Genesa 34

₁Siku rin'wana, Dina n'wana Leya na Yakobo a huma a endzela vanhwanyana va tiko ra Kanana. ₂Kuteloko Xikeme a n'wi vona, o n'wi pfinya a etlela na yena, a n'wi nyamisa. Xikeme a a ri n'wana Muhivhi loyi a va ku i Hamoro, yena ndhuna ya ndhawu yoleyo. ₃Kambe Dina N'wa-Yakobo a yiva mbilu ya Xikeme, hiloko Xikeme a sungula ku rhandza Dina, a vulavula na yena kahle. ₄Kutani Xikeme a ya vulavula na Hamoro tata wa yena a ku: “Ndzi kombela leswaku u ya ndzi tekela nhwanyana loyi, a ta va nsati wa mina.” ₅Mhaka ya ku nyamisiwa ka Dina yi ya yi ya fika etindleveni ta Yakobo tata wa yena. Enkarhini lowu, vana va Yakobo va xinuna a va ri eku riseni ka swifuwo swa yena enhoveni, hikokwalaho Yakobo a tikhoma ku kondza va vuya. ₆Kutani Hamoro tata wa Xikeme a ya eka Yakobo ku ya vulavula na yena. ₇Vana va Yakobo va xinuna va lo na twa mhaka leyi, va vuya hi le nhoveni va nyangatsekile va tlhela va hlundzuka swinene, hikuva Xikeme a a nghenisile mhaka ya vuphukuphuku exikarhi ka Vaisraele hi ku etlela na n'wana Yakobo. Mhaka yo tano, a yi yila.

₈Hamoro a vulavula na vana va Yakobo a ku: “Xikeme n'wananga ú rhandza n'wana wa ka n'wina. Ndzi kombela leswaku mi n'wi pfumelela a tekiwa hi Xikeme. ₉A hi twananeni leswaku vana va hina va tekana: Pfumelelani vana va n'wina va xisati ku tekiwa erixakeni ra ka hina, kasi na hina hi ta pfumelela lava ka hina ku tekiwa eka n'wina. ₁₀N'wina tshamani kwala xikarhi ka hina, a mi siveriwi ku va laha tikweni leri; tshamani, mi xava ni ku xavisa swilo, mi tlhela mi tikumela leswi nga ta va ndzhaka ya n'wina.” ₁₁Na yena Xikeme a ya a ya vulavula na tata wa Dina ni vamakwavo wa yena a ku: “Ndzi kombela leswaku mi ndzi amukela. Xin'wana ni xin'wana lexi mi nga ta xi vula, ndzi ta mi nyika xona. ₁₂Vulani ntsengo wihi ni wihi lowu mi wu lavaka, ni tinyiko leti mi ti lavaka, ndzi ta humesa hilaha mi nga ta vula hakona, ntsena n'wina pfumelani leswaku ndzi teka n'wana wa n'wina.”

₁₃Kutani vana va Yakobo va hlamula Xikeme na tata wa yena Hamoro hi ndlela yo kanganyisa, hikuva Xikeme a a nyamisile Dina makwavo wa vona, ₁₄va ku ka vona: “Sweswo, hi nga ka hi nga swi endli! Hi nge pfumeli leswaku makwerhu a tekiwa hi munhu wo ka a nga yimbanga. Mhaka yo tano, yi nga va tingana eka hina. ₁₅Hi nga pfumela ntsena loko ho twanana eka mhaka leyi: Pfumelani leswaku mi ta fana na hina, wanuna un'wana ni un'wana wa ka n'wina a yimbisiwa. ₁₆Kutani hi kona hi nga pfumelelaka vana va ka hina va xisati va tekiwa eka n'wina, na hina hi ta teka vana va n'wina va xisati, kutani hi ta tshama swin'we, hi va vanhu van'we. ₁₇Kambe loko mi nga pfumeli ku yimbisiwa, n'wana wa ka hina hi ta n'wi teka hi famba na yena.”

₁₈Marito ya vana va Yakobo ma tsakisa Hamoro na n'wana wa yena Xikeme. ₁₉Kutani jaha leri Xikeme ri hatlisa ri endla leswi vuriweke, hikuva a ri rhandza n'wana Yakobo swinene. Endyangwini wa ka vona, Xikeme hi yena a a xiximiwa ngopfu. ₂₀Loko Hamoro na n'wana wa yena Xikeme va fika enyangweni ya muti wa ka vona, va vulavula ni vaaki va muti, va ku: ₂₁“Vanhu lava, a va holovi na hina! Va pfumeleleni va tshama laha tikweni, va xava swilo ni ku xavisa eka rona. Tiko leri, ma ri vona i rikulu, ri nga va ringana. A hi tekeni vana va vona va xisati, na hina hi pfumelela vana va hina va xisati va tekiwa eka vona. ₂₂Vanhu lava, va nga nkhensa ku tshama na hina, hi va vanhu van'we, kambe hi fanele ku pfumela leswaku wanuna un'wana ni un'wana exikarhi ka hina a yimbisiwa, ku fana na vona leswi va yimbeke. ₂₃A hi pfumeleni leswi va swi vulaka leswaku va ta tshama swin'we na hina, kutani swifuwo swa vona ni swilo swa vona hinkwaswo swi ta va swa hina.” ₂₄Kutani vavanuna hinkwavo lava yeke enyangweni ya muti, va pfumela leswi vuriweke hi Hamoro ni n'wana wa yena Xikeme. Kutani wanuna un'wana ni un'wana loyi a yeke enyangweni ya muti, a yimbisiwa.

₂₅Hi siku ra vunharhu, loko vavanuna lava va ha twa ku vava, vana vambirhi va Yakobo, Simiyoni na Levhi, vona vamakwavo wa Dina, va teka mafumu ya vona va ya hlasela muti, vaaki va wona va nga ehleketanga nchumu, va dlayetela vavanuna hinkwavo. ₂₆Hiloko va dlaya Hamoro ni n'wana wa yena Xikeme hi fumu, kutani va humesa Dina endlwini ya Xikeme va famba na yena. ₂₇Kutani vana lavan'wana va Yakobo va ta eka lava dlayiweke, va fika va phangha swilo emutini, hikuva makwavo wa vona Dina a a nyamisiwile. ₂₈Va teka swifuwo swa vona leswikulu ni leswitsongo, va teka ni timbhongolo ni swilo hinkwaswo leswi a swi ri emutini kumbe emasin'wini. ₂₉Va teka ni rifumo ra vona hinkwaro, ni vana va vona ni vasati va vona, va teka ni swilo hinkwaswo leswi a swi ri etindlwini va famba na swona. ₃₀Kutani Yakobo a ku ka Simiyoni na Levhi: “Mi ndzi vangele khombo hi ku ndzi venganisa ni Vakanana ni Vaperesi, vona vaaki va tiko. Mina a ndzi na vavanuna vo tala, kutani loko vo twanana va hlangana va ta ndzi hlasela, va ta ndzi herisa, mina ni va ndyangu wa mina.” ₃₁Kambe vona va hlamula va ku: “Hi nge pfumeli leswaku Xikeme a hundzula makwerhu a n'wi endla nghwavava.”