Hoseya 10

₁Israyeli abengumvini lowenabako

watitselela yena titselo.

Satsi sitselo sakhe sisandza,

wakha emalati lamanye;

latsi live lakhe lisatfutfuka,

wahlobisa ematje akhe lakhontwako.

₂Inhlitiyo yabo iyakhohlisana,

manje sekufanele baletfwale licala labo.

Simakadze utawephula emalati abo,

abhidlite nalamatje abo lakhontwako.

₃Bayawube sebayakhuluma batsi:

“Asinayo inkhosi,

ngobe asizange simhloniphe Simakadze.

Kodvwa nome ngabe besinayo inkhosi,

beyitasentela ini?”

₄Benta tetsembiso letinyenti,

bafungele emanga,

bente netivumelwane.

Ngako kwehlulela emacala kuyahluma njengencatsavane lenebutsi

emiseleni yemasimi lalinyiwe.

₅Bantfu labahlala eSamariya bayalesabela,

lelitfole lelisithico saseBhethi Aveni.

Bantfu balo bayawulililela,

kanjalo nebaphristi balo labalikhontako,

labo lababetsakasele inkhatimulo yalo yegolide,

bayawulililela ngobe itsatfwe kubo yayiswa ekutfunjweni.

₆Nalo lelitfole liyakwetfwalwa liyiswe e-Asiriya,

liyewuba setfulo enkhosini lenkhulu.

Efrayimu uyawuhlazeka;

Israyeli uyawuba nemahloni ngetithico takhe tetigodvo.

₇ISamariya nenkhosi yayo kuyawuphephuka

njengelusaba lwemuka etikwemanti emfula.

₈Tindzawo letiphakeme tebubi tiyawubhujiswa,

leso sono sa-Israyeli.

Emanyeva nemitfuma kuyawukhula kumbonye emalati abo.

Bayawube sebakhuluma etintsabeni batsi:

“Simbonyeni!” nasemagcumeni batsi:

“Dzilikelani etikwetfu!”

₉“Kusukela ngesikhatsi saseGibeya,

awu Israyeli, seloku niyona,

futsi seloku nisachubeka niyona.”

Imphi ingeke ibakhandze yini lababi eGibeya?

₁₀Ngitimisele kutsi ngitabajezisa;

tive titawubutsana timelane nabo,

tibabophe ngenca yetono tabo letinyenti.

₁₁“Efrayimu ulitfokati leliceceshiwe,

lelikutsandzako kubhula emabele;

ngako ngiyawubeka lijoko entsanyeni yakhe lenhle.

Ngiyawubopha Efrayimu,

Juda kufanele alime,

Jakobe advube umhlabatsi.

₁₂Ngake ngatsi: ‘Tihlanyeleleni kulunga,

nivune titselo temusa longapheli,

bese nilima ingcatfo;

ngobe sesikhatsi sekufuna Simakadze,

adzimate efike ehlisele imvula yekulunga etikwenu.’

₁₃Kodvwa senihlanyele bubi,

navuna bubi,

nadla sitselo senkhohlakalo.

“Ngobe nisuke netsembela kuwenu emandla

nasemabutfweni enu lamanyenti,

₁₄kudvuma kwemphi kuyawusuka kumelane nebantfu benu,

khona kutewutsi tonkhe tinqaba tenu tibhidlitwe,

njengobe Shalmani abhidlita iBhethi Abeli ngelilanga lemphi,

mhlazana bomake baphihlitwa phansi emhlabatsini

kanye nebantfwababo.

₁₅Awu, Betheli, kuyakwenteka kona loko-ke nakuwe,

ngobe bubi bakho bukhulu.

Kuyawutsi kusa ngalelo langa,

inkhosi yaka-Israyeli

iyawube seyibhujiswe yaphela.”