1Balaama a ku eka Balaka: “Ndzi akele kwala tialitari ta 7, kutani u ndzi lavela kwala tinkunzi ta 7 ni makhuna ya 7.” 2Balaka a endla hilaha Balaama a nga vula ha kona; kutani Balaka na Balaama va tlhava nkunzi ni khuna ehenhla ka alitari yin'wana ni yin'wana. 3Kutani Balaama a ku eka Balaka: “Yima ekusuhi ni holokosta ya wena mina ndzi ta ya etlhelo, swimbe Yehovha u ta hlangana na mina, kutani ndzi ta ku byela leswi a nga ta ndzi kombisa.” Kavaloko a ya exivandleni lexi ngi rivala. 4Xikwembu xi ya hlangana na Balaama kutani Balaama a ku eka xona: “Ndzi lunghisile tialitari leti ta 7, ndzi humesile nkunzi ni khuna ehenhla ka alitari yin'wana ni yin'wana.” 5Kavaloko Yehovha a veka rito enon'wini wa Balaama a ku: “Tlhela eka Balaka, u n'wi byela leswo karhi ni swo karhi.” 6A tlhelela eka yena, kutani a n'wi kuma a yimile ekusuhi ni holokosta ya yena, a ri ni tihosi hinkwato ta Mowabu. 7Kutani Balaama a bvumbha, a ku:
“Balaka u ndzi vitanile ndzi ri eAramu,
Hosi ya Mowabu yi ndzi rhelerisile etintshaveni ta le vuxeni.
‘Tana u ndzi rhukanela Yakobo!
Tana u karihela Israele!’
8Ndzi ta rhukanela yini?
Xikwembu a xi n'wi rhukananga.
9Ndzi ta karihela yini,
loko Yehovha a nga karihanga?
Ndzi n'wi vona ndzi ri enhlohlorhini ya ribye,
Ndzi n'wi languta ndzi ri etintshaveni.
Vonani, i tiko leri tshamaka hitlhelo,
Leri nga hlayiwiki ni matiko.
10I mani la nga ta hlaya ntshuri wa Yakobo?
Ni ntsengo wa ku avanyisa
ka vukhume bya Israele?
A ndzi fe hi rifu ra lava lulameke,
Ku hela ka mina a ku kotise ka vona!”
11Balaka a ku eka Balaama: “U ndzi endlele yini xana? Ndzi ku rhambele ku rhukana valala va mina, kasi u va katekisile ntsena!” 12A hlamula, a ku: “Xana a ndzi faneri ku vula ntsena lexi Yehovha a ndzi vekeleke enon'wini xana?” 13Balaka a ku eka yena: “Tana sweswi na mina, hi ya endhawini yin'wana laha u nga ta ri vona hitlhelo ntsena u nga tshuki u ri vona hinkwaro; u ta ri rhukana u ri kwalaha.” 14Kutani a n'wi yisa emasin'wini ya Tsofimi, ehenhla ka Pisga, a aka kona tialitari ta 7, a tlhava nkunzi ni khuna ehenhla ka alitari yin'wana ni yin'wana. 15Kutani Balaama a ku eka Balaka: “Yima la ekusuhi ni holokosta ya wena! Mina ndzi ta ya hlangana na Yehovha.” 16Kavaloko Yehovha a ya hlangana na Balaama, a veka rito enon'wini wa yena, a ku: “Tlhela eka Balaka, u ta n'wi byela leswo karhi ni swo karhi.” 17Kutani a tlhelela eka yena, a n'wi kuma a yimile ekusuhi ni holokosta ya yena, tihosi ta Mowabu ti ri na yena. Balaka a ku eka yena: “Yehovha u te yini xana?”
18Kavaloko Balaama a bvumbha, a ku:
“Pfuka Balaka, u yingisa,
Rhiya ndleve n'wana Siporo:
19Xikwembu a hi munhu leswaku xi nga hemba,
Ni n'wana wa munhu leswaku xi nga tisola.
Xana hi yena la vulaka, kutani a nga endli,
Loyi a vurisaka, kutani a nga hetisisi?
20Kunene, ndzi lerisiwe ku katekisa;
U katekisile, ndzi nga ka ndzi nga hundzuli.
21A nga voni nandzu eka Yakobo,
A nga voni ku homboloka ka Israele.
Yehovha, Xikwembu xa yena, u na yena,
I hosi ya yena loyi va n'wi bumabumelaka.
22Xikwembu xi va humesile eEgipta;
Xi va nyikile matimba ya nyarhi,
23Hikuva a ku na vuloyi eka Yakobo;
A ku na vungoma eka Israele;
Ku ta byeriwa Yakobo na Israele hi nkarhi wa swona,
Leswi Xikwembu xi swi endleke.
24I tiko leri pfukaka kukotisa ntswele ya nghala,
Ri yima kukotisa nghala ya xinuna.
Ri nga ka ri nga etleri,
ri nga si dya lexi a xi khomeke,
Ri nga si nwa ngati ya lava dlayiweke.”
25Kutani Balaka a ku eka Balaama: “Loko kunene u nga ka u nga ri rhukani, u nga tshuki u ri katekisa!” 26Balaama a hlamula, a ku eka Balaka: “Xana a ndzi ku byelanga leswaku hinkwaswo leswi Yehovha a nga ta swi vula, ndzi ta swi endla xana?”
27Balaka a ku eka Balaama: “Tana sweswi na mina endhawini yin'wana; kumbe Yehovha u ta ku pfumelela ku ri rhukana.” 28Kutani Balaka a yisa Balaama enhlohlorhini ya Peyori leyi langutanaka hitlhelo ra mananga. 29Kutani Balaama a ku eka Balaka: “Ndzi akele kwala tialitari ta 7, u ndzi lavela tinkunzi ta 7, ni makhuna ya 7.” 30Balaka a endla hilaha Balaama a n'wi byeleke hakona a tlhava nkunzi ni khuna ehenhla ka alitari yin'wana ni yin'wana.
