II Vamakabiya 5

₁Enkarhini wolowo Antiyoko Epifani a ya hlasela Egipta ravumbirhi. ₂Hi masiku ya kwalomu ka 40 hinkwako-nkwako eYerusalema ku vonaka vagadi va tihanci va ambale tinguvu ta nyimpi ta nsuku, va ri karhi va hlasela etilweni, va hlomile matlhari ni mafumu ya nsuku. ₃Mavuthu ya vagadi va tihanci ma yimeka, ma jamelanile, kutani ma bukutana ematlhelweni hinkwawo. Switlhangu swi khomiwile, matlhari ma hlengeletiwa, miseve yi hoxiwa, tinguvu ta tinxakaxaka ta nyimpi ni swiambalo swa nsuku swa tihanci swi hatima. ₄Kutani ke, vanhu hinkwavo va Yerusalema va khongela leswaku swivono leswi swi va leswi swi va hlavutelelaka leswinene.

₅Loko mahungu ya vunwa ya ku fa ka Antiyoko Epifani ya tangunuka, Yasoni a hlengeleta vavanuna va kwalomu ka 1 000, kutani xikan'we va ya hlasela Yerusalema. Loko masocha lama a ma ri erirhangwini ma sindzisiwa ku tlhetlha ni loko muti hinkwawo wu tekiwile, Menela a baleka a ya tumbela ekhokholweni leri nga kusuhi na Tempele. ₆Yasoni a ya emahlweni ku dlayetela varikwavo, a nga twisisi leswaku ku hlula ni ku xanisa varikwavo i khombo lerikulu ngopfu, kambe a ehleketa leswaku hi ku endla sweswo ú hlula valala, a nga hluli varikwavo. ₇Hambiswiritano a nga swi kotanga ku teka mfumo, a khomiwa hi tingana ntsena hikwalaho ka xikhiri xa yena, kutani a balekela nakambe etikweni ra Vaamoni. ₈Eku heteleleni a fa hi ku hlupheka lokukulu. A hehliwa emahlweni ka Areta murhangeri wa Maarabu, a tsendzeleka ni miti, a hlongoriwa hi vanhu hinkwavo; a vengiwa hikuva a a pfilunganyile milawu, a nyefuriwa hikwalaho ka ku va mudlayi wa varikwavo, kutani a balekela Egipta. ₉Yena loyi a nga hlongola varikwavo lavo tala etikweni ra ka vona, a fa a ri mubaleki etikweni rimbe, endzhaku ka loko a fikile Sparta hi ku tshemba ku sirheleriwa kona, hikwalaho ka vuxaka lebyi a byi ri kona exikarhi ka Vasparta na Vayuda. ₁₀Yena loyi a nga dlaya vanhu lavo tala ni ku ka a nga lahli mintsumbu ya vona, a pfumala na un'we la n'wi rilelaka, kumbe la n'wi lahlaka hi fanelo, kumbe la n'wi etlerisaka ni vakokwa wa yena.

₁₁Loko Antiyoko Epifani a twa leswi humeleleke eYerusalema, a ehleketa leswaku tiko hinkwaro ra Yudiya ri n'wi hundzukerile, kutani a hlundzuka ngopfu. Hikokwalaho, a suka hi le Egipta a ya hlasela Yerusalema. ₁₂Kutani a lerisa masocha ya yena ku dlaya Vayuda hinkwavo lava va hlanganaka na yena ni ku yayarhela lava va tumbeleke etindlwini. ₁₃Masocha ya yena ma ya dlaya hinkwavo, lavatsongo ni lavakulu, vavanuna ni vavasati, vafana ni vanhwanyana, ma herisa ni swihlangi. ₁₄Hi masiku manharhu Yerusalema a lahlekeriwa hi vanhu va 80 000: 40 000 va dlayiwa enyimpini ni kwalomu ka 40 000 va xavisiwa va va mahlonga.

₁₅Kambe Antiyoko Epifani a a nga si tsaka hi leswi a swi endleke; kutani a nga chavanga ku nghena eTempeleni leyo hlawuleka ngopfu ku tlula titempele ta misava hinkwayo, a heleketiwa kona hi Menela loyi a a hundzukile muxengi eka nawu wa Xikwembu ni varikwavo. ₁₆Hi mavoko ya yena ya thyaka ni yo homboloka, Antiyoko Epifani a khoma ni ku teka swibya leswo hlawuleka ni tinyiko leti a ti humesiwile hi tihosi tin'wana ku kurisa ku dzuneka ni ku fundzheka ka Tempele. ₁₇A nyanyuka ngopfu, a nga swi voni leswaku HOSI Xikwembu a xi hlundzukile nkarhinyana ntsena hikwalaho ka swidyoho swa vanhu va Yerusalema, xi kondza xi fularhela Tempele yo hlawuleka. ₁₈Kambe loko vanhu va Yerusalema a va nga endlanga swidyoho swo tala, Antiyoko Epifani a a ta va a biwile xikan'we ni ku siveriwa ku ya emahlweni ni xiendlo lexi xa matlotlo, tanihi laha Heliyodoro, loyi Seluko a a n'wi rhumile ku ya xiyaxiya leswi nga kona evuhlayiselweni bya xuma xa Tempele a a biwile ni ku siveriwa hakona. ₁₉Kambe HOSI Xikwembu a xi nga hlawulanga vanhu hikwalaho ka Tempele, a xi hlawurile Tempele hikwalaho ka vanhu. ₂₀Kutani ke, leswi Tempele yi averiweke makhombo lama weleke vanhu va Yerusalema, enkarhini lowu taka yi averiwile na yona minkateko ya vona. Eku hlundzukeni ka xona, Xikwembu xa matimba hinkwawo ni Mufumi wa hinkwaswo a xi fularhele Tempele, kambe loko xi tsetselele vanhu va xona, xi tlherisele na yona Tempele eku sasekeni.

₂₁Antiyoko Epifani a teka silivhere ya Tempele ya 73 800 kg a famba na yona, kutani a kongoma hi ku hatlisa emutini wa Antiyoka. Hi ku tikurisa ngopfu, a titwa onge a nga tluta emisaveni hambi ku ri ku famba elwandle. ₂₂Kutani a veka varhangeri ku xanisa Vayuda; eYerusalema a veka Filipi wanuna wo huma eFrigiya, loyi a n'wi tlulaka hi ku homboloka; ₂₃eGerizimi a veka Androniko; handle ka lava, a veka na Menela loyi a a tlula vanhu hinkwavo hi ku xanisa varikwavo. Antiyoko Epifani a a venga Vayuda ku tlula mpimo. ₂₄Hikokwalaho, a rhuma eYerusalema Apoloniya, ndhunankulu ya Vamisiya, ni masocha ya 22 000, kutani a n'wi lerisa ku ya dlaya vavanuna hinkwavo, ni ku xavisa vavasati ni vana hinkwavo va va mahlonga. ₂₅Apoloniya a fika eYerusalema, a xisetela vaaki va muti wonge hiloko a a tile hi ku rhula. Kambe hi siku ra Savata, loko Vayuda hinkwavo va ri le ku wiseni, a hlengeleta masocha ya yena handle ka Yerusalema, a ma rhangela ma famba ma xaxamerile ni ku hloma matlhari. ₂₆Xikan'we a ma lerisa ku ya dlaya hinkwavo lava a va humile eYerusalema ku ta ma vona, kutani a tsutsumela na wona eYerusalema, ma ya dlaya vanhu vo tala kona.

₂₇Kambe Yudasi Makabiya ni vavanuna va 9 va balekela emananga, va ya hanya etintshaveni tanihi swiharhi. Etintshaveni ta kona, a va dya ntsena leswi milaka enhoveni, leswaku va nga tshuki va nyamisiwa.