Genesa 33

₁Kuteloko Yakobo a tlakusa mahlo, o vona Esawu a ri karhi a ta ni vavanuna va 400. Kutani Yakobo a hambanyisa vana va Leya, ni vana va Rahele, ni vana va malandza ya yena lamambirhi. ₂Kutani emahlweni a veka malandza ni vana va wona, ku landza Leya ni vana va yena, kutani Rahele na Yosefa va va vo hetelela eka hinkwavo. ₃Yakobo yena a rhanga emahlweni ka vona hinkwavo. Ku suka kwalaho, Yakobo ú nkhinsamile ka 7, ku kondza a ya fika eka makwavo Esawu.

₄Kutani Esawu a tsutsuma a ya hlanganisa Yakobo, a fika a n'wi khoma a n'wi vukarha, a n'wi ntswontswa, kutani havambirhi va rila. ₅Kuteloko Esawu a tlakusa mahlo, o vona vavasati ni vana, kutani a ku: “Lava u nga na vona i vamani xana?” Yakobo a ku: “I vana lava Xikwembu xi ndzi nyikeke vona mina nandza wa wena, hikwalaho ka tintswalo ta xona.” ₆Kutani malandza ni vana va wona va tshinela va fika va nkhinsama; ₇Leya ni vana va yena, na vona va tshinela va fika va nkhinsama; eku heteleleni Yosefa na Rahele na vona va tshinela va fika va nkhinsama. ₈Kutani Esawu a ku: “Xana ntlawa wa wena lowu ndzi hlanganeke na wona i wa ku endla yini xana?” Yakobo a ku: “I wa ku endla leswaku wena n'wini wanga u ndzi amukela.” ₉Kambe Esawu a ku: “Makwerhu, mina ndzi ni swilo swo ringana; leswi u nga na swona, tihlayisele swona.” ₁₀Yakobo a ku: “E-e, loko u ndzi amukela hakunene, ndzi kombela leswaku u teka tinyiko leti ndzi ku nyikaka tona. Leswi ndzi voneke mombo wa wena, swi fana ni loko ndzi vonile mombo wa Xikwembu, hikuva u ndzi amukerile hi malwandla. ₁₁Ndzi kombela leswaku u amukela tinyiko ta mina leti tisiweke eka wena, hikuva Xikwembu xi vile ni tintswalo eka mina, naswona ndzi ni swilo swo ringana.” Hi ndlela leyi, Yakobo a khongotela Esawu ku kondza a teka tinyiko.

₁₂Kutani Esawu a ku: “A hi fambe, mina ndzi ta ku rhangela emahlweni.” ₁₃Kambe Yakobo a ku ka Esawu: “We n'wini wanga, wa swi tiva leswaku vana a va si tiyela, naswona ndzi fanele ku hlenga swifuwo leswikulu ni leswitsongo leswa ha mamisaka, hikuva loko swi nga byisiwa siku hinkwaro, swi famba mpfhuka wo leha, swi nga fa hinkwaswo. ₁₄We n'wini wanga, ndzi kombela leswaku u pfa u rhanga, mina nandza wa wena ndzi ta ta ndzi ri karhi ndzi byisa swifuwo khwatsi, ndzi famba ntsena mpfhuka lowu nga kotiwaka hi swifuwo ni vana lava ndzi nga na vona, ku kondza ndzi ta fika eka wena n'wini wanga le Seyira.”

₁₅Kutani Esawu aku: “Yima ndzi ku siyela van'wana va vavanuna lava ndzi nga na vona.” Kambe Yakobo a ku: “E-e, n'wini wanga, u nga kali u tikarhata! Mina ndzo nkhensa ntsena leswi u ndzi amukeleke, we n'wini wanga.” ₁₆Kutani hi siku rero Esawu a tlhelela eSeyira. ₁₇Kambe Yakobo yena a ya eSukoti, a fika a tiakela yindlu, a aka ni swivala swa swifuwo, hikokwalaho ndhawu leyi yi thyiwa vito ra Sukoti (hileswaku: “Swivala”).

₁₈Loko Yakobo a ta a huma hi le Padani-Aramu, ú fikile hi ku rhula emutini wa Xikeme, etikweni ra Kanana, kutani a gova kusuhi ni muti lowu. ₁₉Kutani Yakobo a humesa mali ya tisilivhere ta 100 a nyika vana va Hamoro tata wa Xikeme, a xava ndhawu leyi a a dzimile ntsonga eka yona. ₂₀Kutani Yakobo a aka ni alitari, a yi thya vito ra Eli-Elohe-Israele (hileswaku: “Xikwembu-xona-Xikwembu-xa-Israele”).