Hoseya 8

₁“Beka licilongo etindzebeni takho temlomo!

Lusweti lusetikwendlu yaSimakadze,

ngobe sive sisephulile sivumelwane sami,

sawuhlubuka nemtsetfo wami.

₂Israyeli ukhala kimi, utsi:

‘Awu Nkulunkulu wetfu, siyakuhlonipha.’

₃Kodvwa Israyeli ukulahlile

loko lokungukona kukuhle,

ngako-ke sitsa sitamcosha.

₄Batibekela emakhosi bangakancutfulisi kimi,

batikhetsela babusi bangakabonwa ngimi.

Ngesiliva yabo nangegolide yabo

batentela tithico letitababhubhisa bona.

₅Awu, Samariya, silahle lesithico sakho selitfole!

Intfukutselo yami iyanivutsela,

kuyawudzimate kube ngunini

solomane nehluleka kuba ngulabamsulwa?

₆Lesithico siphuma ka-Israyeli!

Lelitfole lentiwe ngumuntfu loyingcweti kutekubata,

alisiye Nkulunkulu.

Litakwephulwa libe ticucu,

lelo tfole laseSamariya.

₇“Bahlanyela umoya bavune siwunguwungwana.

Luhlanga alunaso sishakato;

lungeke lusivete sivuno.

Kube belungatsela tinhlavu,

betive bebangaluphanga.

₈Israyeli umitiwe,

manje sewusemkhatsini wetive njengentfo lengenamsebenti.

₉Ngobe sebakhuphukele e-Asiriya kuyawufuna lusito

njengembongolo yesiganga lezulazula yodvwana.

Efrayimu sewutitsengise yena emashendeni akhe.

₁₀Nome sebatitsengise bona kubetive,

nyalo sengitababutsela ndzawonye.

Batawucala bondze

ngaphansi kwencindzetelo yenkhosi yase-Asiriya.

₁₁“Lite nome Efrayimu akhe emalati lamanyenti eminikelo yesono,

lamalati asagucuke aba ngemalati ekwenta tono.

₁₂Ngababhalela tintfo letinyenti temtsetfo wami,

kodvwa loko bakutsatsa njengentfo lengesiyo yabo.

₁₃Banikela ngemihlatjelo lenikwe mine,

bese badla lenyama,

kodvwa Simakadze akajabuli ngayo.

Manje sewutabukhumbula bubi babo,

abajezisele tono tabo:

Bayawubuyela eGibhithe.

₁₄Israyeli sewumkhohliwe uMenti wakhe, wakha tigodlo;

Juda sewubiyele emadolobha lamanyenti.

Kodvwa ngitawutfumela umlilo

etikwalamadolobha abo,

loyawushisa letinqaba tabo uticedze.”