TINHLAYO 22

₁Vana va Israele va suka, va ya gova erivaleni ra Mowabu, endzhandzheni wa Yordani, ku lavana na Yeriko. ₂Balaka, n'wana Siporo a vona hinkwaswo leswi Israele a swi endleleke Vaamori. ₃Kutani Mowabu a chava ngopfu loko a va vona va tele swonghasi; Mowabu a rhurhumela hikwalaho ka vana va Israele. ₄Kutani Mowabu a ku eka vakulu va Midiyani: “Vunyingi lebyi, byi ta dya tiko hinkwaro leri hi rhendzeleke kukotisa tihomu loko ti heta rilambyana ra nhova.” Balaka, n'wana Siporo, a a ri hosi ya Mowabu enkarhini wolowo. ₅A rhuma tintsumi eka Balaama, n'wana Beyori, emutini wa Petoro, enambyeni, etikweni ra vana va tiko ra yena, ku ya n'wi vita; va ku eka yena: “Waswivo, tiko ri humile eEgipta, ri funengeta misava, kambe ri akile ri langutene na mina. ₆Sweswi tana, ndza ku khongela, u ndzi rhukanela tiko leri, hikuva ri ndzi tlula hi matimba. Kumbe ndzi ta swi kota ku ri hlula, ni ku ri hlongorisa handle ka tiko, hikuva ndza swi tiva leswaku loyi u n'wi katekisaka u katekile, ni loyi u n'wi rhukanaka u rhuketeriwile.”

₇Vakulu va Mowabu ni vakulu va Midiyani va suka, va tamerile swa ku hakela mungoma, va ya fika eka Balaama, va n'wi byela marito ya Balaka. ₈Balaama a ku eka vona: “Tshamani kwala nivusiku, kutani ndzi ta mi hlamula hilaha Yehovha a nga ta ndzi byela hakona.” Tihosi ta Mowabu ti tshama eka Balaama.

₉Kavaloko Xikwembu xi ta eka Balaama, xi ku: “Vanhu lava nga eka wena, va mani xana?” ₁₀Balaama a ku eka Xikwembu: “Balaka, n'wana Siporo, hosi ya Mowabu, u va rhumele eka mina, a ku: ₁₁‘Tiko leri humeke eEgipta ri kona, ri funengeta misava! Sweswi tana, u ri rhuketela kumbe ndzi ta swi kota ku ri hlasela, ndzi ri hlongola.’ ” ₁₂Xikwembu xi ku eka Balaama: “U nga ka u nga fambi na vona. U nga ka u nga rhukaneli tiko leri hikuva ri katekisiwile.” ₁₃Ni mixo, Balaama a pfuka, a ku eka tindhuna ta Balaka: “Tlhelelani ekarikwenu, hikuva Yehovha u ndzi arisile ku famba na n'wina.” ₁₄Kavaloko tihosi ta Mowabu ti suka ti tlhelela eka Balaka, ti ku: “Balaama u arile ku famba na hina.” ₁₅Kutani Balaka a engeta a rhuma tindhuna leto talanyana, leti tlulaka leto rhanga hi vukulu. ₁₆Kuteloko ti fikile eka Balaama, ti ku eka yena: “Balaka, n'wana Siporo, u vula sweswo, a ku: ‘Ndzi ku khongela, u nga siveriwi ha nchumu ku ta eka mina; ₁₇ndzi ta ku dzunisa ngopfu; kambe hinkwaswo leswi u nga ta ndzi byela, ndzi ta swi endla. Wa nga ta u ndzi rhukanela tiko leri!’ ” ₁₈Balaama a hlamula a ku eka malandza ya Balaka: “Hambiloko Balaka a ndzi nyika yindlu ya yena yi tele hi silivhere ni nsuku, ndzi nga ka ndzi nga tluri ku lerisa ka Yehovha, Xikwembu xanga, ku endla xilo lexitsongo hambi lexikulu. ₁₉Na n'wina, tshamani kwala vusiku lebyi, ndzi ta tiva lexi Yehovha a nga ta engeta a ndzi byela xona.” ₂₀Kutani Xikwembu xi ta eka Balaama nivusiku, xi ku eka yena: “Leswi vanhu lava va teke ku ku vita, famba na vona, ntsena u ta endla lexi ndzi nga ta ku byela xona.” ₂₁Ni mixo, Balaama a pfuka, a bohela xihlalu embhongolweni ya yena, kutani a famba ni tihosi ta Mowabu.

₂₂Kambe Xikwembu xi n'wi karihela leswi a sukeke, kutani ntsumi ya Yehovha yi yima endleleni, yi n'wi sivela. Balaama a a khandziyile mbhongolo ya yena, a ri ni malandza mambirhi ya yena. ₂₃Mbhongolo yi vona ntsumi ya Yehovha leyi yimeke endleleni, yi ri ni tlhari lero hatima evokweni. Mbhongolo yi hambukela emasin'wini, kutani Balaama a ba mbhongolo ku yi tlherisa endleleni. ₂₄Kambe ntsumi ya Yehovha yi ya yima endleleni ya ku enta leyi hundzaka exikarhi ka masimu ya vhinya, leyi biyiweke ematlhelweni mambirhi. ₂₅Mbhongolo yi vona ntsumi ya Yehovha, kutani yi tikamela erihlampfini, yi manyisa nenge wa Balaama, kambe yena a engeta a yi ba. ₂₆Kutani ntsumi ya Yehovha yi hundzela emahlweni, yi ya yima exivandleni lexo khuma, laha ku nga ka ku nga hambukeki, hambi exineneni, hambi eximatsini. ₂₇Mbhongolo yi vona ntsumi, kutani yi tiwisa ehansi, kutani Balaama a kariha, a ba mbhongolo hi nhonga. ₂₈Kavaloko Yehovha a pfula nomu wa mbhongolo, kutani yi ku eka Balaama: “Ndzi ku endle yini leswi u ndzi beke kanharhu sweswi xana?” ₂₉Balaama a ku eka mbhongolo: “Hi leswi u tlangeke ha mina. Loko a ndzi ri ni tlhari evokweni a ndzi ta ku dlaya sweswi.” ₃₀Mbhongolo yi ku eka Balaama: “Xana a hi mina mbhongolo ya wena leyi u yi khandziyeke ku fika namuntlha-ke? Xana ndzi tolovele ku ku endlisa sweswo xana?” Kutani a ku: “E-e!” ₃₁Kavaloko Yehovha a pfula mahlo ya Balaama, kutani a vona ntsumi ya Yehovha leyi yimeke endleleni, yi tamele tlhari leri hatimaka evokweni ra yona kutani a korhama, a khinsama emombyeni wa yena.

₃₂Ntsumi ya Yehovha yi ku eka yena: “U bele yini kanharhu sweswi mbhongolo ya wena xana? Hi mina loyi ndzi humeke ku ku sivela, hikuva ndzi vonile leswaku ndlela leyi yi ku yisa eku loveni. ₃₃Mbhongolo yi ndzi vonile, kutani yi hambukile kanharhu emahlweni ka mina. Loko nge yi nga hambukanga emahlweni ka mina ingi ndzi ku dlayile u ri wena, kambe yona, i ngi ndzi yi tshikile yi hanya.”

₃₄Balaama a ku eka ntsumi ya Yehovha: “Ndzi dyohile hikuva a ndzi swi tivanga leswaku u yimile emahlweni ka mina endleleni. Kutani sweswi, loko swi bihile emahlweni ka wena, ndzi ta tlhelela ekaya.” ₃₅Ntsumi ya Yehovha yi ku eka Balaama: “Famba ni vanhu lava, kambe u ta vula ntsena lexi ndzi nga ta ku byela xona.” Kutani Balaama a famba ni tindhuna ta Balaka.

₃₆Kuteloko Balaka a twa leswaku Balaama a fika, a huma ku ya hlangana na yena eAra-Mowabu, lowu nga endzilakaneni wa Arinoni, emakun'wini ya tiko. ₃₇Kutani Balaka a ku eka Balaama: “Xana a ndzi rhumanga eka wena ku ku vita; a ku tanga ha yini eka mina-ke? Xana kunene a ndzi swi koti ku ku dzunisa xana?” ₃₈Balaama a ku eka Balaka: “Wa swi vona, ndzi tile eka wena; kambe sweswi xana ndzi ta swi kota ku vula lexi ndzi xi rhandzaka xana? Rito leri Xikwembu xi nga ta veka enon'wini wa mina, hi rona leri ndzi nga ta ri vula.” ₃₉Kutani Balaama a famba na Balaka, va ya Kiriyata-Husoti. ₄₀Balaka a endla magandzelo ya tihomu ni tinyimpfu, kutani a rhumela Balaama ni tihosi leti ngi ti ri na yena nyama. ₄₁Ni mixo Balaka a ya teka Balaama, a n'wi khandziyisa Bamoto-Baali, leswaku a vona a ri kwalaha, emakumu ya tiko.