1Tobiase a tloha ho Raguele ka khotso. O ne a boka Morena oa leholimo le lefatše, Khosi ea tsohle, ka thabo e kholo, hobane o ne a mo atlehisitse leetong la hae. Mantsoe a ho qetela a Raguele ho eena e ne e bile ana: “Morena a ke a u thuse ho hlonepha batsoali ba hao matsatsing 'ohle a bophelo ba bona.”
Tobiase o fihla hae
Eitse ha ba fihla Kaserine, malokana le Ninife, 2Rafaele a re: “Ua tseba hore na re siile ntat'ao a le joang. 3A re etelle mosali oa hao pele, re e'o hlopha ntlo, ha eena a ntse a e-tla le ba bang.” 4Ba fetela pele bobeli ba bona. Rafaele o ne a ile a re ho eena a nke nyooko ea tlhapi. Ntjanyana ea tla e setse lengeloi le Tobiase morao.
5Anna o ne a lutse a shebile tseleng eo mora oa hae a neng a tla fihla ka eona. 6Hang ha a hlaha, a mo tseba 'me a re ho ntat'ae: “Mor'a hao ke eo a e-tla le motho eane ea mo felehelitseng.” 7Pele Tobiase a fihla ho ntat'ae, Rafaele a re ho eena: “Ke tseba hantle hore mahlo a hae a tla tutuboloha. 8U mo rothetse mahlo ka nyooko ea tlhapi: moriana o tla ja matheba a maputsoa, a ebohe mahlong a hae, 'me ntat'ao o tla boela a bona leseli.”
9Anna a tla a matha, a kopa mora ka molala, a re: “Joale nka ichoella, hobane ke boetse ke u bone.” Eaba oa lla.
Tobite o phekoloa bofofu
10Tobite a raoha, a tsamaea a ntse a khothometseha, a ba a tsoela ka ntle ho lebala. 11Tobiase a mo khahlametsa a nkile nyooko ea tlhapi ka letsoho. A 'mululela ka mahlong, 'me a re ho eena, a ntse a mo kakatletse: “Khothahala, ntate.” A nt'o mo tsaraletsa ka moriana oo a ileng a o tlohela motsotsoana. 12Joale, ka matsoho a mabeli, a ebola matheba a maputsoa mahlakoreng a mahlo a hae. 13Ke moo ntat'ae a ileng a mo kopa ka molala, 14'me a lla, a re: “Ka ba ka u bona, mor'a ka, uena leseli la mahlo a ka!” Hape a re: “Ho bokoe Molimo, ho bokoe Lebitso le hlomphehang haholo la hae. Ho bokoe mangeloi 'ohle a hae. Lebitso le hlomphehang haholo la hae le 'ne le re sireletse. Ho bokoe mangeloi 'ohle a hae ka mehla eohle; 15hobane o ne a nkotlile, empa joale ke boetse ke bona mor'a ka Tobiase.”
Tobiase a kena ka tlung a thabile, 'me a boka Molimo ka lentsoe le phefa. A phetela ntat'ae hore leeto la hae le mo atlile, o tlile le chelete, e bile o nyetse Sara morali oa Raguele; le hore o ntse a e-tla, o se a le haufi le khoro ea Ninife.
Ho fihla ha Sara
16Tobite a ea khahlametsa ngoetsi ea hae khorong ea Ninife ka thabo e kholo, a ntse a boka Molimo. Ha baahi ba Ninife ba 'mona a feta har'a motse a koebela, a tsamaea a se na motataisi, ba makala. 17Tobite a ba bolella pepenene hore Molimo o mo etselitse mohau 'me o mo tutubolotse mahlo.
Eare ha a khahlana le Sara, mohats'a mora oa hae Tobiase, a mo hlohonolofatsa, a re ho eena: “Ikenele ka khotso, morali. Ho bokoe Molimo, ea u tlisitseng habo rona, morali. Ho bokoe ntat'ao, ho bokoe mor'a ka Tobiase, u b'u bokoe le uena, morali. Kena heno ka khotso, u apareloe ke mahlohonolo le thabo. Kena, morali.”
Lena ea e-ba letsatsi la thabo ho Bajuda bohle ba phelang Ninife. 18Bo-motsoal'a Tobite, Ahikare le Nadare, le bona ba tla thaba le eena.
