Modemona oa lelekoa
1Hoba ba qete ho itjella le ho inoella, ba itokisetsa ho ea tlung. Ba felehetsa mohlankana, ba mo isa kamoreng e lokisitsoeng. 2Tobiase a hopola seo Rafaele a neng a 'moleletse sona. A ntša sebete le pelo ea tlhapi ka mokotlaneng oo a neng a li bolokile ka ho oona, a li akhela mashaleng moo ho kubetsoang teng. 3Monko oa tlhapi oa thiba modemona, hoo o bileng oa balehela libakeng tse phahameng tsa Egepeta. Hang Rafaele a o lelekisa, a ba a o holeha hona moo.
Thapelo ea Tobiase
4Ha e le batsoali, ba ne ba tsoile kamoreng eo, ba bile ba koetse monyako. Tobiase a tsoha liphateng, a re ho Sara: “Tsoha, khaitseli! Re rapele, re kope Morena oa rona hore a re hauhele 'me a re sireletse.” 5A tsoha, eaba ba qala ho rapela le ho kopa hore ba sireletsoe. Tobiase a rapela, a re:
“U bokoe, Molimo oa bo-ntat'a rona,
ho bokoe Lebitso la hao
ka mehla le mehla.
Maholimo 'moho le libopuoa
tsohle tsa hao
li ke li boke ka mehla eohle.
6Ke uena ea bopileng Adama,
ke uena ea bopileng le Eva
mosali oa hae,
hore e tle e be mothusi
le motšehetsi oa hae;
'me moloko oohle oa batho
o hlahile ka bona ba babeli.
Ke uena ea itseng:
Hase ntho e ntle hore
motho a lule a inotši;
a re mo etsetseng mothusi
ea tšoanang le eena.
7Joale ke inketse khaitseli ena ea ka,
e le ka 'nete,
e seng ka baka la boithabiso.
Ak'u re hauhele rona le eena.
'me u re fihlise boqhekung
re ntse re khomarelane.”
8Eaba bobeli ba bona ba re: “Amen, amen!”
9'Me ba ithoballa bosiu kaofela.
Letsoalo la batsoali ba Sara
Raguele eena a tsoha, a bitsa bahlanka ba hae, a ba laela ho ea cheka lebitla. 10O ne a re: “A se k'a mp'a shoa! Esere ra fetoha sesomo, ra tlontlolleha.” 11Ha ba qetile ho cheka lebitla, Raguele a khutlela ka tlung, a bitsa mosali oa hae, 12a re: “Romela le leng la makhabunyane, le ke le e'o hlaha, le bone hore na Tobiase o nts'a phela. Ha eba o shoele, re mo pate ho se motho ea tsebang.” 13Ba bitsa lekhabunyane, ba hotetsa lebone, ba bula lemati; la kena, la ba fumana ba le 'moho, ba ile le sephume sa boroko. 14La tsoa, la ba bolella hore o ntse a phela, ha a hlaheloa ke kotsi ea letho. 15Ke ha ba boka Molimo oa leholimo, ba re:
Thapelo ea Raguele
“U bokoe, uena Molimo,
u bokoe ka ho tlala,
ka pelo tse hloekileng.
Batho ba ke ba u boke ka mehla eohle.
16U bokoe hobane u nthabisitse;
seo ke neng ke se tšohile
ha sea etsahala,
empa u re etselitse mohau o moholo.
17U bokoe hobane u hauhetse
bana bana,
ba tsoetsoeng ba le inotši
malapeng abo bona.
Morena, ak'u ba sitse
ka mohau le tšireletso,
hore ba tle ba qete
bophelo bohle ba bona
thabong le mohaung oa hao.”
18Eaba Raguele o laela bahlanka ba hae ho kata lebitla pele bosiu bo e-sa.
Mokete oa lechato
19A laela mosali oa hae ho pheha bohobe bo bongata. Eena a ea mohlapeng, a lata khomo tse peli le linku tse 'ne, a laela hore li phehoe. Litokiso tsa qalella. 20A bitsa Tobiase, a re ho eena: “U se ke ua tloha mona pele ho matsatsi a leshome le metso e mene. Itulele ha ka mona; u itjelle, u inoelle; u k'u thabise pelo ea morali enoa oa ka ka mora' matšoenyeho a hae. 21Hang u hl'u inkele karolo ea bobeli ea tsohle tseo ke nang le tsona, u ikhutlelle ho ntat'ao ka khotso. Karolo e setseng e tla ba ea lona ka mora' lefu la rona le mosali oa ka. Khothahala, ngoan'a ka. Ke ntat'ao le Edena ke 'm'ao. Ho tloha joale ho isa khale, re amana le uena joaloka ha re amana le mosali oa hao. Khothahala hle, ngoan'a ka.”
