TOBITE 9

₁Joale Tobiase a bitsa Rafaele, a re ho eena: ₂“Asariase ngoan'eso, tsamaea le bahlanka ba bane le likamele tse peli, u lebe Ragese. ₃U tl'u ee ha Gabaele, u mo nee lengolo lena la bopaki, a u lokollele chelete. U b'u tle le eena lechatong. ₄Ua tseba hore ntate o nts'a bala matsatsi, 'me ha nka lieha leha e le letsatsi feela, ke tla 'mea matsoalong a mabe. U s'u nts'u bona kamoo Raguele a itlammeng kateng; ke tšaba ho khesa kano ena ea hae.”

₅Rafaele a tsamaea le bahlanka bao ba bane le likamele tse peli, a leba Ragese e Media. Ba robaletsa hona ha Gabaele. Rafaele a mo nea lengolo la bopaki, a ba a mo tsebisa hore Tobiase, mor'a Tobite, o nyetse mosali 'me o mo memela lechatong. Hang Gabaele a bala mekotlana, a mo lokollela eona e ntse e koetsoe ka thata. Ba e bofa. ₆Ba tsohella tseleng kaofela ho ea lechatong. Ha ba fihla ha Raguele, ba fumana Tobiase a ntse a e-ja. A raoha, a lumelisa Gabaele ea ileng a seka meokho 'me a mo hlohonolofatsa ka mantsoe ana: “Monghali ea khabane, mor'a motho ea khabane, ea lokileng, ea fanang ho mafutsana! Morena a ke a theolele tlhohonolofatso ea leholimo holim'a hao le mosali oa hao, le holim'a mohoe le mohoehali oa hao. Ho bokoe Molimo, hobane ke bone motsoala Tobiase, ea futsitseng ntat'ae hantle.”