1Balaama a vona leswaku Yehovha u titsakele ku katekisa Israele, kutani a nga lavangi vungoma kukotisa mikarhi yin'wana, kambe a hundzuluxa mombo wa yena etlhelo ra mananga. 2Kutani Balaama a tlakusa mahlo a vona tiko ra Israele ri le mixaxeni hi tinyimba ta rona, kutani moya wa Xikwembu wu ta ehenhla ka yena, 3a bvumbha, a ku:
“Ku bvumbha ka Balaama, n'wana Beyori;
Rito ra munhu la pfuriweke tihlo;
4Rito ra la yingisaka marito ya Xikwembu,
La vonaka mahlori ya Lowa matimba hinkwawo,
La korhamaka, kutani mahlo ya yena ma pfuleka.
5Oho Yakobo! Ku saseka ka mixaxa ya wena!
6Oho Israele! Vuako bya wena byi nava kukotisa mikova,
Kukotisa mitanga ekusuhi ni nambu,
Kukotisa mhanga leyi byariweke hi Yehovha,
Kukotisa tikedari leti nga ekusuhi ni mati.
7Mati ma huma eswikutswini swa yena,
Mbewu ya yena yi ni mati layo tala.
Hosi ya yena yi titlakusile ehenhla ka Agaga,
Ku fuma ka yona ku ni matimba.
8Xikwembu xi n'wi humese Egipta,
A heta matiko, va nga valala va yena;
A faya marhambu ya vona, a khandla miseve ya vona.
9A khinsama, a khondla kukota nghala,
kukotisa ntswele ya nghala:
I mani la nga ta n'wi pfuxa?
Ku katekile lava ku katekisaka,
A ku rhukaniwe lava ku rhukanaka.”
10Kavaloko Balaka a karihela Balaama, kutani a phokota mandla, a ku eka Balaama: “Ndzi ku vitanile ku rhukana valala va mina; kutani waswivo, u va katekisile kanharhu. 11Sweswi tifambele ekarikwenu, ndzi vurile leswaku ndzi ta ku dzunisa ngopfu; kambe Yehovha u ku sivele ku amukela nchumu.” 12Balaama a ku eka Balaka: “Xana a ndzi byelangi tintsumi leti u ndzi rhumeleke tona, ndzi te: 13‘Hambiloko Balaka a ndzi tatisela yindlu ya yena hi silivhere ni nsuku, a ndzi nyika swona, ndzi nga ka ndzi nga tluli ku lerisa ka Yehovha hi ku tisungulela ndzi ri mina, xilo lexo saseka, kumbe lexo biha, leswi Yehovha a nga ta ndzi lerisa swona, ndzi ta swi vula’? 14Kutani sweswi ndzi tiyela eka rikwerhu. Tana, ndzi ta ku tivisa leswi tiko leri ri nga ta swi endla eka tiko ra wena masiku man'wana.” 15Kavaloko a bvumbha, a ku:
“Rito ra Balaama n'wana Beyori,
Rito ra munhu la pfuriweke mahlo,
16Rito ra la yingisaka marito ya Xikwembu,
La tivaka vutivi bya La nge henhlahenhla,
La hlalelaka mahlori ya La nga ni matimba hinkwawo,
La khinsamaka, kutani mahlo ya yena ma pfuleka.
17Ndzi n'wi vona, kambe a hi sweswi,
Ndza n'wi hlalela, kambe ku nga ri kusuhi.
Nyeleti yi hume eka Yakobo,
Nhonga ya vuhosi yi hume eIsraeleni.
Yi tlhava matsheve ya Mowabu,
Yi heta vana hinkwavo va dzolonga.
18Edomu a fumiwa hi yena,
Seyira, nala wa yena, u ta fuyiwa hi yena,
Israele a kombisa matimba ya yena,
19La humaka eka Yakobo wa fuma,
U va heta lava salaka emitini.”
20Balaama a vona Amaleke, a bvumbha, a ku:
“Amaleke i xirhangana xa matiko,
Kambe siku rin'wana u ta herisiwa.”
21Balaama a vona Vakeni, a bvumbha, a ku:
“Yindlu ya wena yi tiyile,
Xisaka xa wena xi vekiwile eribyeni ra ntshava.
22Kambe Mukeni u ta hlongoriwa,
Loko Asuru a ta ku yisa ekule, u ri mubohiwa.”
23Balaama a engeta a bvumbha, a ku:
“Ku ni khombo loyi a nga ta va kona,
Loko Xikwembu xi ta swi endla, ku ta sala mani?
24Tingalava ti ta ta hi le Kitimi,
Ti ta tsongahata Asuru, ti ta tsongahata Ebere;
Kutani na yena u ta herisiwa.”
25Kavaloko Balaama a pfuka, kutani a tlhelela karikwavo; na yena Balaka a tifambela hi ndlela ya yena.
