa leswaku, evuhlayiselweni bya xuma xa Tempele ya Yerusalema, a ku ri ni mali leyi a yi tsandza vahlayi hi ku tala ka yona ni leswaku, leswi mali leyi yi nga riki ya ku hakelela swa ku humesa magandzelo, swi nga antswa yi lawuriwa hi hosi.

₇Loko Apoloniya a hlangana ni hosi Seluko, a n'wi byela hi ta mali leyi a a tivisiwile hi yona. Hosi yi hlawula Heliyodoro loyi a langutelaka hinkwaswo swa ku hanya ka yona, yi n'wi rhuma ni swileriso swo ya yi lavela mali leyi. ₈Xikan'we Heliyodoro a khoma ndlela yo ya hetisa xikongomelo xa hosi, hambiloko a ku vuriwa leswaku a a teka riendzo ro ya kambela miti ya Siriyankulu na Fenikiya. ₉Loko a fikile eYerusalema ni loko a ta va a amukeriwile hi malwandla hi Muprista lonkulu, a n'wi byela xikongomelo xa xiviri xa ku ta ka yena, a n'wi tivisa leswi a swi tweke hi tlhelo ra mali, kutani a vutisa loko hakunene swi ri tano. ₁₀Muprista lonkulu a n'wi hlamusela leswaku evuhlayiselweni bya xuma xa Tempele a ku ri ni timali tin'wana ta tinoni ni swisiwana, ₁₁ni mali yin'wana ya Hirkana n'wana Tobiya, un'wana wa tinganakana ta tiko, ni leswaku mali ya kona yi ringana silivhere ya 16 400 kg ni nsuku wa 8 100 kg. Hikokwalaho, muhomboloki Simoni a a hemba. ₁₂Muprista lonkulu a engeta a byela Heliyodoro leswaku swi nge koteki ku hoxela vanhu lava tshembaka ku hlawuleka ni ku sirheleriwa ka Tempele yo tiveka swinene ematlhelweni hinkwawo ya misava.

₁₃Kambe Heliyodoro a hlamula leswaku mali leyi yi fanele ku tekiwa ni ku nghenisiwa exumeni xa hosi, hi ku landza xileriso xa yona. ₁₄Kavaloko a hlawula siku, a nghena eTempeleni ku ya kambela mali leyi. Xiendlo lexi xa Heliyodoro xi vilerisa vanhu hinkwavo va Yerusalema swinene. ₁₅Vaprista va pavalala emahlweni ka alitari va ambarile tinguvu ta vona ta vuprista, va huwelela etilweni eka loyi a a nyikile milawu ya mali leyi hlayisiweke eTempeleni, leswaku a yi hlayisela ni ku yi sirhelela lava va yi vekeke kona. ₁₆A swi vavisa ku vona Muprista lonkulu. Xikandza xa yena a xi basulukile ku komba ku vaviseka ka moya wa yena, ₁₇miri wa yena a wu rhurhumela hi ku chava; leswi a swi komba nhlomulo wa mbilu ya yena. ₁₈Vanhu lavo tala va huma hi ku tsutsuma etindlwini ta vona, va ya hlangana ku khongela, hikuva Tempele a yi ri kusuhi no nyamisiwa. ₁₉Vavasati lava ambaleke leswo khwaxa ntsena, va nga funengetanga mavele ya vona, va pomela emitsendzeleni ya muti. Vanhwanyana van'wana lava vatswari va vona a va nga va pfumeleli ku voniwa erivaleni, va tsutsumela etinyangweni ta muti, van'wana erirhangwini, van'wana va hlometela hi mafasitere ya tindlu ta vona. ₂₀Kambe kun'wana ni kun'wana lomu a va ya kona, a va tlakusela mavoko etilweni va ri karhi va khongela Xikwembu. ₂₁A swi terisa vusiwana ku vona ku pavalala ka vanhu hinkwavo ni ku chava ka Muprista lonkulu enhlomulweni wa yena.

₂₂Loko vanhu hinkwavo va Yerusalema va ri karhi va khongela HOSI Xikwembu xa matimba hinkwawo, leswaku xi hlayisa ni ku sirhelela mali ya lava va yi vekeke emavokweni ya xona, ₂₃Heliyodoro a ya emahlweni ni makungu ya yena. ₂₄Kambe loko a nghena evuhlayiselweni bya xuma xa Tempele ni murindzi wa yena, Mufumi wa leswa matimba swa le matilweni ni wa tintsumi hinkwato ú humelerisa xivono xo hlamarisa ngopfu, lero hinkwavo lava nga va ni xivindzi xo heleketa Heliyodoro, va tshukisiwa ni ku hlamarisiwa hi matimba ya Xikwembu. ₂₅Eka xivono lexi va vona hanci leyi a yi havaxerile swo saseka ngopfu, ni mugadi wa yona wo chavisa. Kutani hanci yi dumela Heliyodoro hi rivilo, yi n'wi ba hi masondzo ya yona ya le mahlweni. Mugadi a a ambale tinguvu ta nyimpi ta nsuku, a hlome ni matlhari ya nsuku. ₂₆Heliyodoro a vona majaha mambirhi ya matimba yo hlamarisa, ya ku saseka ngopfu ni ku ambala swo saseka, lama ma n'wi rhendzelaka, ma n'wi ba swinene. ₂₇Xikan'we a wela hansi a titivala, kutani vanghana va yena va n'wi tlakula va n'wi tlhandleka ehenhla ka vuhlaka, ₂₈va n'wi nekaneka va famba na yena. Wanuna loyi a ku nga ri khale a ha ku nghena evuhlayiselweni bya xuma xa Tempele ni vavanuna lavo tala ni varindzi hinkwavo va yena, sweswi a a nga ha swi koti ku tipfuna. Hikokwalaho, hinkwavo va sungula ku twarisa vukulu bya matimba ya Xikwembu.

₂₉Loko Heliyodoro a te lákáhlá, a nga koti ni ku vulavula, a pfumala ni ntshembo wo hanyisiwa, ₃₀Vayuda va dzunisa HOSI Xikwembu lexi endleke masingita ya ku sirhelela ndhawu yo hlawuleka ya xona. Kutani Tempele leyi ku nga ri khale a yi tele hi ku chava ni mpfilumpfilu, sweswi a yi tele hi ku tsaka lokukulu, hileswi HOSI ya matimba hinkwawo yi humeleleke. ₃₁Vanghana van'wana va Heliyodoro va hatlisa va kombela Oniya ku khongela eka Xikwembu xa le henhla-henhla leswaku xi ponisa vutomi bya loyi a a ri kusuhi ni ku fa. ₃₂Kutani Muprista lonkulu a humesa gandzelo leswaku Heliyodoro a hanyisiwa, hikuva a a chava leswaku hosi Seluko a nga ehleketa leswaku Vayuda hi vona lava endleke Heliyodoro leswo biha. ₃₃Loko Muprista lonkulu a ri karhi a humesa mhamba yo susa swidyoho, majaha lawaya mambirhi ma humelela nakambe eka Heliyodoro, ma ambele sweswiya swo saseka, kutani ma yima ma ku: “Nkhensa Muprista lonkulu, hikuva HOSI yi ku ponisile hikwalaho ka yena. ₃₄Kutani ke, tsundzuka leswaku u biwile hi HOSI ya tilo. Twarisa matimba lamakulu ya Xikwembu eka vanhu hinkwavo.” Loko ma vulavurile marito lawa, majaha lamambirhi ma nyamalala.

₃₅Kwalaho Heliyodoro a humesela Xikwembu magandzelo, a tiboha hi ku hlambanya ku tirhela Muponisi wa vutomi bya yena hi tindlela to tala, kutani a lelana na Oniya, a kongoma eka hosi Seluko ni mavuthu ya yena. ₃₆Kavaloko a veka vumbhoni eka vanhu hinkwavo hi ta mintirho ya Xikwembu lexi nga henhla ka hinkwaswo, leyi a yi voneke hi mahlo ya yena.

₃₇Loko hosi Seluko a vutisa Heliyodoro leswaku i mani loyi a nga rhumiwaka nakambe eYerusalema ku ya teka mali leyi, Heliyodoro a hlamula a ku: ₃₈“Loko u ri ni nala kumbe u tiva loyi a kungelaka ku lwa ni mfumo wa wena, n'wi rhumele kona. Ú ta vuya a biwile swinene, loko ko va ku ú ta vuya a ha hanya, hikuva ku ni matimba yo hlamarisa ya Xikwembu eYerusalema. ₃₉Xikwembu xa le tilweni xi rindza Tempele ni ku yi sirhelela, kutani xi ba ni ku herisa lava taka ku yi onha.” ₄₀Lawa i makumu ya timhaka ta Heliyodoro ni ku sirheleriwa ka xuma xa Tempele.