Hoseya 9

₁Awu, Israyeli, ungajabuli;

ungatsakasi njengaletinye tive.

Ngobe nine aniketsembeki kuNkulunkulu wenu.

Nitsandza inkhokhelo yebugwadla bekukhonta tithico;

nifuna kukhokhelwa kuwo onkhe emabala ekubhulela kolo.

₂Emabala ekubhulela kolo

nematje ekuhluta liwayini ngeke abondle bantfu;

liwayini lelisha bangeke balitfole.

₃Bangeke basale eveni laSimakadze;

Efrayimu uyawubuyela eGibhithe,

adle kudla lokungcolile e-Asiriya.

₄Bangeke bayitfululele kuSimakadze iminikelo yeliwayini,

kantsi nemihlatjelo yabo ingeke imjabulise.

Imihlatjelo lenjalo

kubo iyawufanana nesinkhwa salabalilako;

bonkhe labayidlako bayawungcola ngekwemtsetfo.

Lokudla kuyawuba kwabo;

kungeke kungeniswe ethempelini laSimakadze.

₅Niyakwente njani ngelilanga

lemadzili enu lamisiwe,

ngemalanga emadzili aSimakadze?

₆Ngisho nome bangaphunyula ekubhujisweni,

iGibhithe iyawubabutsela ndzawonye,

iMemfisi ibangcwabe.

Emagugu abo esiliva ayawumbonywa

ngumena wetinchachabutane,

nemanyeva ayawumbonya emathende abo.

₇Emalanga esijeziso ayeta,

yebo emalanga emphindziselo asasondzele,

Israyeli kufanele akwati loko.

Njengobe tono tenu titinyenti kangaka

nebutsa benu bubukhulu kangaka,

umphrofethi sewutsatfwa njengesilima,

umuntfu wesembulo atsatfwe njengeluhlanya.

₈Umphrofethi utfunyelwe nguNkulunkulu

kutsi abe ngumlindzi wa-Efrayimu,

noko tingibe timele umphrofethi kuto tonkhe tindlela takhe,

nebutsa busendlini yaNkulunkulu wakhe.

₉Bonakele ngalokujulile njengasetikhatsini taseGibeya.

Nkulunkulu uyawubukhumbula bubi babo,

abajezisele tono tabo.

₁₀“Ngesikhatsi nangitfola Israyeli,

bekungatsi ngitfola emagelebisi elugwadvule;

ngesikhatsi ngibona boyihlo,

bekungatsi ngibona titselo tekucala esihlahleni semakhiwa.

Kodvwa kwatsi nabefika eBhali Pheyori,

batehlukanisela leso sithico lesilihlazo,

nabo baze benyanyeka njengalentfo bebayitsandza.

₁₁Bukhulu ba-Efrayimu buyawundiza bemuke njengenyoni,

kubete kutalwa kwebantfwana, kubete kutetfwala,

kubete ngisho nekubamba sisu.

₁₂Nome ngabe bakhulisa bantfwana babo,

ngiyawubemuka bona kungasali muntfu.

Maye kubo, mhlazane ngibafulatsela.

₁₃Efrayimu ngimbonile, njengeThire,

ahlanyelwe endzaweni lenhle.

Kodvwa Efrayimu uyawukhipha bantfwana bakhe,

abayise kumbulali.”

₁₄Simakadze, banike!

Kodvwa utabanikani?

Banike titalo letingabambi,

ubanike nemabele late lubisi.

₁₅“Ngenca yabo bonkhe baseGilgali ngabazonda khona lapho.

Ngenca yetono tabo labatentile,

ngitabacosha lapha endlini yami.

Ngingeke ngiphindze ngibatsandze;

bonkhe baholi babo bayangihlubuka.

₁₆Efrayimu uhushekile,

imphandze yakhe ibunile,

akasatseli titselo.

Ngisho nome bangatala bantfwana,

ngiyakuyibulala leyo mbewu yabo labayitsandzako.”

₁₇Nkulunkulu wami uyawubala,

ngobe abakamlaleli yena;

bayawuba ngimizulane emkhatsini wetive.