Genesa 32

₁Yakobo a ya emahlweni ni riendzo ra yena, kutani tintsumi ta Xikwembu ti n'wi hlanganisa. ₂Kuteloko Yakobo a ti vona, a ku: “Lowu i nxaxa wa Xikwembu”, kutani a thya ndhawu leyi vito ra Mahanayimi (hileswaku: “Mixaxa mimbirhi”).

₃Kutani Yakobo a rhuma vanhu eka Esawu makwavo wa yena le Seyira, etikweni ra Edomu, ₄a va lerisa ku ya byela Esawu marito lawa: “We n'wini wanga, mina nandza wa wena a ndzi luverile eka Labani, ndzi tshame kona ku fika sweswi. ₅Kutani ndzi ni tihomu ni timbhongolo, ni swifuwo leswitsongo, ni malandza ya xinuna ni ya xisati, kutani ndzi rhuma vanhu lava ku ta ku tivisa mhaka leyi, we n'wini wanga, leswaku u ta ndzi amukela.” ₆Kutani varhumiwa va tlhelela eka Yakobo va fika va ku ka yena: “Hi fikile eka Esawu makwenu, kutani yena ni vavanuna va 400 va karhi va ta va ta ku hlanganisa.” ₇Kutani Yakobo a chava swinene, a sungula ku rhurhumela, kutani a avanyisa vanhu lava a a ri na vona, ni swifuwo leswitsongo ni leswikulu, ni tikamela, ku huma mintlawa mimbirhi, ₈hikuva a a ku: “Loko Esawu o fika a herisa ntlawa wun'we, lowun'wana wu ta pona.”

₉Kutani Yakobo a khongela a ku: “We Xikwembu xa Abrahama kokwa wa mina ni xa Isaka tata wa mina, we HOSI, u ndzi byerile u ku: ‘Tlhelela eka n'wina etikweni ra rikwenu, kutani mina ndzi ta ku endlela leswinene.’ ₁₀Mina nandza wa wena a ndzi nga fanelanga ku kuma rirhandzu ra wena lero tshembeka, ni tintswalo hinkwato leti u ndzi kombeke tona. Loko ndzi pela nambu lowu wa Yordani, a ndzi khomile nhonga ntsena, kambe sweswi ndzi ni mintlawa mimbirhi. ₁₁Ndzi kombela leswaku u ndzi lamulela eka makwerhu Esawu, hikuva ndzi chava leswaku a nga ta a ta hi herisa hinkwerhu, a herisa ni vavasati ni vana va vona. ₁₂Wena u ndzi byerile u ku: ‘Ndzi ta ku endlela leswinene, ndzi ku nyika vatukulu lavo tala ku fana ni sava ra lwandle leri nga hlayekiki.’ ”

₁₃Yakobo a xwa vusiku kona, kutani a pambula swilo swin'wana swa leswi a a ri na swona, leswaku swi ta nyikiwa Esawu makwavo wa yena. ₁₄Ú pamburile leswi: Timbuti ta mathokazi ta 200, ni swiphongho swa 20, ni tinyimpfu ta mathokazi ta 200, ni makhuna ya 20, ₁₅ni tikamela ta mantswele ta 30 ni vana va tona, ni tihomu ta mantswele ta 40, ni tinkuzi ta 10, ni timbhongolo ta mantswele ta 20, ni timbhongolo ta tinkuzi ta 10. ₁₆Swifuwo leswi a swi avanyisa hi mintlhambi, kutani a swi veka emavokweni ya malandza ya yena, a ku ka vona: “Rhangani emahlweni ka mina, kambe mi siya mpfhukanyana exikarhi ka ntlhambi wun'wana ni wun'wana.” ₁₇Yakobo a lerisa loyi a a rhangile emahlweni ka vona hinkwavo a ku: “Loko makwerhu Esawu a ku hlanganisa, kutani a vutisa a ku: ‘U nandza wa mani xana? U ya kwihi xana? Swifuwo leswi u nga na swona i swa mani xana?’ ₁₈wena u fanele ku hlamula u ku: ‘I swa Yakobo nandza wa wena; i nyiko leyi tisiwaka eka wena n'wini wanga Esawu. Loko a ri yena Yakobo, wa karhi wa ta.’ ” ₁₉Yakobo a lerisa nandza wa vumbirhi ni lowa vunharhu, ni hinkwawo lawa a ma byisa mintlhambi a ku: “Loko mi hlangana na Esawu, na n'wina mi fanele ku vula marito wolawo. ₂₀Mi tlhela mi ku: ‘Yakobo nandza wa wena wa karhi wa ta.’ ” Yakobo a a ehleketa leswaku u ta tsakisa Esawu hi tinyiko leti a a ti rhangisile, kutani yena hi xiviri ú ta ya vonana na Esawu endzhaku, hikuva a a ku: “Kumbexana ú ta ndzi amukela.” ₂₁Kutani tinyiko ti rhanga emahlweni, kambe vusiku byebyo, yena a xwa enxaxeni.

₂₂Vusiku byebyo, Yakobo a teka vasati va yena lavambirhi, ni malandza ya yena, ni vana va yena lava 11, va suka va famba va ya tsemakanya hi le hlalukweni ra nambu wa Yaboko. ₂₃Kutani Yakobo a fika a rhangisa vona va tsemakanya nambu, a rhangisa ni hinkwaswo leswi a a ri na swona, ₂₄kambe yena a sala a ri yexe. Kutani ku humelela munhu un'wana a fika a pfinyana na yena ku kondza ri xa. ₂₅Loko munhu loyi a vona leswaku wa tsandzeka ku hlula Yakobo hi ku pfinyana na yena, o n'wi ba nyonga yi suleka. ₂₆Kutani munhu loyi a ku: “Ndzi tshike ndzi famba, hikuva ri lava ku xa.” Kambe Yakobo a ku: “Ndzi nge ku tshiki loko u nga si ndzi katekisa.” ₂₇Munhu loyi a ku ka yena: “Hi wena mani xana?” Yena a ku: “Hi mina Yakobo.” ₂₈Kutani a ku: “Vito ra wena a ri nga ha vi Yakobo, kambe u ta va Israele, hikuva u pfinyanile ni Xikwembu ni vanhu, kambe u hlurile.” ₂₉Kutani Yakobo a ku ka yena: “Ndzi kombela leswaku u ndzi byela vito ra wena.” Kambe yena a ku: “Xana u vutisela yini vito ra mina xana?” Kutani a katekisa Yakobo. ₃₀Hikokwalaho, Yakobo a thya ndhawu leyi vito ra Penuwele (hileswaku: “Mombo-wa-Xikwembu”), hikuva a a ku: “Ndzi vonile mombo wa Xikwembu, kambe ndza ha hanya.” ₃₁Loko dyambu ri huma, Yakobo a suka ePenuwele, a ri karhi a khwita hikwalaho ka ku suriwa nyonga. ₃₂Hikokwalaho, ku fika ninamuntlha Vaisraele a va dyi nsiha wa le nyongeni, hikuva Yakobo u biwile ehenhla ka nsiha wa nyonga.