Ho hlora ha Tobite le Anna
1Mehla ena Tobite o ne a bala hore na leeto la Tobiase ke la matsatsi a makae ho ea le ho khutla. Matsatsi a phethahala, empa mora a se ke a bonahala. 2A re: “E se ka mp'a ba ba mo tšoareletse koana. E se ka mp'a ba Gabaele o shoele 'me ha ho motho ea mo fang chelete.” 3A qala ho ngongoreha. 4Mosali oa hae Anna a re: “Ngoan'a ka o shoele. Ha a sa le har'a ba phelang.” A qala ho itšela ka likhapha le ho llela mora, a re: 5“Jonna, ngoan'a ka, ke ne ke u lumellela'ng ho tsamaea, uena leseli la mahlo a ka?”
6Tobite a re ho eena: “Thola hle, ngoan'eso, lahla khopolo tsena. O nts'a iphelela hantle. Ho na le ntho e ba liehisitseng koana; le motho ea mo felehelitseng oa tšepahala, ke mohahabo rona. Se ngongorehe ka eena, ngoan'eso. O s'a tla fihla.” 7Empa Anna a fetola, a re: “Ak'u khaohane le 'na, u se k'a 'n'a nthetsa. Ngoan'a ka o shoele.” Tsatsi le leng le le leng o ne a ee a potlakele kantle, a shebe tseleng eo mora oa hae a neng a ile ka eona. O ne a sa kholoe mang kapa mang. Ha letsatsi le liketse, o ne a ee a khutlele ka tlung, a itšele ka likhapha, a lle bosiu bohle, a sa khalehe.
Tobiase o tloha Ekebatana
Eitse hoba ho fete matsatsi a leshome le metso e mene a lechato, ho ea kamoo Raguele a neng a itlamme ho ketekela morali oa hae kateng, Tobiase a ea ho eena, a re: “Joale ntokolle ke tsamaee; hobane, kea tseba, ntate le 'mè ba tšohile hore ha ba sa tla mpona. Ka hoo kea u kopa, ntate, ntumelle ke khutlele hae ho ntate. Ke se ke ile ka u bolella hore na ke mo siile a le joang.” 8Raguele a re ho Tobiase: “Ak'u tsoe u lutse le 'na mona ha ka, ngoan'a ka hle. Ke tla romela maqosa ho ntat'ao ho mo tsebisa mabaka a hao.” 9Empa Tobiase a re: “Oho hle, ak'u mp'u ntumelle ke ee hae ho ntate.” 10Hang Raguele a mo lokollela mosali oa hae Sara, a mo fa le karolo ea bobeli ea tsohle tseo a nang le tsona, e leng bahlanka le makhabunyane, likhomo le linku, liesele le likamele, liphahlo, chelete le thepa ea ntlo.
11A ba lokolla hore ba itsamaele ka khotso, hoba a lumelise Tobiase ka mantsoe ana: “Tsamaea ka khotso, ngoan'a ka, tsela-tšoeu! Morena oa leholimo a ke a le atlehise, le Sara mosali oa hao. Le 'na nke ke bone bana ba lona pele ke e-shoa.” 12A re ho morali oa hae Sara: “Ikele ha matsal'ao, hobane ho tloha joale e s'e le bona batsoali ba hao joaloka rona ba u tsoetseng. Tsamaea ka khotso, ngoan'a ka. A nke ke utloe tse monate feela ka uena bophelong ba ka bohle.” A ba lumelisa joalo, a ntan'o ba lokolla.
Edena le eena a re ho Tobiase: “Ngoan'a ka, ngoan'eso ea ratehang, Morena a ke a u fihlise hae. Le 'na nke ke bone bana ba hao ke sa phela, bana ba Sara morali oa ka, pele ke e-shoa. Pontšeng ea Morena ke bea morali oa ka paballong ea hao. U se ke ua mo utloisa bohloko le ka mohla, matsatsing 'ohle a bophelo ba hao. E-ea ka khotso, ngoan'a ka. Ho tloha joale ke 'na 'm'ao, le Sara ke khaitseli ea hao. Bohle re ke re atlehe matsatsing 'ohle a bophelo ba rona.” A ba aka bobeli, a ntan'o ba lokolla ba le khotso.
